వృద్ధురాలి ప్రేమాయణం, 4 కోట్లతో ఉడాయించిన ప్రియుడు.. ఈ బ్లైండ్ లవ్ స్టోరీ ఎలా మొదలైందంటే

ప్రేమ ఎప్పుడు, ఎక్కడ, ఎవరిపై, ఎలా పుడుతుందో తెలియదంటారు. అదే నిజం అనుకుందో వృద్ధురాలు. ఆమెకు 60 ఏళ్ల వయసులో ఓ వ్యక్తిపై ఆమెకు ప్రేమ పుట్టింది. అతడి మొహం కూడా చూడకుండానే ఆన్‌లైన్ ద్వారా ప్రేమించేసింది. ఇలా 7 సంవత్సరాలుగా ఫోన్లు, ఛాటింగ్ ద్వారా ప్రేమను ఒలకబోస్తున్న ఆమె.. అప్పుడప్పుడూ అతడికి బహుమతులు పంపేది. ఏదైనా సమస్య అంటే డబ్బులు కూడా ఇచ్చేది. ఇలా ఏడేళ్ల పాటు అతడికి మొత్తం 4 కోట్ల రూపాయలు ముట్టజెప్పింది. ఇదంతా ప్రేమలో భాగమేనని భావించింది. కానీ చివరకు మోసపోయానని గ్రహించి పోలీసులను ఆశ్రయించింది. ఆ విశేషాలు ఏంటో మనం ఇప్పుడు తెలుసుకుందాం.

మలేశియాలోని కౌలంపూర్‌కు చెందిన 67 ఏళ్ల మహిళకు 7 సంవత్సరాల క్రితం అంటే 2017లో ఫేస్‌బుక్‌లో ఓ వ్యక్తి పరిచయం అయ్యాడు. తరచుగా అతడు మెసేజ్‌లు చేయడంతో ఆమె కూడా రిప్లై ఇఛ్చింది. ఇలా వీరిద్దరూ అప్పుడప్పుడూ చాట్ చేసుకునేవారు. అలా ఒకరి గురించి ఒకరు తెలుసుకున్నారు. ముఖ్యంగా ఆ వ్యక్తి తాను మెడికల్ ఎక్విప్‌మెంట్ ప్రొక్యూర్‌మెంట్‌లో పని చేస్తున్న అమెరికన్ వ్యాపారవేత్తగా పరిచయం చేసుకున్నాడు. అది నమ్మిన వృద్ధురాలు అతడితో స్నేహం చేసింది.

అలా నెల రోజుల పాటు వృద్ధురాలితో మాట్లాడిన అతడు.. ఆమెను ప్రేమిస్తున్నట్లు చెప్పాడు. అంతేకాకుండా అతడు మలేశియాకు రావాలనుకుంటున్నట్లు వివరించాడు. అక్కడే సెటిల్ అయ్యేందుకు ప్లాన్ చేస్తున్నట్లు స్పష్టం చేశాడు. కానీ అలా వచ్చేందుకు తన దగ్గర అంత డబ్బు లేదని బాధ పడినట్లు నటించాడు. అప్పటికే అతడిపై ప్రేమ పెంచుకున్న వృద్ధురాలు.. అతడికి డబ్బులు ఇస్తానని చెప్పింది. అలా అతడి బ్యాంకు అకౌంట్ కు  ఆర్ఎం5,000 పంపింది. దీంతో అతడు ఆమెపై మరింత ప్రేమ కురిపించాడు.

అది నిజమేనని నమ్మిన వృద్ధురాలు ప్రతిరోజూ అతడితో మాట్లాడేది. అతడికి సమస్య ఉందని చెప్పిన ప్రతీసారి డబ్బులు పంపేది. తన దగ్గర లేకపోయినా సరే వేరే వాళ్ల దగ్గర అప్పులు చేసి మరీ ఇచ్చింది. ఇలా ఏడేళ్లుగా ఆమె అతడికి మొత్తం ఆర్ఎం.2,210,692.60 (సుమారుగా 4.4 కోట్ల రూపాయలు) పంపింది. మొత్తం 50 వేర్వేరు అకౌంట్లకు ఈ డబ్బు పలు దఫాలుగా ట్రాన్స్‌ఫర్ చేసింది. ఆమె ఎంత పంపుతున్నాననే ధ్యాస కూడా లేకుండా అతడి మాయలో పడిపోయింది.

అయితే కేవలం ఛాటింగ్, వాయిస్ కాల్స్ మాట్లాడుకుంటూనే వీళ్లు ప్రేమించుకోవడం గమనార్హం. కనీసం ఆమె అతడిని చూడాలని ఉందని వీడియో కాల్ కూడా చేయలేదు. మొహం కూడా తెలియకుండానే కోట్ల డబ్బు పంపి.. తన ప్రేమలో ఉన్న నిజాయితీని నిరూపించుకోవాలనుకుంది. కానీ ఆ స్కామర్ మాత్రం వృద్ధురాలికి కుచ్చుటోపీ పెట్టాడు. ఇటీవలే ఆమెతో మాట్లాడడం మానేశాడు. అకౌంట్ కూడా బ్లాక్ చేశాడు. దీంతో విపరీతంగా కుంగిపోయిన వృద్ధురాలు తన ప్రేమ విషయాన్ని స్నేహితురాలికి చెప్పింది. అది విన్న ఆమె స్నేహితురాలు.. నువ్వు మోసపోయావంటూ పోలీసుల వద్దకు తీసుకు వెళ్లింది. బాధితురాలితో పోలీసులకు ఫిర్యాదు చేయించింది. ఇలా వెలుగులోకి వచ్చిన ఈ ఘటన ప్రస్తుతం వైరల్ అయింది.