"ఆపరేషన్ డెవిల్ హంట్" ,,,బంగ్లాదేశ్‌లో 1308 మంది అరెస్ట్

బంగ్లాదేశ్‌ మాజీ ప్రధాన మంత్రి షేక్ హసీనా కోసం అల్లర్లు సృష్టిస్తున్న వారిని అరెస్ట్ చేసేందుకు తాజాగా "ఆపరేషన్ డెవిల్ హంట్"ను ప్రారంభించింది. దేశ వ్యాప్తంగా అల్లర్లు, విధ్వంసం సృష్టిస్తున్నారంటూ ఇప్పటికే 1308 మందిని అరెస్ట్ చేసింది అక్కడి తాక్కాలిక సర్కారు. ఢాకా శివార్లలోని అవామీ లీగ్ నాయకురాలైన మాజీ ప్రధాని షేక్ హసీనా నివాసంపై ఇటీవలే దాడి జరిగింది. బంగబంధు షేక్ ముజిబుర్ హర్మాన్ స్మారక భవనంపై కూడా దాడికి పాల్పడ్డారు. దీంతో భవనం, మ్యూజియం పూర్తి ధ్వంసం అయ్యాయి.

ఈక్రమంలోనే అనేక మంది విద్యార్థులు, కార్యకర్తలు తీవ్రంగా గాయపడ్డారు. ప్రజల అంతా కాస్త శాంతియుతంగా వ్యవహరించాలంటూ బంగ్లాదేశ్ తాత్కాలిక ప్రభుత్వాధినేత మహమ్మద్ యూనస్ కూడా విజ్ఞప్తి చేశారు. అయినప్పటికీ ఓ మంత్రిపై కూడా దాడి జరిగింది. అయితే ఇదంతా చేసిందే ఒకటే గ్యాంగ్ అని తెలుసుకున్న అధికారులు.. ఈ "ఆపరేషన్ డెవిల్ హంట్"ను ప్రారంభించారు. ముఖ్యంగా గాజీపూర్ నుంచి మొదలు పెట్టి దేశ వ్యాప్తంగా దీన్ని కొనసాగిస్తామని చెప్పారు. సైన్యం, పోలీసులు, ప్రత్యేక విభాగాలు ఈ ఆపరేషన్ కొనసాగిస్తుండగా.. మొదటి 24 గంటల్లోనే 274 మందిని అరెస్ట్ చేశారు.

శుక్రవారం రాత్రి గాజీపూర్‌లోని దక్షిణ్ ఖాన్ ప్రాంతంలో హింస చెలరేగింది. మాజీ యుద్ధ వ్యవహారాల మంత్రి మొజమ్మెల్ హక్ ఇంటిపై మూకలు దాడి చేయగా.. 14 మంది గాయపడ్డారు. అయితే నిరసనకారులు అంతా అవామీ లీగ్ చిహ్నాలను లక్ష్యంగా చేసుకుని దాడులకు పాల్పడ్డారు. ఈక్రమంలోనే కార్యకర్తలు ఎదురు దాడి చేశారు. విషయం గుర్తించిన పోలీసులు 81 మంది అవామీ లీగ్ కార్యకర్తలను అరెస్ట్ చేశారు.

అదే రోజు సాయంత్రం డిప్యూటీ కమిషనర్ కార్యాలయం బయట ఓ విద్యార్థిని కాల్చి చంపారు. దీనికి ప్రతిస్పందనగా హింసను ఖండిస్తూ.. విద్యార్థి ఉద్యమం గాజీపూర్‌లో ఒక రోజు నిరసనను నిర్వహించింది. ఈక్రమంలోనే సర్కారు గట్టి చర్యలు తీసుకుని హింసకు పాల్పడుతున్న వారిని అరెస్ట్ చేస్తూ వస్తోంది. ఈ దాడులకు బాధ్యులైన వారిని ఇప్పటికే చాలా మందిని అరెస్ట్ చేయగా.. మిగతా వాళ్లను కూడా త్వరలోనే అదుపులోకి తీసుకుంటామని చెబుతోంది.

అవామీ లీగ్ మద్దతుదారులను కావాలనే సర్కారు ఆపరేషన్ డెవిల్ హంట్ పేరిట అరెస్టులు చేస్తుందంటూ పెద్ద ఎత్తున విమర్శలు వస్తుండగా.. బంగ్లా హోంమంత్రి వీటిని తోసి పుచ్చారు. డెవిల్ అంటే దేశ వ్యతిరేక శక్తులు అని అర్థమని.. దేశంలో విధ్వంసం, అల్లర్లు సృష్టిస్తూ చట్టాన్ని ఉల్లంఘించే వారే లక్ష్యంగా ఈ ఆపరేషన్ కొనసాగుతుందని వివరించారు.