సతీమణితో సరదాగా జెలెన్‌స్కీ ఫొటోషూట్.. ఇవేం పనులంటూ మస్క్ మాస్ రిప్లై

ఉక్రెయిన్ అధ్యక్షుడు జెలెన్‌స్కీ తన భార్యతో కలిసి గతంలో ఓ ఫొటోషూట్‌లో పాల్గొన్నాడు. ఇద్దరూ కలిసి అందంగా ముస్తాబై మరీ ఫొటోలు దిగారు. అయితే తాజాగా ఈ ఫొటోలను షేర్ చేస్తూ టెస్లా, ఎక్స్ అధినేత ఎలాన్ మస్క్ పోస్ట్ చేశారు. ఈ ఫొటోలు జెలెన్‌స్కీ 2022లో తన భార్యతో కలిసి దిగారని వివరిస్తూనే ఆగ్రహం వ్యక్తం చేశారు. అప్పుడు రష్యా-ఉక్రెయిన్ దేశాల మధ్య యుద్ధం జరుగుతుంటే.. అనేక మంది సైనికులు, మహిళలు, పిల్లలు ప్రాణాలు కోల్పోయారు. అలాంటి సమయంలో కూడా జెలెన్‌స్కీ ఇలా ఫొటోషూట్ చేయించుకోవడం దారుణం అన్నారు. ఆ పూర్తి వివరాలు మీకోసం.

2022లో జెలెన్‌స్కీ తన భార్య, ఉక్రెయిన్ ప్రథమ మహిళ అయిన ఒలెనా జెలెన్‌స్కీతో కలిసి వోగ్ ఫొటోషూట్‌లో పాల్గొన్నారు. ఈ ఫొటోలను ప్రముఖ ఫొటోగ్రాఫర్ అన్నీ లీబోవిట్జ్ తీశారు. "పోర్టెయిట్ ఆఫ్ బ్రేవరీ: ఉక్రెయిన్ ప్రథమ మహిళ ఒలెనా జెలెన్‌స్కీ" అనే శీర్షికతో దీన్ని ప్రచురించారు. ముఖ్యంగా యుద్ధం జరుగుతున్న సమయంలో ఉక్రేనియన్ ప్రజల స్థితిస్థాపకత, దృఢ సంకల్పాన్ని చూపించే విధంగా దీన్ని ప్రచురించగా.. తీవ్ర వివాదాస్పదం అయింది. ఈ ఫొటోషూట్‌లో తప్పేమీ లేకపోయినా అప్పుడు రష్యా, ఉక్రెయిన్ దేశాల మధ్య గొడవలు జరుతున్నాయి.

దీంతో ఈ ఫొటో షూట్ కాస్తా వైరల్ అయింది. దీనిపై వివిధ దేశాల నేతలు సైతం స్పందిస్తూ.. జెలెన్‌స్కీ తీరును తప్పుపట్టారు. ఇదంతా బాగానే ఉండగా.. గత మూడు సంవత్సరాల నుంచి రష్యా, ఉక్రెయిన్ దేశాల మధ్య యుద్ధం కొనసాగుతూనే ఉంది. దీని వల్ల ఇప్పటికే ఇరు దేశాలకు చెందిన వేలాది మంది ప్రాణాలు కోల్పోయారు. అయితే ఇటీవలే అగ్రరాజ్యం అమెరికా 47వ అధ్యక్షుడిగా డొనాల్డ్ ట్రంప్ పదవీ బాధ్యతలు చేపట్టారు.

ఈక్రమంలోనే ఈ రెండు దేశాల మధ్య గొడవలను ఆపి శాంతి ఒప్పందం చేసేందుకు పెద్ద ఎత్తున కృషి చేస్తున్నారు. ఇప్పటికే రెండు దేశాల మధ్య చర్చలు జరుగుతున్నాయి. సౌదీ అరేబియా వేదికగా చర్చలు జరుగతుండగా.. టెస్లా అధినేత ఎలాన్ మస్క్ షాకింగ్ పోస్ట్ పెట్టారు. ఎక్స్ వేదికగా జెలెన్‌స్కీ తన భార్యతో కలిసి దిగిన ఫొటోలను షేర్ చేశారు.

దీనిపై తీవ్ర స్థాయిలో ఆగ్రహం వ్యక్తం చేస్తూనే.. ఓవైపు పిల్లలు, సైనికులు, మహిళలు ప్రాణాలు కోల్పోతుంటే దేశాధ్యక్షుడు మాత్రం ఇలా ఫొటోలు దిగారంటూ వివరించారు. ఇలా ఎవరైనా చేయగలరా అంటూ అడుగుతూనే.. జెలెన్‌స్కీ చేసిన పని అస్సలే బాలేదని వెల్లడించారు. ఇలా ఈ ఫొటోలు మరోసారి తెరపైకి రావడంతో.. జెలెన్‌స్కీపై మళ్లీ విమర్శలు వెల్లువెత్తుతున్నాయి.