కుంభమేళా మోనాలిసాకు.. రిటైర్డ్ ఆర్మీ జవాన్ కుమార్తెగా

మహా కుంభమేళాలో మోనాలిసా భోస్లే అనే రుద్రాక్షలు, పూసల దండలు అమ్ముకునే 16 ఏళ్ల అమ్మాయి అందరి దృష్టిని ఆకర్షించిన విషయం తెలిసిందే. ఈ క్రమంలోనే గత కొన్ని రోజులుగా సోషల్ మీడియాలో, మీడియాలో ఎక్కడ చూసినా మోనాలిసా ఫోటోలు, వీడియోలే వైరల్ అవుతున్నాయి. దీంతో దేశవ్యాప్తంగా ఆమె ఓవర్‌నైట్‌లో ఫేమస్ అయింది. మోనాలిసా కోసం జనం ఎగబడటంతో ఆమె తన స్వస్థలం అయిన మధ్యప్రదేశ్‌లోని ఇండోర్‌కు వెళ్లిపోయింది. ఈ నేపథ్యంలోనే ఆమె వైరల్ కావడంతో మోనాలిసాకు సినిమా ఆఫర్ వచ్చింది.

తన తర్వాతి సినిమాలో ఛాన్స్ ఇస్తానని డైరెక్టర్ సనోజ్ మిశ్రా వెల్లడించారు. "ది డైరీ ఆఫ్ వెస్ట్ బెంగాల్" సినిమా తీస్తున్న డైరెక్టర్ సనోజ్ మిశ్రా.. తన తదుపరి సినిమా అయిన "ది డైరీ ఆఫ్ మణిపూర్" తీయనున్నారు. ఆ సినిమాలో మోనాలిసాకు ఒక మంచి క్యారెక్టర్ ఇవ్వనున్నట్లు పేర్కొన్నారు. త్వరలో మోనాలిసాను కలిసి.. ఆమెతో సినిమా తీసేందుకు సనోజ్ మిశ్రా ఒప్పందంపై సంతకం చేయించుకోనున్నారు. ఇక ఇప్పటికే మోనాలిసా తండ్రితో సనోజ్ మిశ్రా ఫోన్‌లో మాట్లాడారు.

చాలా సెన్సిటివ్ సినిమాలను తీసిన సనోజ్ మిశ్రా.. తన తర్వాతి చిత్రంలో మోనాలిసాకు ఒక రోల్‌ను ఆఫర్ చేయడం గురించి జనవరి 19వ తేదీన తొలిసారి ట్వీట్ చేశారు. ఆ తర్వాత మోనాలిసా క్రేజ్ మరింత పెరిగిపోయింది. ఇక సినిమాల్లో నటించాలనుకుంటున్నారా అని మోనాలిసాను ఇటీవల ఓ ఇంటర్వ్యూలో అడిగినప్పుడు.. అది తన చిన్ననాటి కల అని చెప్పడం గమనార్హం.

ఇక "ది డైరీ ఆఫ్ మణిపూర్" సినిమాలో ఇప్పుడు మోనాలిసా లాగే సాధారణ అమ్మాయి పాత్రను పోలి ఉంటుందని సనోజ్ మిశ్రా తెలిపారు. మణిపూర్‌కు చెందిన రిటైర్డ్ ఆర్మీ సైనికుడి కుమార్తె పాత్రలో ఆమె నటించనున్నట్లు పేర్కొన్నారు. అయితే ఆ అమ్మాయికి సైన్యంలో చేరాలని కలగంటుందని.. ఆ కలను నెరవేర్చుకోవడానికి ఆమె ఎలాంటి సమస్యలను ఎదుర్కొంటుంది.. ఆ ప్రయాణంలో ఆమెకు ఎలాంటి కష్టాలు ఎదురయ్యాయి.. వాటన్నింటినీ దాటుకుని ఆమె తన కలను ఎలా నెరవేర్చుకోగలుగుతుంది అనేదే "ది డైరీ ఆఫ్ మణిపూర్" సినిమా స్టోరీ అని సనోజ్ మిశ్రా వెల్లడించారు. మోనాలిసాకు తమ టీమ్ యాక్టింగ్‌ నేర్పుతుందని సనోజ్ మిశ్రా చెప్పారు. ఆమెను తన స్టూడియోకి పిలిపించి.. ట్రైనింగ్ ఇవ్వనున్నట్లు పేర్కొన్నారు.