సైఫ్ అలీఖాన్ ఆరోగ్య బీమా పత్రం లీక్.. ఎంత క్లెయిమ్ చేశారు, ఏరోజు డిశ్చార్జ్ కాబోతున్నారంటే?

బాలీవుడ్ స్టార్ నటుడు సైఫ్ అలీఖాన్‌పై గురువారం రోజు దాడి జరిగిన విషయం అందరికీ తెలిసిందే. ఓ ఆగంతకుడు ఇంట్లోకి చొరబడి కోటి రూపాయలు డిమాండ్ చేస్తూ.. సైఫ్‌పై ఆరు సార్లు కత్తితో దాడి చేశాడు. అయితే తీవ్ర గాయాలపాలైన అతడిని కుటుంబ సభ్యులు ఓ ఆటోలో ఆస్పత్రికి తరలించారు. ఈక్రమంలోనే లీలావతి ఆస్పత్రి వైద్యులు అతడికి శస్త్ర చికిత్స చేసి వెన్నుపూసకు దగ్గర్లో ఇరుక్కుపోయిన కత్తి ముక్కను తొలగించారు. అలాగే రెండు చోట్ల ప్లాస్టిక్ సర్జరీ కూడా నిర్వహించారు. ప్రస్తుతం ఆయన ఆరోగ్య పరిస్థితి నిలకడగానే ఉన్నట్లు వైద్యులు వెల్లడించారు. అయితే తాజాగా సైఫ్‌కు సంబంధించిన ఆరోగ్య బీమా పథకం డాక్యుమెంట్ నెట్టింట వైరల్ అవుతోంది. ఆ పూర్తి వివరాలు ఏంటో మనం ఇప్పుడు తెలుసుకుందాం.

శుక్రవారం రోజు సైఫ్ అలీఖాన్‌కు సంబంధించిన ఆరోగ్య బీమా పథకం ఎక్స్ వేదికగా లీకైంది. దీన్ని చూసిన నెటిజెన్లు పెద్ద ఎత్తున షేర్ చేయగా.. హీరో హెల్త్ ఇన్సూరెన్స్ డాక్యుమెంట్ సోషల్ మీడియాలో వైరల్‌గా మారింది. ఈ డాక్యుమెంట్ ప్రకారమే.. సైఫ్ అలీఖాన్ నివా బుపా ఆరోగ్య బీమా పాలసీదారుగా తెలుస్తోంది. అయితే ఆయన తన చికిత్స కోసం రూ.35,98,700 లక్షలు క్లెయిమ్ చేయగా.. బీమా సంస్థ ఇప్పటికే రూ.25 లక్షలను అప్రూవ్ చేసింది. ముఖ్యంగా ఇందులో మెంబర్ ఐడీ, రోగ నిర్ధారణ వివరాలు, గది వర్గం సహా అనేక వివరాలు ఉన్నాయి.

ముఖ్యంగా సైఫ్ 16వ తేదీన ఆస్పత్రిలో అడ్మిట్ అయినట్లు ఉండగా.. అలాగే ఏరోజు ఆస్పత్రి నుంచి డిశ్ఛార్జీ కాబోతున్నారో కూడా ఉంది. జనవరి 21వ తేదీ రోజు అంటే మరో మూడు రోజుల్లోనే ఆయన డిశ్ఛార్జీ అయ్యే అవకాశం ఉన్నట్లు అందులో తెలిపారు. మొత్తం 5 రోజుల పాటు ఆస్పత్రిలో చికిత్స పొందుతున్నట్లు వివరించారు. అయితే నెట్టింట వైరల్ అవుతున్న ఈ బీమా డాక్యుమెంట్ చూసిన ప్రతీ ఒక్కరూ ఒక్కో విధంగా స్పందిస్తున్నారు. సెలబ్రిటీ కాబట్టి ఇంత త్వరగా డబ్బులు అప్రూవ్ చేశారని కొందరు.. అసలు ఇలాంటి విషయాలు ఎలా లీక్ చేయగల్గుతారంటూ మరికొంత మంది ఆగ్రహం వ్యక్తం చేస్తున్నారు. అయితే దీనిపై సైఫ్ కుటుంబ సభ్యులు అధికారికంగా ఎలాంటి ప్రకటనా చేయలేదు.

ఇదంతా ఇలా ఉండగా.. సైఫ్‌పై దాడి చేసిన నిందితుడి గురించి పోలీసులు ఇంకా గాలిస్తూనే ఉన్నారు. శుక్రవారం రోజు ఓ నిందితుడిని అదుపులోకి తీసుకున్న పోలీసులు అతడు అసలైన నేరస్థుడు కాదని తేల్చారు. ముఖ్యంగా సైఫ్ ఇంటి వద్ద ఎలాంటి నిఘా కెమెరాలు లేవని.. ఈక్రమంలోనే నిందితుడిని పట్టుకోవడం సవాలుగా మారిందని తెలిపారు. ఇకపైనైనా సెలబ్రిటీలు అందరూ చాలా జాగ్రత్తగా ఉండాలని.. ఇళ్ల వద్ద కనీస భద్రతా చర్యలు తీసుకోవాలని సూచిస్తున్నారు. చూడాలి మరి ఈ కేసులో నిందితుడిని పోలీసులు ఎప్పుడు పట్టుకోగల్గుతారనేది.