అమెరికాలో ఉంటున్న 18 వేల మంది భారతీయులను వెనక్కి తీసుకురాబోతున్న ఇండియా

అగ్రరాజ్యం అమెరికా 47వ అధ్యక్షుడిగా ఇటీవలే పదవీ బాధ్యతలు చేపట్టిన డొనాల్డ్ ట్రంప్.. చాలా దూకుడుగా వ్యవహరిస్తున్నారు. మొదటి రోజు నుంచి అనేక నిర్ణయాత్మక చర్యలు తీసుకుంటూ.. కఠినంగా వ్యవహరిస్తున్నారు. ముఖ్యంగా అమెరికా ఫస్ట్ నినాదంతో.. తమ దేశంలో ఉంటున్న అక్రమ వలసదారులను తిరిగి వారి దేశాలకు పంపించేందుకు అనేక చర్యలు చేపట్టారు. ఈ విషయం తెలుసుకున్న భారత్.. ముందస్తు చర్యల్లో భాగంగా అమెరికాలో అక్రమంగా నివసిస్తోన్న 18 వేల మంది భారతీయులను తిరిగి ఇండియా తీసుకు వచ్చేందుకు ప్రణాళికలు రచిస్తోంది. ఆ పూర్తి వివరాలు మీకోసం.

రెండ్రోజుల క్రితమే అమెరికా అధ్యక్ష పదవీ బాధ్యతలు చేపట్టిన డొనాల్డ్ ట్రంప్.. తమ దేశంలో ఉన్న అక్రమ వలసదారులను తిరిగి వారి దేశాలకు పంపించేందుకు పెద్ద ఎత్తున చర్యలు చేపట్టారు. ఆయా దేశాల నుంచి దిగుమతి చేసుకుంటున్న వస్తువులపై అధిక పన్ను విధిస్తున్నారు. ముఖ్యంగా మెక్సికో, కెనడా నుంచి ఎక్కువ మంది తమ దేశంలోకి అక్రమంగా వలస వచ్చారని చెబుతూనే.. ఫిబ్రవరి ఒకటో తేదీ నుంచి ఆ రెండు దేశాలపై 25 శాతం సుంకాలు విధించాలని భావిస్తున్నట్లు వెల్లడించారు.

ఈక్రమంలోనే భారత్ మందుస్తు చర్యలు తీసుకుంటోంది. అమెరికాతో సత్సంబంధాలను కల్గిన ఇండియా.. వాటిని కొనసాగించాలని భావిస్తోంది. ముఖ్యంగా ట్రంప్ పరిపాలనకు సహకరించేలా నిర్ణయాలు తీసుకునేందుకు సిద్ధం అయింది. అమెరికాలో అక్రమంగా నివసిస్తున్న తమ పౌరులను స్వదేశానికి రప్పించేందుకు భారత్ యోచిస్తున్నట్లు సమాచారం. ఇప్పటి వరకు సరైన పత్రాలు లేకుండా దాదాపు 18 వేల మంది అమెరికాలో ఉన్నట్లు కేంద్రం గుర్తించింది.

అయితే ఈ సంఖ్య కంటే చాలా ఎక్కువ మందే యూఎస్‌లో ఉండొచ్చని కేంద్ర ప్రభుత్వం భావిస్తూనే.. 2022 నాటికి అమెరికాలో దాదాపు 2 లక్షల 20 మంది భారతీయులు అక్రమంగా వలస వెళ్లారని గుర్తు చేసింది. ఈ విషయాన్ని డిపార్ట్‌మెంట్ ఆఫ్ హోమ్‌ ల్యాండ్ సెక్యూరిటీ తెలిపిందని చెప్పింది. ఇలాంటి అక్రమ వలదారులు అందరినీ గుర్తించేందుకు ఓ సమగ్ర ప్రణాళికను రూపొందిస్తున్నామని.. వారందరినీ తిరిగి భారత దేశానికి తీసుకు వచ్చేందుకు ఏర్పాట్లు చేస్తున్నామని వివరించింది.

అమెరికాలో ఉంటున్న అక్రమ వలసదారులను తిరిగి భారత్ రప్పిస్తే.. ఇండియా నుంచి యూఎస్‌కు వెళ్లే చట్టబద్ధమైన వలసలకు మరిన్ని మార్గాలను సృష్టించ వచ్చని భారత విదేశాంగ శాఖ ప్రతినిధి రణధీర్ జైస్వాల్ అన్నారు. ముఖ్యంగా అమెరికా ఛార్టెడ్ విమానాల ద్వారా అక్రమ వలసదారులైన భారతీయులను తిరిగి ఇండియా పంపేందుకు సహకరిస్తోందని తెలిపారు.