సైఫ్ అలీఖాన్‌పై దాడి కేసులో ఇద్దరు లాయర్ల గొడవ.. కోర్టులోనే రచ్చ చేయడంతో జడ్జి ఏం చేశారంటే?

డిసెంబర్ 16వ తేదీ రోజు వేకువజామున 2.30 గంటలకు బాలీవుడ్ స్టార్ హీరో సైఫ్ అలీఖాన్‌పై దాడి జరిగిన విషయం అందరికీ తెలిసిందే. అయితే కోటి రూపాయలు డిమాండ్ చేస్తూ.. హీరోపై ఓ నిందితుడి దాడికి పాల్పడ్డ మూడ్రోజుల తర్వాత పోలీసులు నిందితుడిని అరెస్ట్ చేశారు. ఆపై ముంబయి మేజిస్ట్రేట్ కోర్టులో హాజరు పరిచారు. అయితే నిందితుడి తరఫున వాదించేందుకు బంగ్లాదేశ్‌కు చెందిన ఇద్దరు న్యాయవాదులు పోటీ పడ్డారు. కోర్టులోనే వీరు గొడవ పడగా.. వీరి వాగ్వాదాన్ని గుర్తించిన జడ్జి మధ్యలో కల్గజేసుకుని వారిని ఆపారు. ఆపై ఏం చేశారో మనం ఇప్పుడు తెలుసుకుందాం.

బాలీవుడ్ నటుడి సైఫ్ అలీఖాన్‌పై దాడికి పాల్పడిన నిందితుడు షరీఫుల్ ఇస్తాం షెహజాద్ మహమ్మద్ రోహిల్లా అమీన్ ఫకీర్‌ను ఆదివారం తెల్లవారుజామున పోలీసులు అరెస్ట్ చేశారు. బంగ్లాదేశ్‌కు చెందిన ఇతడిని థాణే అటవీ ప్రాంతంలో ఉన్న ఓ లేబర్ క్యాంపు వద్ద అదుపులోకి తీసుకున్న పోలీసులు.. అదేరోజు మధ్యాహ్నం ముంబై మెట్రోపాలిటన్ మేజిస్ట్రేట్ ముందు హాజరు పరిచారు. నిందితుడు షెహజాద్‌ను బోనులో నిలబెట్టగా.. పోలీసులపై ఏమైనా ఫిర్యాదులు ఉన్నాయా అని నిందితుడిని అడిగారు న్యాయమూర్తి. అయితే ఇందుకు నిందితుడు షెహజాద్ ప్రతికూలంగా సమాధానం ఇచ్చినట్లు సమాచారం.

అయితే దీని తర్వాత నిందితుడి తరఫున ఎవరు వాదించాలనే విషయంలో ఇద్దరు న్యాయవాదులు గొడవ పడ్డారు. ముందుగా ఓ లాయర్ నిందితుడి వద్దకు వెళ్లి అతడి తరఫున వాదించేందుకు వకాలత్ పత్రంపై సంతకం చేస్తుండగా.. మరో న్యాయవాది కూడా అక్కడకు వచ్చాడు. ఈ కేసును తానే వాదిస్తానంచూ చెప్పాడు. ముందు వచ్చిన లాయర్ కూడా వెనక్కి తగ్గకపోవడంతో ఇద్దరి మధ్య వాగ్వాదం చోటు చేసుకుంది. కోర్టులో అంతా చూస్తుండగానే లాయర్లు ఇద్దరూ గొడవ పడడంతో.. న్యాయమూర్తి కల్గజేసుకున్నారు.

ఇలా మీరిద్దరూ గొడవ పడాల్సిన అవసరం లేదని చెబుతూనే.. ఇద్దరూ కలిసే నిందితుడి తరఫున వాదనలు వినిపించవచ్చని వివరించారు. అయితే ఇందుకు ఇద్దరు లాయర్లు కూడా ఓకే చెప్పడంతో వీరి గొడవ ముగిసిపోయింది. ప్రస్తుతం నిందితుడు షెహజాద్ తరఫును ఇద్దరు బంగ్లాదేశ్ న్యాయవాదులు వాదనలు వినిపించబోతున్నారు.

ఇదంతా ఇలా ఉండగా.. న్యాయస్థానం నిందితుడికి ఐదు రోజుల పోలీస్ కస్టడీని విధించింది. ఈ దాడి వెనుక అంతర్జాతీయ కుట్ర ఏదైనా ఉందా అన్న కోణంలో కేసు దర్యాప్తు చేస్తున్నారు. బంగ్లాదేశ్ నుంచి 5 నెలల క్రితమే భారత్‌కు అక్రమంగా వచ్చిన నిందితుడు తన పేరును విజయ్ దాస్‌గా మార్చుకున్నాడు. ఈక్రమంలోనే డబ్బుల కోసం డిసెంబర్ 16వ తేదీన సైఫ్ అలీఖాన్ ఇంట్లోకి ప్రవేశించి హీరోపై దాడికి పాల్పడ్డాడు.