మళ్లీ సతాయించిన ఐఆర్‌సీటీసీ వెబ్‌సైట్.. నెలలో మూడోసారి

ఇండియన్ రైల్వే క్యాటరింగ్ అండ్ టూరిజమ్ కార్పొరేషన్ (ఐఆర్‌సీటీసీ) వెబ్‌సైట్ మంగళవారం ఉదయం మరోసారి సతాయించింది. ఆశ్చర్యకరంగా తత్కాల్ టికెట్ బుకింగ్ సమయంలోనే వెబ్‌సైట్ మొరాయించడంతో యూజర్లు తీవ్ర ఇబ్బందులను ఎదుర్కొన్నారు. ప్రస్తుతం నిర్వహణ పనులు జరుగుతున్నాయని, అందువల్ల తదుపరి 1 గంట వరకు టిక్కెట్ బుకింగ్‌లు, కాన్సిలేషన్లు చేసుకోవడం వీలుపడదని వెబ్‌సైట్‌లో నోట్ పెట్టింది. ‘‘తదుపరి గంట వరకు బుకింగ్, క్యాన్సిలేషన్లు చేసుకోవడం కుదరుదు.. ఈ అంతరానికి తీవ్ర విచారం వ్యక్తం చేస్తున్నాం.. క్యాన్సిలేషన్ లేదా టీడీఆర్ ఫైల్ చేయాలనుకుంటే కస్టమర్ కేర్ నెంబర్లు 14646,08044647999, 08035734999ను లేదా etickets@irctc.co.inకు మెయిల్ ద్వారా సంప్రదించాలి’’ అని సూచించింది.

అయితే, ఇలా ఐఆర్‌సీటీసీ వెబ్‌సైట్ డౌన్ కావడం ఈ నెలలో ఇది మూడోసారి కావడం గమనార్హం. డిసెంబరు 26న ఏకంగా గంటన్నర పాటు బుకింగ్స్ నిలిచిపోయాయి. అంతకు ముందు డిసెంబర్ 9 న కూడా వెబ్‌సైట్ రెండు గంటలపాటు నిలిచిపోయింది. దీంతో టిక్కెట్‌లను బుక్ చేసుకోవడంలో రైల్వే ప్రయాణికులు తీవ్ర ఇబ్బందులు ఎదుర్కొన్నారు. ప్రస్తుతం కూడా కొత్త ఏడాది సందర్బంగా టూర్ ప్లాన్ చేసుకున్నవారు.. జర్నీ కోసం టిక్కెట్ బుక్ చేసుకుందామంటే బుకింగ్స్ నిలిచిపోయాయి.

డౌన్‌డిటెక్టర్ ప్రకారం.. దాదాపు 47 శాతం మందికి వెబ్‌సైట్‌‌ యాక్సెస్ కాలేదు.. 42 శాతం మందికి యాప్, 10 శాతం మందికి టిక్కెట్ బుకింగ్ చేసుకోలేకపోయారు. ఉదయం 10 గంటల నుంచి అకౌంట్‌ లాగిన్ సమస్యలు, షెడ్యూల్, ఛార్జీలను సెర్చింగ్‌లు వంటి ఇబ్బందులను యూజర్లు ఎదుర్కొన్నారు. ఉదయం 9.48 గంటల వరకు ఐఆర్‌సీటీసీ వెబ్‌సైట్‌ ఇబ్బందులపై ఎటువంటి ఫిర్యాదు రాలేదు. సైట్‌లోని మెసేజ్ ప్రకారం ఒక గంటలో తిరిగి పునరుద్దరణ జరుగుతుందని పేర్కొన్నారు. కానీ, ఇది తత్కాల్ టిక్కెట్ బుకింగ్స్ సమయం కావడంతో యూజర్లకు అవకాశం లేకుండా పోయింది.

దీనిపై రైల్వేశాఖ ఎలాంటి అధికారిక ప్రకటన చేయలేదు. గతంలో రెండుసార్లు సైట్ డౌన్ అయినప్పుడు కూడా రైల్వే శాఖ ఎలాంటి సమాధానం ఇవ్వలేదు. కాగా, మూడు సందర్భాల్లోనూ తత్కాల్ టిక్కెట్లు ప్రారంభమయ్యే 10 నిమిషాల ముందే ఉదయం 9.50 గంటలకు డౌన్ కావడం విశేషం.