ఛాంపియన్స్ ట్రోఫీ 2025.. దుబాయ్లో అడుగుపెట్టిన రోహిత్ సేన
sports | Suryaa Desk | Published : Sun, Feb 16, 2025, 10:25 PM
ఎనిమిదేళ్ల తర్వాత జరుగుతున్న ప్రతిష్టాత్మక ఐసీసీ టోర్నీకి సమయం ఆసన్నమవుతోంది. మరో మూడు రోజుల్లో ఈ టోర్నీకి తెరలేవనుంది. ఈ నేపథ్యంలో భారత క్రికెట్ జట్టు.. టోర్నీలో ఆడేందుకు భారత్ నుంచి పయనమైంది. ఈ వన్డే టోర్నీలో టైటిల్ ఫేవరెట్గా బరిలోకి దిగుతున్న భారత క్రికెట్ జట్టు.. శనివారం రాత్రి ముంబై నుంచి బయలుదేరి వెళ్లి దుబాయ్కు చేరుకుంది. ముంబైలోని ఛత్రపతి శివాజీ ఎయిర్పోర్ట్కు పెద్ద సంఖ్యలో వచ్చిన అభిమానులు.. జయహో భారత్.. అంటూ భారత జట్టుకు బెస్ట్ ఆఫ్ లక్ చెప్పి పంపించారు.
కెప్టెన్ రోహిత్ శర్మ, స్టార్ ప్లేయర్ విరాట్ కోహ్లీ సహా జట్టులోని ఆటగాళ్లు.. హెడ్కోచ్ గౌతమ్ గంభీర్.. ఇతర సిబ్బంది అందరూ ఒకేసారి దుబాయ్ ఫ్లైట్ ఎక్కేశారు. ఇందుకు సంబంధించిన వీడియోను బీసీసీఐ తన అధికారిక ట్విట్టర్ ఖాతాలో షేర్ చేసింది. ఇందులో భారత క్రికెటర్లు అభిమానులకు అభివాదం చేస్తూ కనిపించారు.
ఇక ఫిబ్రవరి 19 నుంచి మార్చి 9 వరకు ఛాంపియన్స్ ట్రోఫీ జరగనుంది. ఈ టోర్నీకి ఆతిథ్య దేశంగా పాకిస్థాన్ ఉంది. అయితే భద్రతపరమైన కారణాలతో భారత్.. పాక్కు వెళ్లేందుకు నిరాకరించింది. దీంతో భారత్ ఆడే మ్యాచ్లను ఐసీసీ.. దుబాయ్ వేదికగా నిర్వహించేలా షెడ్యూల్ చేసింది. దీంతో ఈ టోర్నీలో భారత్ ఆడే మ్యాచ్లన్నీ దుబాయ్లోనే జరుగుతాయి.
టోర్నీ లీగ్ దశలో భాగంగా ఈనెల 20న భారత్ తన తొలి మ్యాచ్లో తలపడనుంది. బంగ్లాదేశ్ జట్టుతో టీమిండియా తలపడనుంది. ఇక ఆ తర్వాత ప్రపంచ క్రికెట్ అభిమానులు ఎదురుచూస్తున్న భారత్-పాక్ మ్యాచ్ జరగనుంది. ఈనెల 23న దుబాయ్ వేదికగా ఈ మ్యాచ్ జరుగుతుంది. ఇందుకోసం పాకిస్థాన్ కూడా దుబాయ్కే రానుంది. లీగ్ దశలో చివర్ మ్యాచ్ మార్చి 2న భారత్.. న్యూజిలాండ్తో తలపడనుంది.
ఛాంపియన్స్ ట్రోఫీ కోసం భారత జట్టు:
రోహిత్ శర్మ (కెప్టెన్), శుభ్మన్ గిల్ (వైస్ కెప్టెన్), విరాట్ కోహ్లీ, శ్రేయస్ అయ్యర్, కేఎల్ రాహుల్, హార్దిక్ పాండ్యా, అక్షర్ పటేల్, వాషింగ్టన్ సుందర్, కుల్దీప్ యాదవ్, హర్షిత్ రాణా, అర్షదీప్ సింగ్, మహమ్మద్ షమీ, వరుణ్ చక్రవర్తి, రిషభ్ పంత్, రవీంద్ర జడేజా
|
|