పాక్‌తో మ్యాచ్‌లో టాస్ పడగానే రికార్డు సృష్టించిన భారత్

ఛాంపియన్స్ ట్రోఫీ 2025లో పాకిస్థాన్‌తో మ్యాచ్ ద్వారా టీమిండియా ఓ అరుదైన రికార్డు సృష్టించింది. అదేంటి మ్యాచ్ ఇప్పుడే స్టార్ట్ అయింది కదా.. ఇప్పుడే రికార్డు ఏంటి అనుకుంటున్నారా? అవును.. మ్యాచ్‌ స్టార్ట్‌ కాకముందే భారత్‌ ఈ రికార్డు సాధించింది. ఈ మ్యాచ్‌లో టాస్ ఓడిపోవడంతోనే ఓ ప్రపంచ రికార్డును కైవసం చేసుకుంది.

టాస్ ఓడిపోవడంలో రికార్డు..

ఈ మ్యాచ్‌లోనూ భారత్.. టాస్ ఓడిపోయింది. దీంతో అంతర్జాతీయ వన్డేల్లో వరుసగా అత్యధిక సార్లు టాస్ ఓడిపోయిన జట్టుగా భారత్ నిలిచింది. పాకిస్థాన్‌తో మ్యాచ్‌తో కలిపి భారత్.. వరుసగా 12వ సారి టాస్‌ ఓడింది. వన్డే ప్రపంచకప్ 2023 ఫైనల్‌తో సహా తాజా మ్యాచ్ వరకు టాస్‌లో భారత్‌కు ఇలాంటి ఫలితాలే ఎదురయ్యాయి. దీంతో నెదర్లాండ్స్ పేరిట ఉన్న ఈ రికార్డును భారత్‌ అధిగమించింది. నెదర్లాండ్స్ జట్టు 2011-2014 మధ్య వరుసగా 11 మ్యాచ్‌ల్లో టాస్ ఓడిపోయింది.

భారత్ వర్సెస్ పాకిస్థాన్ మ్యాచ్ లైవ్ స్కోర్..

కాగా భారత జట్టు టాస్ ఓడిన 12 మ్యాచ్‌ల్లో రోహిత్ శర్మే 9 సార్లు టాస్‌కు వెళ్లడం గమనార్హం. మరో మూడు సార్లు మాత్రం కేఎల్‌ రాహుల్ టాస్‌కు వెళ్లాడు. వన్డే ప్రపంచకప్ 2023 ఫైనల్ తర్వాత భారత్.. దక్షిణాఫ్రికాకు వెళ్లి మూడు వన్డేలు ఆడింది. ఆ సిరీస్‌కు కేఎల్ రాహుల్ కెప్టెన్‌.

ఆ తర్వాత గతేడాది శ్రీలంకతో భారత్ మూడు వన్డేలు ఆడింది. ఇంగ్లాండ్‌తో ఇటీవల జరిగిన మూడు వన్డేల సిరీస్‌లోనూ ఇదే జరిగింది. ఛాంపియన్స్ ట్రోఫీలోనూ బంగ్లాదేశ్, పాకిస్థాన్‌తో మ్యాచ్‌లలో భారత్ టాస్ ఓడిపోయింది. ఇక పాకిస్థాన్‌తో మ్యాచ్‌లో భారత్ తొలుత బౌలింగ్ చేస్తోంది. ఈ మ్యాచ్‌లో టాస్ గెలిచిన పాకిస్థాన్ కెప్టెన్ మహమ్మద్ రిజ్వాన్.. తొలుత బ్యాటింగ్ ఎంచుకున్నాడు. అయితే టాస్ ఓడిపోయిన తర్వాత కెప్టెన్ రోహిత్ శర్మ మాట్లాడాడు. టాస్ ఓడిపోయినా పెద్ద ఇబ్బంది ఏమీ లేదని చెప్పాడు. వాళ్లు టాస్ గెలిచారు కాబట్టి.. తాము బౌలింగ్ చేస్తామని చెప్పుకొచ్చాడు. ఫస్టు బ్యాటింగ్ చేసినా.. బౌలింగ్ చేసినా.. ఏం చేయాలో భారత జట్టులోని ఆటగాళ్లను తెలుసని వ్యాఖ్యానించాడు.