విజయ్ హజారే ట్రోఫీ విజేత కర్ణాటక.. ఫైనల్‌లో 100% సక్సెస్‌ రేటు నమోదు

దేశవాళీలో ప్రతిష్టాత్మక వన్డే ట్రోఫీ విజయ్‌ హజారే ట్రోఫీని కర్ణాటక చేజిక్కించుకుంది. శనివారం (జనవరి 18) వడోదర వేదికగా జరిగిన ఫైనల్‌లో 36 పరుగుల తేడాతో విదర్భను ఓడించింది. దీంతో ఐదోసారి ఈ టైటిల్‌ను సాధించింది. ఈ టోర్నీ చరిత్రలో ఐదు సార్లు ఫైనల్‌ చేరిన కర్ణాటక.. వంద శాతం సక్సెస్‌ రేటుతో 5 టైటిళ్లు కైవసం చేసుకోవడం విశేషం. ఈ టోర్నీలో ఆద్యంతం పరుగుల వరద పారించిన కెప్టెన్ కరుణ్‌ నాయర్‌కు ప్లేయర్ ఆఫ్‌ ది సిరీస్ అవార్డు దక్కింది.

ఈ మ్యాచ్‌లో తొలుత బ్యాటింగ్‌ చేసిన కర్ణాటక జట్టు నిర్ణీత 50 ఓవర్లలో 6 వికెట్ల నష్టానికి 348 పరుగులు చేసింది. ఓపెనర్లు మయాంక్ అగర్వాల్ (32), పడిక్కల్‌ (8)తో పాటు అనీశ్ (21) స్వల్ప స్కోరుకే ఔట్ కావడంతో కర్ణాటక కష్టాల్లో పడింది. ఓ దశలో 67 పరుగులకే మూడు వికెట్లు కోల్పోయింది.

ఈ దశలో సమరన్‌ రవిచంద్రన్‌ (92 బంతుల్లో 101 రన్స్.. 7 ఫోర్లు, 3 సిక్స్‌లు)లతో చెలరేగిపోయాడు. అతడికి క్రిష్ణన్‌ శ్రీజిత్‌ (78), అభినవ్‌ మనోహర్‌ (79) చక్కటి సహకారం అందించారు. దీంతో కర్ణాటక భారీ స్కోరు చేసింది. 50 ఓవర్లలో 6/348 రన్స్ చేసింది. విదర్భ బౌలర్లలో భూట్లే, దర్శన్‌ చెరో 2 వికెట్లు పడగొట్టగా యశ్‌ ఠాకూర్‌, యశ్‌ కాదం ఒక్కో వికెట్ తీశారు.

అనంతరం భారీ లక్ష్యంతో బరిలోకి దిగిన విదర్భకు ఓపెనర్‌ ధ్రువ్ షోరే మెరుపు ఆరంభాన్ని ఇచ్చాడు. బంతికో పరుగు చొప్పున చేస్తూ.. సెంచరీ పూర్తి చేశాడు. అయితే సహచర ఆటగాళ్ల నుంచి అతడికి సహకారం లభించలేదు. ఈ టోర్నీలో విశేషంగా రాణించిన కెప్టెన్ కరుణ్ నాయర్‌ 31 బంతుల్లో 27 రన్స్ చేసి ఔట్ అయ్యాడు.

చివర్లో హర్ష్‌ దూబే (30 బంతుల్లో 63 రన్స్‌) నిలబడ్డా.. ఓటమి అంతరాన్ని మాత్రమే తగ్గించగలిగాడు తప్ప గెలిపించలేకపోయాడు. దీంతో చివరకు విదర్భ 48.2 ఓవర్లలో 312 పరుగులకు ఆలౌటైంది. కర్ణాటక బౌలర్లలో వాసుకి కౌశిక్, ప్రసిద్ధ్ కృష్ణ, అభిలాష్ శెట్టిలు మూడేసి వికెట్ల చొప్పున తీశారు. హార్దిక్ రాజ్‌కు ఒక వికెట్ దక్కింది. ఈ టోర్నీలో విశేషంగా రాణించిన కరుణ్ నాయర్.. టైటిల్‌కు చివరి మెట్టుపై బోల్తా పడ్డాడు. మొత్తంగా ఈ టోర్నీలో 389.5 సగటుతో అతడు 779 రన్స్ చేశాడు. దీంతో ప్లేయర్ ఆఫ్ ది సిరీస్‌గా ఎంపికయ్యాడు.