టెకీ అతుల్ సుభాష్ ఆత్మహత్య.. భార్యా బాధిత సంఘాల కీలక డిమాండ్

బెంగళూరులో భార్యా బాధిత సాఫ్ట్‌వేర్ ఇంజినీర్ అతుల్ సుభాష్ ఆత్మహత్య ఘటన దేశాన్ని కుదిపిస్తోంది. గృహహింస చట్టాన్ని అడ్డుకుపెట్టుకుని భార్య, ఆమె కుటుంబం.. భర్తను వేధించిన తీరుపై యావత్తు దేశం నివెర్వపోతోంది. తాజాగా, ఈ ఘటనపై భార్యా బాధితుల సంఘం బెంగళూరులో ఆందోళనకు దిగింది. గృహహింస చట్టంలోని సెక్షన్ 498ని దుర్వినియోగం చేస్తూ.. తప్పుడు కేసులతో భర్తలను వేధింపులకు గురిచేస్తోన్న మహిళల సంఖ్య రోజు రోజుకూ అధికమవుతోందని భార్యా బాధితుల సంఘం సేవ్ ఇండియన్ ఫ్యామిలీ ప్రతినిధి కుమార్ జాగిర్దార్ ఆరోపించారు.

‘‘ప్రతి ఉద్యోగంలో ఒత్తిళ్లు అధికమవుతున్నాయి.. ఇంటి పనుల్లోనూ భార్యాభార్తలు చెరిసగం పంచుకుంటున్నారు.. తమ ఆధిపత్యమే కొనసాగాలని మగాడు. భావించేవాడు. గృహహింస చట్టాల్లో మార్పులు చేపట్టిన సెక్షన్ 498ఏ అమల్లోకి వచ్చిన అనంతరం పరిస్థితులు ఒక్కసారిగా మారిపోయాయి’ అని జాగిర్దార్‌ పేర్కొన్నారు. తాను చెప్పినట్టే భర్త వినాలనే ఆధునిక మహిళల సంఖ్య ఎక్కువ అవుతోందని పలు అధ్యయనాలు చెబుతున్నాయని ఆయన అన్నారు. సెక్షన్ 498ఏ కేసుల్లో అధికశాతం తప్పుడు కేసులేని హైకోర్టు గుర్తించిందని తెలిపారు.

‘‘భార్య వేధింపులతో ప్రాణాలు కోల్పోయిన అతుల్ సుభాష్‌కు నివాళిగా మేము ఈ ఆందోళన చేపట్టాం.. ఐటీ ఉద్యోగి అయిన అతడు.. న్యాయవ్యవస్థ విఫలం కావడంతో బలవన్మరణానికి పాల్పడ్డాడు.. సమాజం దీనిపై అవగాహన పెంచుకోవాల్సిన అవసరం ఉంది.. న్యాయవ్యవస్థలో మార్పులు జరగాలి.. పార్లమెంట్‌లోనూ దీనిని లేవనెత్తాలి’’ అని డిమాండ్ చేశారు. మరోవైపు, దుర్వినియోగం అవుతోన్న ప్రస్తుత గృహహింస చట్టాల్లో సవరణలు చేయాలని కోరుతూ సుప్రీంకోర్టులో పిటిషన్ దాఖలైంది. ప్రీతిగుప్తా Vs స్టేట్ ఆఫ్ ఝార్ఖండ్, అచిన్ గుప్తా Vs స్టేట్ ఆఫ్ హర్యానా కేసుల్లో ఈ ఏడాది మే 3న సుప్రీంకోర్టు ఇచ్చిన తీర్పులను కేంద్ర ప్రభుత్వం అమలుచేసేలా ఆదేశించాలని కోరుతూ న్యాయవాది విశాల్ తివారీ ఈ పిటిషన్ వేశారు.

ఇదిలా ఉండగా.. తప్పుడు కేసులు పెట్టిన వారిపై కేసు నమోదు చేయాలని కోర్టులు ప్రతిసారీ పోలీసులకు సూచనలు చేస్తూనే ఉన్నాయి. అయితే, చట్టంలో సవరణలు చేయాలని గత 15 ఏళ్లుగా భార్యాబాధితుల సంఘం పోరాటం చేస్తూనే ఉంది.. పార్లమెంటు సమావేశాల్లో ఆ చట్టానికి సవరణ చేయాలని చేస్తున్న డిమాండ్లన్నీ నీటిమీద రాతల్లా మారిపోతున్నాయి. అటు, అతుల్ సుభాష్ ఆత్మహత్య కేసులో ఆయన భార్య నికిత, ఆమె తల్లి నిషా సింఘానియా, సోదరుడు అనురాగ్‌లను బెంగళూరు పోలీసులు ఆదివారం అరెస్ట్ చేశారు. వారిని బెంగళూరు తరలించి మెజిస్ట్రేట్ ముందు హాజరు పరచగా 14 రోజులు జ్యుడీషియల్ రిమాండ్ విధించింది.