రాయితీపై పెట్రోల్, డీజిల్.. వారికి మాత్రమే.. అర్హతలు, దరఖాస్తు వివరాలివే

రాష్ట్ర ప్రజల కోసం అనేక సంక్షేమ పథకాలు అమలు చేస్తున్న ఏపీ ప్రభుత్వం మరో కీలక నిర్ణయం తీసుకుంది. ఎన్టీఆర్ భరోసా పేరుతో సామాజిక భద్రతా పింఛన్ల పెంపు వంటి సంక్షేమ పథకాలను అమలు చేస్తూ.. వృద్ధులు, దివ్యాంగులకు అండగా నిలుస్తున్న ఆంధ్రప్రదేశ్ ప్రభుత్వం.. దివ్యాంగులకు ఇప్పుడు మరో తీపికబురు వినిపించింది. ప్రైవేట్ ఉద్యోగాలు చేయటంతో పాటుగా, స్వయం ఉపాధి పొందుతున్న దివ్యాంగులకు రాయితీపై పెట్రోల్, డీజిల్ అందించాలని ఏపీ ప్రభుత్వం నిర్ణయించింది. వీరికి 50 శాతం రాయితీతో పెట్రోల్, డీజిల్ అందించనున్నారు.

మరోవైపు ఈ పథకం కింద లబ్ధిపొందడానికి అర్హులైన దివ్యాంగులు జిల్లాలలోని వయో వృద్ధులు, ప్రత్యేక ప్రతిభావంతుల సంక్షేమ శాఖ కార్యాలయంలో దరఖాస్తులు సమర్పించాల్సి ఉంటుందని అధికారులు చెప్తున్నారు. ప్రైవేట్ ఉద్యోగాలు చేసే దివ్యాంగులతో పాటుగా, స్వయం ఉపాధి కోసం మూడుచక్రాల మోటార్ సైకిల్ ఉపయోగించే దివ్యాంగులు ఈ పథకానికి అర్హులుగా నిర్ణయించారు. వీరికి వాహనానికి వినియోగించే డీజిల్, పెట్రోల్‌ ఖర్చులో ఆంధ్రప్రదేశ్ ప్రభుత్వం 50 శాతం రాయితీ ఇస్తోంది. ఈ రాయితీ మొత్తాన్ని లబ్ధిదారుల బ్యాంకు ఖాతాల్లో జమచేస్తారు.

అయితే ఇక్కడ కూడా కొన్ని నిబంధనలు, షరతులు ఉన్నాయని అధికారులు చెప్తున్నారు. లబ్ధిదారులు ఇంటి నుంచి పనిచేసే ప్రదేశానికి వెళ్లే దూరానికి మాత్రమే.. పెట్రోల్, డీజిల్ రాయితీ ఇవ్వనున్నారు. అలాగే 2 హెచ్‌పీ ఇంజన్ సామర్థ్యం కలిగిన వాహనాలకు నెలకు 15 లీటర్లు వరకూ, అంతకంటే ఎక్కువ సామర్థ్యం ఉంటే 25 లీటర్ల వరకు రాయితీ ఇవ్వనున్నట్లు అధికారులు చెప్తున్నారు. అలాగే దారిద్య్ర రేఖకు దిగువన ఉన్న దివ్యాంగులకు మాత్రమే ఈ పథకం అమలు చేయనున్నారు.

మరోవైపు 2014లోనే టీడీపీ ప్రభుత్వం ఈ కార్యక్రమాన్ని అమలు చేసింది. అప్పట్లోనే దివ్యాంగులకు పెట్రోల్, డీజిల్ రాయితీపై అందించారు. అయితే 2019 ఎన్నికల్లో టీడీపీ ఓడిపోవటంతో ఈ పథకానికి గ్రహణం పట్టింది. ఈ ఎన్నికల్లో గెలిచి అధికారంలోకి వచ్చిన వైసీపీ.. ఈ పథకంపై నిర్లక్ష్యం వహించింది. నామమాత్రంగా అమలు చేశారు. దీంతో మొన్నటి ఎన్నికల్లో గెలిచి తిరిగి అధికారంలోకి వచ్చిన టీడీపీ.. ఈ కార్యక్రమంపై దృష్టిపెట్టింది. దివ్యాంగులకు లబ్ధి చేకూరేలా దీనిని అమలు చేయాలని అధికారులను ఆదేశించింది.