టీనేజీ అమ్మాయికి విచిత్రమైన అలవాటు.. అప్పట్లో చైనాలో.. ఇప్పుడు ఏపీలో

మనలో చాలా మందికి చాలా రకాల అలవాట్లు ఉంటాయి. కొంతమందికి గోళ్లు కొరుక్కునే అలవాటు ఉంటుంది. మరికొంతమందికి మరేదో అలవాటు ఉంటుంది. కానీ ఇప్పుడు చెప్పబోయే బాలికకు ఉన్న అలవాటు లాంటివి సాధారణంగా ఎవరికీ ఉండకపోవచ్చు. ఎక్కడైనా అరుదుగా ఇలాంటోళ్లు ఉంటారు. అయితే మంచి అలవాటు అయితే పర్లేదు కానీ.. ఇలాంటి చెడు అలవాటు అయితే మాత్రం వెంటనే ఇంట్లోకి వాళ్లకి చెప్పకపోతే ఆనక ఇబ్బంది పడాల్సి వస్తుంది. ఈ బాలికలాంటి పరిస్థితి వస్తుంది.

దీనికి సంబంధించిన వివరాల్లోకెళ్తే.. డాక్టర్ బీఆర్ అంబేద్కర్ కోనసీమ జిల్లా ఉప్పలగుప్తం మండలానికి చెందిన ఓ 15 ఏళ్ల బాలిక ఈ మధ్య ఆనారోగ్యానికి గురైంది. వాంతులు అవుతూ ఉండటంత కుటుంబసభ్యులు అమలాపురంలోని ఓ ప్రైవేట్ ఆస్పత్రికి తీసుకువెళ్లారు. అక్కడి వైద్యులు స్కానింగ్‌ చేసి షాక్ తిన్నారు. బాలిక కడుపులో వెంట్రుకల ముద్ద ఉన్నట్లు వైద్యులు గుర్తించారు. ఈ విషయాన్ని కుటుంబసభ్యులకు తెలియజేశారు. అయితే ఆ వెంట్రుకలు ఎలా కడుపులోకి వెళ్లాయనే దానిపై బాలికను ప్రశ్నిస్తే.. తను చెప్పిన సమాధానం విని వైద్యులు ఆశ్చర్యపోయారు. గత కొన్నిరోజులుగా ఇంట్లో ఎవరికీ తెలియకుండా తన జుట్టు తనే తింటున్నట్లు ఆ బాలిక చెప్పింది. దీంతో కుటుంబసభ్యులు కూడా నివ్వెరపోయారు.

అనంతరం ఆపరేషన్ చేసి ఆ కడుపులో ఉన్న వెంట్రుకల ముద్దను ఆస్పత్రి వైద్యులు తొలగించారు. దీని బరువు సుమారుగా కేజీన్నర వరకూ ఉంది. బాలికకు ఉన్న అలవాటు గురించి కుటంబసభ్యులకు తెలియజేసిన డాక్టర్లు.. జాగ్రత్తలు తీసుకోవాలని సూచించారు. అయితే ఇలాంటి అలవాటే చైనాలోనూ ఏడాది కిందట బయటపడింది. 14 ఏళ్ల వయసు ఉన్న బాలిక కడుపులో మూడు కేజీల హెయిర్ బాల్ గుర్తించారు. అనంతరం వైద్యులు సర్జరీ చేసి తొలగించారు.

అయితే ఇదో మానసిక సమస్యగా చెప్తున్న వైద్యులు.. దీనిని ట్రైకోఫాగియా అంటారని చెప్తున్నారు. ట్రైకోఫాగియాతో బాధపడేవారు.. కాగితాలు, సుద్ధ ముక్కలు, వెంట్రుకలు వంటి తినకూడని వాటిని తింటుంటారని చెప్పారు. అయితే దీనిని అంత త్వరగా గుర్తించలేమని వివరిస్తున్నారు. ఎందుకంటే వారు తినే విషయం ఎవరికీ తెలియదని.. కడుపునొప్పి, వాంతులు వంటి అనారోగ్య సమస్యలు వచ్చినప్పుడే తెలుస్తుందని చెప్తున్నారు. సైకోథెరపీ ద్వారా దీనిని నియంత్రించే అవకాశం ఉందంటున్నారు.