రోడ్డుపై వెళ్లే వారందరి చెంపలు వాయిస్తున్న యువకుడు.. వీడియో వైరల్!

మనకు ఎవరి మీదనైనా విపరీతమైన కోపం వచ్చినప్పుడే వారి చెంప పగులగొడతాం. కానీ చిన్న పిల్లలు అయితే సరదాకి అలా చెపంలు వాయిస్తుంటారు. కానీ మీరట్‌కు చెందిన ఓ యువకుడు మాత్రం రోడ్డుపై ఒంటరిగా వెళ్లే వారినే లక్ష్యంగా పెట్టుకుని వారి చెంపలు పగులగొడుతున్నాడు. ఇప్పటికే అనేక మంది చెంపలు వాయించిన ఇతడిని.. పోలీసులు పట్టుకుని అరెస్ట్ చేశారు. అయితే రోడ్డుపై వెళ్లే వారిని ఎందుకు కొడుతున్నాడో తెలుసుకుని షాక్ అయ్యారు. ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతోంది.

ఉత్తర ప్రదేశ్ మీరట్‌కు చెందిన 23 ఏళ్ల కపిల్ కుమార్ ఇటీవలే గ్రాడ్యుయేట్ పూర్తి చేశాడు. ఉద్యోగం కోసం కొంత కాలంగా ప్రయత్నాలు చేస్తున్నాడు. ఇదంతా బాగానే ఉండగా.. కపిల్ కుమార్ 5, 6 నెలల నుంచి కాస్త వింతగా ప్రవర్తిస్తున్నాడు. ముఖ్యంగా అతడు తన ద్విచక్రవాహనంపై రోడ్డుపైకి వెళ్లిన ప్రతీసారి ఒంటరిగా కనిపించిన వారందరి చెంపలపై కొడుతున్నాడు. ఇలా ఒక్కరు కాదు ఇద్దరు కాదు అనేక మంది చెంపలు వాయించాడు. అందులో కొంతమంది అతడిని తిట్టుకుని వదిలేయగా.. మరికొందరు మాత్రం పోలీసులను ఆశ్రయించారు.

ముగ్గురు బాధితులు స్థానిక పోలీసుల వద్దకు వెళ్లి రోడ్డుపై నడుచుకుంటూ వస్తుంటే ఓ యువకుడు తమను చెంపపై కొట్టాడని ఫిర్యాదు చేశారు. కేసు నమోదు చేసుకున్న పోలీసులు దర్యాప్తు చేసినప్పటికీ కపిల్ కుమార్ దొరకలేదు. అయితే తాజాగా కపిల్ కుమార్.. రిటైర్డ్ పీసీఎస్ ఆఫీసర్‌ను కొట్టాడు. అప్పటికే వృద్ధుడు కావడం.. బలంగా కపిల్ అతడిని కొట్టడంతో ఆయన కిందపడిపోయారు. ఆపై మెళ్లిగా లేచి నేరుగా పోలీస్ స్టేషన్‌కు వెళ్లారు. తనపై ఎవరో దాడి చేసినట్లు చెప్పారు. కేసు నమోదు చేసుకున్న పోలీసులు సంఘటనా స్థలానికి చేరుకున్నారు.

అక్కడ ఉన్న సీసీటీవీ కెమెరాల ద్వారా రిటైర్డ్ పీసీఎస్ ఆఫీసర్ చెంపపై కొట్టిందో ఎవరో తెలుసుకున్నారు. ఈక్రమంలోనే నిందితుడు కపిల్ కుమార్‌ను అరెస్ట్ చేశారు. గతంలో కూడా పలువురిపై నువ్వే ఇలా దాడులు చేశావా అంటూ పోలీసులు తమదైన స్టైల్‌లో విచారించగా... అతడు నేరం ఒప్పుకున్నాడు. ఈక్రమంలోనే పోలీసులు కపిల్‌ను అరెస్ట్ చేసినట్లు పోలీసులు అతడి కుటుంబ సభ్యులకు తెలిపారు. దీంతో షాకైన అతడి తల్లిదండ్రులు.. యువకుడి సమస్య గురించి పోలీసులకు వివరించారు.

ముఖ్యంగా ఐదేళ్ల క్రితం కపిల్ తండ్రి చనిపోవడంతో.. ఒంటరయ్యాడని అప్పటి నుంచి ఎక్కువగా ఎవరితోనూ మాట్లడట్లేదని అతడి తల్లి చెప్పింది. అలాగే తాను ఐదారు నెలల క్రితం రెండో పెళ్లి చేసుకున్నప్పటి నుంచి మరింత డిప్రెషన్‌కు గురయ్యాడని వివరించింది. ప్రస్తుతం తాను రెండో భర్తతో కలిసి సూరజ్ కుండ్‌లో ఉంటుండగా.. కపిల్ కూడా తమతోనే ఉంటున్నట్లు వివరించింది. అయితే తాను రెండో పెళ్లి చేసుకోవడంతో తమపై విపరీతమైన కోపం పెంచుకున్న కిపిల్.. దాన్ని రోడ్డుపై వెళ్తున్న వారిపై చూపించి ఉంటాడని అంటోంది.

మరోవైపు కపిల్‌యే నేరుగా.. తన చిన్నప్పటి నుంచి అందరూ తనను కొట్టేవారని, పిరికిపంద అంటూ ఎగతాళి చేసే వారని చెప్పాడు. అలా మనుషులపై కోపం పెరిగిపోవడం వల్లే తానిలా చేస్తున్నానని చెప్పుకొచ్చాడు. అతడి మానసిక పరిస్థితిని పరీశిలంచిన వైద్యులు.. కపిల్ ప్రస్తుతం "డోపమైన్ రష్" అనే సమస్యతో బాధ పడుతున్నట్లు వివరించారు. అతడికి చికిత్స చాలా అవసరం అని.. మరికొన్ని రోజులు అయితే ఇతడు తీవ్ర డిప్రెషన్‌కు గురై ఆత్మహత్య కూడా చేసుకునే అవకాశం ఉందని చెప్పుకొచ్చారు.