న్యూ ఇయర్ వేళ ప్రధాని మోదీ ఇంట్రెస్టింగ్ ట్వీట్.. 2024లో భారత్ విజయాలపై వీడియో

 2024 ఏడాదికి ముగింపు పలుకుతూ 2025 సంవత్సరాన్ని ఆహ్వానిస్తూ ప్రపంచ దేశాలు ఇప్పుడు అంబరాన్నంటే సంబరాలు జరుపుకుంటున్నాయి. ఇక మన దేశంలో కూడా కొన్ని గంటల ముందే న్యూ ఇయర్ వేడుకలు ప్రారంభం అవుతున్నాయి. ఈ సందర్భంగా ప్రధానమంత్రి నరేంద్ర మోదీ ఒక ఇంట్రెస్టింగ్ ట్వీట్ చేశారు. న్యూ ఇయర్ వేళ.. ఈ ఏడాదిలో సాధించిన విజయాలను ప్రధాని మోదీ గుర్తు చేస్తూ.. ట్విట్టర్‌లో ఒక వీడియోను పోస్ట్ చేశారు. 2024 మొదట్లో అయోధ్య రామమందిరం ప్రారంభోత్సవం దగ్గర నుంచి ప్రపంచంలోనే అతి పొడవైన అటల్ సేతు వరకు.. దేశంలో ఇలా ఎన్నో కొత్త ప్రాజెక్టులు ప్రారంభించుకున్నట్లు ప్రధాని వెల్లడించారు.

2024 ఏడాదిలో భారత్ ఎన్నో రంగాల్లో విజయాలు సాధించిందని ప్రధాని నరేంద్ర మోదీ తెలిపారు. ఇదే ఐక్యతతో పని చేస్తే వికసిత్ భారత్ సాధించడం ఖాయమని స్పష్టం చేశారు. ఈ ఏడాది కాలంలో సాధించిన పురోగతి, ఐక్యత, వికసిత్ భారత్ వైపు వేసిన అడుగులను గుర్తు చేస్తూ.. ఒక ప్రత్యేక వీడియోను ట్విట్టర్‌లో ప్రధాని మోదీ షేర్ చేశారు. ఇక మొట్టమొదటగా ఈ ఏడాది ప్రారంభంలో ఉత్తర్‌ప్రదేశ్‌లోని అయోధ్యలో.. వందల ఏళ్ల నాటి కోట్లాది మంది హిందువుల కల అయిన రామ మందిరాన్ని స్వయంగా ప్రధానమంత్రి నరేంద్ర మోదీ తన చేతుల మీదుగా ప్రారంభించారు.

ఈ అయోధ్య ప్రాణ ప్రతిష్ఠ కార్యక్రమానికి దేశంలోనే కాకుండా ప్రపంచంలోని పలువురు అతిరథ మహరథులు హాజరయ్యారు. దేశంలోని సినీ, రాజకీయ, క్రీడా, బిజినెస్ సహా వివిధ రంగాలకు చెందిన ప్రముఖులు ఈ అయోధ్య బాలరాముడి ప్రాణ ప్రతిష్ఠ కార్యక్రమానికి హాజరయ్యారు. ప్రస్తుతం దేశంలోనే ఒక ఆధ్యాత్మిక, పర్యాటక ప్రాంతంగా అయోధ్య రామాలయం రికార్డ్ సృష్టిస్తోంది.

ఇక అతి తక్కువ కాలంలోనే ఆగ్రాలోని తాజ్‌మహల్ కంటే ఎక్కువ మంది అయోధ్యను సందర్శించినట్లుగా ఇటీవల ఉత్తర్‌ప్రదేశ్ లెక్కలు విడుదల చేశాయి. అలాగే మహారాష్ట్ర రాజధాని ముంబైలో ప్రపంచంలోనే అతి పొడవైన అటల్ సేతును ప్రధానమంత్రి నరేంద్ర మోదీ ఈ ఏడాదిలోనే ప్రారంభించారు. ఇక అయోధ్య, అటల్ సేతు మాత్రమే కాకుండా ఇలా ఎన్నో అభివృద్ధి కార్యక్రమాలను కేంద్ర ప్రభుత్వం ప్రతిష్టాత్మకంగా తీసుకుని ఈ ఏడాది ప్రారంభించింది.