ఆంధ్రా ప్లేయర్‌‌కు డిమాండ్.. వేలంలో కళ్లు చెదిరే మొత్తం ఆఫర్ చేసిన ఢిల్లీ

బెంగళూరు వేదికగా జరిగిన మహిళల ప్రీమియర్ లీగ్ మినీ వేలంలో ఆంధ్రప్రదేశ్ ప్లేయర్‌ పంట పండింది. డబ్ల్యూపీఎల్ 2025 సీజన్ కోసం మినీ వేలం నిర్వహించారు. 19 స్లాట్ల కోసం నిర్వహించిన ఈ వేలంలో 120 మంది నమోదు చేసుకున్నారు. ఇక వేలంలో ఆంధ్రప్రదేశ్ క్రీడాకారిణి నల్లపురెడ్డి శ్రీ చరణి భారీ ధర పలికింది. ఢిల్లీ క్యాపిటల్స్ శ్రీ చరణిని రూ.55 లక్షలకు దక్కించుకుంది. 20 ఏళ్ల ఈ ఆల్‌రౌండర్ జాతీయ స్థాయిలో ఇండియా సి జట్టుకు ప్రాతినిధ్యం వహించారు. శ్రీ చరణిది కడప జిల్లా కావటం విశేషం. లెఫ్ట్ హ్యాండ్ బ్యాటర్ అయిన శ్రీ చరణి.. స్పిన్ వేయగలరు. దీంతో ఢిల్లీ క్యాపిటల్స్ జట్టు ఆమెను వేలంలో దక్కించుకుంది. ఢిల్లీ క్యాపిటల్స్ జట్టు వేలంలో అత్యధిక ధరను శ్రీచరణికి కేటాయించడం విశేషం.

మరోవైపు కడప జిల్లా ముద్దనూరు సమీపంలోని ఆర్టీపీపీలో నల్లపురెడ్డి శ్రీ చరణి కుటుంబం ఉంటోంది. శ్రీ చరణి నాన్న ఆర్టీపీపీలో పనిచేస్తున్నారు. శ్రీ చరణికి బాల్యం నుంచే క్రికెట్ అంటే ఇష్టం కావటంతో కుటుంబసభ్యులు ప్రోత్సహించారు. క్రికెట్‌లో మెళకువలు నేర్చుకుంటూ జిల్లా స్థాయి, రాష్ట్ర స్థాయి, జాతీయ స్థాయి వరకూ శ్రీ చరణి ఎదిగారు. డబ్ల్యూపీఎల్‌లో ఆడుతున్నారు.

మరోవైపు డబ్ల్యూపీఎల్ మినీ వేలంలో భారత అన్‌క్యాప్‌డ్‌ బ్యాటర్ సిమ్రాన్‌ షేక్‌ అత్యధిక ధర పలికింది. గుజరాత్ జెయింట్స్‌ రూ.1.90 కోట్లు ఖర్చుచేసి సిమ్రాన్ షేక్‌ను దక్కించుకుంది. పది లక్షల రూపాయలు బేస్ ధరతో వేలంలోకి వచ్చిన సిమ్రాన్ కోసం.. దిల్లీ, గుజరాత్ పోటీపడ్డాయి. చివరకు గుజరాత్ జెయింట్స్ దక్కించుకుంది. అలాగే తమిళనాడుకు చెందిన వికెట్ కీపర్ 16 ఏళ్ల కమిలిని కూడా భారీ ధర దక్కించుకుంది. ముంబయి ఇండియన్స్‌ రూ.1.60 కోట్లకు కమిలినిని కొనుగోలు చేసింది.

ఇక వెస్టిండీస్ ఆల్‌రౌండర్ డియాండ్రా డాటిన్‌ను కూడా గుజరాత్ దక్కించుకుంది. డియాండ్రాను రూ.1.70 కోట్లకు కొనుగోలు చేసింది. పూనమ్‌ యాదవ్, స్నేహ్‌ రాణాతో పాటుగా హీథర్ నైట్, లారెన్ బెల్, సారా గ్లెన్ వంటి ప్లేయర్లను కొనుగోలు చేసేందుకు ఎవరూ ఆసక్తి చూపించలేదు. దీంతో వారికి నిరాశ తప్పలేదు.