భర్తతో బిడ్డను కనేందుకు డబ్బు డిమాండ్ చేసిన భార్య

పెళ్లైన ప్రతీ అమ్మాయి తన భర్త, అత్తింటి నుంచి రూపాయి కూడా ఆశించకుండా.. జీవితాంతం ఉచితంగా పనులు చేస్తుంటుంది. డబ్బులు కూడా సంపాదించి ఇస్తూ వారిని ప్రేమగా చూసుకుంటుంది. అలాగే భర్తతో పిల్లల్ని కంటూ.. వారి వంశాన్ని వృద్ధి చేస్తుంది. ఇదంతా మనకు తెలిసిందే. మనం రోజూ చూసేదే కూడా. కానీ తాజాగా ఓ మహిళ.. కట్టుకున్న వాడితో బిడ్డను కనేందుకు భారీగా డబ్బు డిమాండ్ చేసింది. రూ.33 కోట్లిస్తేనే నీతోనే బిడ్డను కంటానని భర్తకు తేల్చి చెప్పింది. మరి అందుకు భర్త ఏం చేశాడో మనం ఇప్పుడు తెలుసుకుందాం.

బ్రిటన్‌లో పుట్టి పెరిగిన మలైకా రాజాకు ముందు నుంచి విలాసవంతమైన జీవితం అంటే చాలా ఇష్టం. తాను వాడే వస్తువులు, మేకప్‌కు సంబంధించిన అన్నింటినీ వీడియోలుగా తీస్తూ సోషల్ మీడియాలో కూడా పెట్టేది. ఇదంతా బాగానే ఉండగా.. ఈమె 2017లో దుబాయికి చెందిన ఓ కోటీశ్వరుడిని పెళ్లి చేసుకుంది. ఇక అప్పటి నుంచి మరింత విలాసవంతమైన జీవితాన్ని గడుపుతూ లైఫ్‌ను ఫుల్లుగా ఎంజాయ్ చేస్తోంది. ఇప్పటికే ఈ జంటకు ఓ పాప పుట్టగా.. భర్త మలైకా రాజాను మరో బిడ్డను ఇవ్వమని అడిగాడట.

అయితే తనకు కూడా పిల్లల్ని కనడం ఇష్టమే అయినప్పటికీ.. 33 కోట్ల రూపాయలు ఇస్తేనే పిల్లలు కంటానని భర్తకు తెగేసి చెప్పింది. అయితే భర్త ముందు ఆశ్చర్యపోయి ఎందుకు అంత డబ్బు అని అడిగాడు. అందుకు మలైకా.. తనకు పుట్టబోయే బిడ్డకు ఆర్థిక భద్రత చాలా అవసరం అని అందుకే ఆ డబ్బు కావాలని అడుగుతున్నట్లు చెప్పింది. ఆమె సమాధానం నచ్చడంతో అతడు భార్య అడిగిన 33 కోట్లను ఒకేసారి చెల్లించాడు. ఈక్రమంలోనే మలైకా రాజా మరో ఆడబిడ్డకు జన్మనిచ్చింది.

పాప పుట్టిన తర్వాత భర్త ఇచ్చిన డబ్బులతో మలైకా రాజా అనేక వస్తువులు కొనుగోలు చేసింది. ముందుగా 15 కోట్లు పెట్టి ఓ విలాసవంతమైన భవనం కొనింది. అందులో తన పిల్లలను పెంచాలని నిర్ణయించింది. అలాగే గులాబీ రంగు వ్యాగన్ కారు, ఆపై 86 లక్షలతో 8 డిజైనర్ బ్యాగులు, 70 లక్షల రూపాయలతో బంగారం, బట్టలు కొనుగోలు చేసింది. అలాగే పుట్టబోయే పిల్లల సంరక్షణ కోసం మరో 70 లక్షలు పక్కకు పెట్టుకుంది. అయితే ఇదంతా ఇన్‌స్టాగ్రామ్ వేదికగా వెల్లడించింది. అంతేకాకుండా తాను డబ్బులో కోసమే పెళ్లి చేసుకున్నట్లు చెప్పింది. దీంతో ఆమె వీడియో నెట్టింట వైరల్ కాగా.. ఈ షాకింగ్ విషయాలు వెలుగులోకి వచ్చాయి.

ప్రస్తుతం ఈ వీడియోలు చూసిన వారంతా ఒక్కో విధంగా స్పందిస్తున్నారు. మంచి పని చేశారు.. పిల్లలకు ఆర్థిక భద్రత చాలా ముఖ్యమని కొంతమంది చెబుతుండగా.. భర్త సంపాదించిందంతా మీకు, మీ పిల్లలకేగా ఇలా ప్రత్యేకించి డిమాండ్ చేయడం ఎందుకుని మరికొంత మంది ప్రశ్నిస్తున్నారు.