రెండు బస్సుల మధ్య ఇరుక్కుపోయిన వ్యక్తి.. నరకం అంచుల వరకూ వెళ్లి వెనక్కు

చాలా మంది రోడ్లపై నడుస్తున్నప్పుడు అనుకోకుండా ప్రమాదాల బారిన పడుతుంటారు. మనం సరైన దారిలోనే వెళ్లినా వచ్చే వాళ్లు చూసుకోకపోతే ఇక మన గతి అంతే. కానీ మనమే ఒక్కోసారి చూసుకోకుండా వెళ్లి ప్రమాదాలు కొని తెచ్చుకుంటాం. అలా చూసుకోకుండా వెళ్లినా అదృష్టవశాత్తు ప్రమాదం నుంచి బయటి పడితే.. అబ్బా బతికానురా సామీ అంటూ హాయిగా ఫీలవుతాం. అప్పటి వరకు పడిన భయమంతా క్షణాల్లో మర్చిపోతుంటాం. అలాంటి ప్రమాదాన్నే చూశాడో వ్యక్తి. ప్రస్తుతం నెట్టింట వైరల్ అవుతున్న ఆ వీడియోలో ఏముందో మనం ఇప్పుడు తెలుసుకుందాం.

తమిళనాడు రాష్ట్రంలోని పట్టుకొట్టాయ్స్‌లో ఓ బస్సు రోడ్డుపై వెళ్తుంది. అయితే రోడ్డు దాటేందుకు ఓ వ్యక్తి కాస్త ముందుకు వచ్చాడు. ఇంకాసేపైతే బస్సు వెళ్లిపోతుందనుకున్న క్షణంలో రోడ్డు మధ్యలోకి చేరుకున్నాడు. ఆ బస్సు వెళ్లిపోకముందే అటువైపు నుంచి మరో బస్సు వచ్చింది. సింగిల్ రోడ్డు కావడం... రెండు బస్సులు ఒకేసారి పక్క పక్కన ఉండడంతో రోడ్డు దాటబోయిన వ్యక్తి మధ్యలో ఆగిపోయాడు. రెండు చాలా దగ్గరగా రాగా.. సదరు వ్యక్తి ప్రమాదం నుంచి బయట పడడానికి చాలానే ప్రయత్నాలు చేశాడు.

కానీ అతడికి ఎటూ వెళ్లరాలేదు. విషయం గుర్తించిన డ్రైవర్లు సైతం ఏమీ చేయలేకపోయారు. దీంతో రెండు బస్సులూ ముందుకు వెళ్లగా.. వ్యక్తి కింద పడిపోయాడు. అతడిని దాటగానే బస్సులు రెండు ఆగిపోయాయి. అదృష్టవశాత్తు వ్యక్తికి ఎలాంటి గాయాలు కాలేదు. క్షణాల్లో నరకం అంచుల వరకూ వెళ్లి వచ్చి ప్రాణాలతో బయట పడేసరికి వ్యక్తి సహా బస్సుల్లో ప్రయాణిస్తున్న వారంతా ఊపిరి పీల్చుకున్నారు. అందరూ బస్సు దిగి ఆయన వద్దకు వెళ్లి చూశారు. అలాగే అటుగా వెళ్తున్న ద్విచక్రవాహనదారులు కూడా ఆగి మరీ బస్సు డ్రైవర్లతో గొడవకు దిగారు.

ప్రస్తుతం ఈ వీడియో నెట్టింట వైరల్ అవుతోంది. ఇది చూసిన ప్రతీ ఒక్కరూ ఒక్కోలా కామెంట్లు చేస్తున్నారు. కాస్త చూసుకుని రోడ్డు దాటండి బ్రో అని కొందరు.. యమధర్మరాజుకు హాయ్ చెప్పి వచ్చావుగా అంటూ తమ మనసులోని భావాలను కామెంట్ల రూపంలో వెల్లడిస్తున్నారు.