ఈ 2 బ్యాంకుల్లో అధిక వడ్డీ ఇచ్చే స్పెషల్ స్కీమ్స్‌.. డిసెంబర్ 31 వరకే ఛాన్స్

కస్టమర్లను ఆకర్షించేందుకు బ్యాంకులు ప్రత్యేక కాల పరిమితితో ఫిక్స్‌డ్ డిపాజిట్లు అందిస్తుంటాయి. అయితే, ఇవి పరిమిత కాలం వరకే అందుబాటులో ఉంటాయి. అలా 2 బ్యాంకులు తీసుకొచ్చిన స్పెషల్ మెచ్యూరిటీ టెన్యూర్ గల ఫిక్స్‌డ్ డిపాజిట్ల గడువు ఈ డిసెంబర్ 31వ తేదీతో ముగియనుంది. ఆలోపు డిపాజిట్ చేసిన వారికి అధిక వడ్డీ రానుంది. ఈ ప్రత్యేక టెన్యూర్ టర్మ్ డిపాజిట్ల ద్వారా గరిష్ఠంగా 8.10 శాతం వడ్డీ పొందేందుకు అవకాశం ఉంది. మరి ఆ బ్యాంకులు ఏవి? ఏ టెన్యూర్ డిపాజిట్లపై ఎంత వడ్డీ ఇస్తున్నాయి? అనే పూర్తి వివరాలు తెలుసుకుందాం.

ఐడీబీఐ బ్యాంక్ స్పెషల్ ఎఫ్‌డీ డెడ్‌లైన్..

ఐడీబీఐ బ్యాంక్ తీసుకొచ్చిన ఉత్సవ్ ఎఫ్‌డీ స్కీమ్ గడువు డిసెంబర్ 31, 2024తో ముగియనుంది. ఉత్సవ్ ఎఫ్‌డీలో 300 రోజులు, 375 రోజులు, 444 రోజులు, 700 రోజుల కాల పరిమితితో అధిక వడ్డీ రేట్లు కల్పిస్తోంది. జనరల్ కస్టమర్లకు వరసుగా 7.05 శాతం, 7.24 శాతం, 7.35 శాతం, 7.20 శాతం వడ్డీ రేట్లు కల్పిస్తోంది. అదే సీనియర్ సిటిజన్లకు అయితే అదనంగా 50 బేసిస్ పాయింట్ల వడ్డీ ఆఫర్ చేస్తోంది వారికి గరిష్ఠంగా 7.85 శాతం మేర వడ్డీ అందిస్తోంది.

 పంజాబ్ అండ్ సింద్ బ్యాంక్ స్పెషల్ ఎఫ్‌డీ డెడ్‌లైన్..

పంజాబ్ అండా సింద్ బ్యాంక్ వివిధ టెన్యూర్ల ద్వారా స్పెషల్ ఫిక్స్‌డ్ డిపాజిట్ పథకాలను అందిస్తోంది. ఆయా ప్రత్యేక పథకాల గడువు డిసెంబర్ 31, 2024తో ముగియనుంది. 222 రోజుల స్పెషల్ స్కీమ్ ద్వారా సాధారణ కస్టమర్లకు 6.30 శాతం వడ్డీ ఇస్తోంది. అదే 333 రోజుల టెన్యూర్ డిపాజిట్ పథకానికి 7.20 శాతం, 444 రోజులకు 7.30 శాతం, 555 రోజుల డిపాజిట్లకు 7.45 శాతం, 777 రోజుల టెన్యూర్ డిపాజిట్లకు 7.25 శాతం, 999 రోజుల డిపాజిట్లకు 6.65 శాతం వడ్డీ అందిస్తోంది.

ఇక ఆయా పథకాలపై 60 ఏళ్ల నుంచి 80 ఏళ్లలోపు వయసు ఉండే సీనియర్ సిటిజన్లకు 50 బేసిస్ పాయింట్ల వడ్డీ అదనంగా ఇస్తోంది అంటే వీరికి గరిష్ఠ వడ్డీ రేటు 7.95 శాతం మేర అందుతోంది. అది 555 రోజుల టెన్యూర్ పై వస్తోంది. ఇక 80 సంవత్సరాలు పైబడిన సూపర్ సీనియర్ సిటిజన్లకు అదనంగా 15 బేసిస్ పాయింట్లు వడ్డీ ఇస్తోంది. అంటే సాధారణ కస్టమర్లతో పోలిస్తే 65 బేసిస్ పాయింట్లు ఎక్కువ వడ్డీ లభిస్తుంది. వీరికి 555 రోజుల డిపాజిట్లపై గరిష్ఠంగా 8.10 శాతం మేర వడ్డీ ఇస్తోంది.