వాలెంటైన్స్ డే స్పెషల్... సర్‌ప్రైజ్ కాదిది అంతకు మించి

దేశ రాజధాని ఢిల్లీ శివారు ప్రాంతమైన హర్యానాలోని గురుగ్రామ్‌కు చెందిన 24 ఏళ్ల ఆయుషి రావత్.. యష్ సంఘ్వీలు ఒకరినొకరు ప్రేమించుకున్నారు. కొంత కాలం పాటు చట్టాపట్టాలేసుకుని తిరిగిన వీరు ఈ మధ్యే బ్రేకప్ చెప్పుకున్నారు. అప్పటి నుంచి ఒకరితో ఒకరు మాట్లాడుకోవట్లేదు. అయితే ఫిబ్రవరి 14వ తేదీ శుక్రవారం రోజు ప్రేమికుల దినోత్సవం కాగా.. ఆయుషి రావత్ మాజీ ప్రియుడికి ఓ అద్భుతమైన బహుమతిని పంపించింది.

ఎవరూ ఊహించని విధంగా.. ఒకటి కాదు రెండు కాదు ఏకంగా 100 పిజ్జాలు అతడి ఇంటికి పంపించింది. ఓ అపార్ట్‌మెంట్‌లో ఫ్లాట్ అద్దెకు తీసుకుని ఉంటున్న యష్ సంఘ్వీ ఇంటి కాలింగ్ బెల్ మోగగా అక్కడకు వెళ్లాడు. తలుపులు తీయగానే 100 పిజ్జా బాక్సులు కనిపించగా చూసి షాక్ అయ్యాడు. ఇవన్నీ ఏంటని ఆరా తీయగా.. ఆయుషి రావత్ ఆర్డర్ పెట్టారని చెప్పారు. దీంతో ముందు షాక్ అయినా తనతో మాట్లాడాలనే ప్రేయసి ఇలా చేసిందేమో అనుకున్నాడు. కానీ క్షణం కాకముందే.. డెలివరీ ఏజెంట్ డబ్బులు చెల్లించాలని చెప్పాడు.

అదేంటని సంఘ్వీ ప్రశ్నించగా.. అవన్నీ క్యాష ఆన్ డెలివరీ ఆప్షన్‌తో ఆర్డర్ చేశారని చెప్పాడు. దీంతో ఆశ్చర్యపోయిన యష్ సింఘ్వీ.. అవన్నీ నాకొద్దు డబ్బులు చెల్లించనని అన్నాడు. కానీ డెలివరీ ఏజెంట్ మాత్రం లేదు కచ్చితంగా చెల్లించాల్సిందేనంటూ వాదించాడు. దీంతో వీరిద్దరి మధ్య గొడవ జరిగింది. నాకేం సంబంధం లేదు.. మీరే తెచ్చారు మీరే తీసుకెళ్లమని యష్ సింఘ్వీ తేల్చి చెప్పాడు. ఈక్రమంలోనే పలువురు దీన్ని వీడియోగా తీశారు. ఆపై సోషల్ మీడియాలో పెట్టారు. దీంతో ఇవి కాస్తా నెట్టింట వైరల్ అయ్యాయి.

ఇవి చూసిన ప్రతీ ఒక్కరూ.. భలే రివెంజ్ తీర్చుకుంది భయ్యా నీ మాజీ ప్రేయసి అంటూ కామెంట్లు చేస్తున్నారు. కొందరేమో.. ఇలా ఆహారాన్ని వృథా చేయడం సరైన పద్దతి కాదని వివరిస్తున్నారు. మరికొందరేమో ఇది కావాలని చేసిన స్టంట్ అని.. మార్కెటింగ్ వ్యూహం ఉంటూ చెప్పుకొస్తున్నారు. ఇంత పెద్ద మొత్తంలో ఆర్డర్లను క్యాష్ ఆన్ డెలివరీపై ఎవరూ తీసుకురారని అంటున్నారు. అసలు నిజం ఏంటనేది మాత్రం ఎవరికీ తెలియదు.