వాలంటైన్స్ డేకి లలిత్ మోదీ కొత్త లవ్ స్టోరీ

క్రికెట్ గురించి తెలిసిన వాళ్లకి దాదాపు లలిత్ మోదీ పేరు గుర్తుండే ఉంటుంది. ఇండియన్ ప్రీమియర్ లీగ్ (ఐపీఎల్) సృష్టికర్త, మాజీ ఛైర్మన్ లలిత్ మోదీ మళ్లీ ప్రేమలో పడ్డాడు. వాలంటైన్స్ డే నాడు తన కొత్త ప్రేయసిని నెటిజన్లకు పరిచయం చేస్తూ ఇన్‌స్టాగ్రామ్‌లో పోస్ట్ చేశాడు. పాతికేళ్ల స్నేహం ఇప్పుడు ప్రేమ బంధంగా వికసించిందంటూ సినిమాటిక్ స్టయిల్‌లో క్వోట్ చేశాడు.

అదృష్టం ఒక్కసారే వరిస్తుందని అంటారు.. కానీ నాకు రెండుసార్లు వచ్చింది. 25 సంవత్సరాల స్నేహం ఇప్పుడు ప్రేమగా మారింది. ఇది రెండోసారి. ఇలా మీ జీవితాల్లో కూడా జరగాలని కోరుకుంటున్నాను. అందరికీ ప్రేమికుల దినోత్సవ శుభాకాంక్షలు అంటూ లలిత్ మోదీ ఇన్‌స్టాగ్రామ్‌లో పోస్ట్ చేశాడు. ఈ పోస్ట్‌ని ఓ వీడియోని కూడా జోడించాడు. తన ప్రియురాలతో కలిసి ఉన్న అపురూప క్షణాలు ఆ వీడియోలో ఉన్నాయి.

61 సంవత్సరాల లలిత్ మోదీ వాలంటైన్స్ డేన తన ప్రియురాలు రీమా బౌరీని అందరికీ పరిచయం చేశాడు. లలిత్ పెట్టిన ఇన్‌స్టాగ్రామ్ పోస్ట్ కింద 'లవ్ యూ మోర్' అంటూ రీమా కామెంట్ చేయగా.. 'ఫర్ ఎవర్ మై లవ్' అంటూ లలిత్ మోదీ రిప్లయ్ ఇచ్చాడు.

లలిత్ మోదీ తనకంటే ఎనిమిదేళ్ల పెద్దదైన మినాల్‌ను ప్రేమించి పెళ్లి చేసుకున్నాడు. అయితే ఆమె 2018లో క్యాన్సర్‌తో కన్నుమూశారు. అప్పటి నుంచి ఒంటరిగా ఉంటున్న లలిత్ మోదీ 2022లో విశ్వసుందరి సుస్మిత సేన్‌తో డేటింగ్ ఉన్నట్లు ప్రకటించాడు. వీళ్లిద్దరి ఫొటోలు కూడా అప్పట్లో సోషల్ మీడియాలో హల్‌చల్ చేశాయి. త్వరలోనే పెళ్లి కూడా చేసుకోబోతున్నారనే వార్తలు కూడా చక్కర్లు కొట్టాయి. అయితే సుస్మిత ఆ వ్యవహారంపై ఎక్కడా క్లారిటీ ఇవ్వలేదు. ఆ తర్వాత వాళ్లిద్దరి మధ్య గ్యాప్ రావడంతో లలిత్ మోదీ ఈ వాలంటైన్స్ డేకి తన కొత్త ప్రియురాలు రీమా బౌరీని పరిచయం చేశాడు. రీమాతో అయినా చిరకాలం ఉంటాడా? లేక రానున్న ప్రేమికుల దినోత్సవానికి మరొకరిని పరిచయం చేస్తారా అంటూ నెటిజన్లు ట్రోల్స్ చేస్తున్నారు.

ఐపీఎల్‌తో అతికొద్ది సమయంలోనే తన పేరు ప్రపంచమంతా వినిపించేలా చేసిన లలిత్ మోదీ అంతే త్వరగా అప్రతిష్టపాలయ్యాడు. మనీ లాండరింగ్, పన్ను ఎగవేత కేసులతో భారతదేశం విడిచి పారిపోయాడు. 2010 నుంచి లండన్‌లోనే ఉంటున్నాడు. దావూద్ ఇబ్రహీం హెచ్చరికలతోనే తాను దేశం విడిచి పెట్టాల్సి వచ్చిందంటూ ఇటీవల ఓసారి చెప్పాడు. మొత్తానికి లలిత్ మోదీ వాలంటైన్స్ డేతో మరోసారి వార్తల్లో నిలిచాడు.