పవన్ కళ్యాణ్ సీఎం కావాలంటే గోవా వెళ్లాలి

వైఎస్సార్ కాంగ్రెస్ పార్టీకి ప్రతిపక్ష హోదా కావాలంటే జర్మనీకి వెళ్లాలంటూ ఏపీ డిప్యూటీ సీఎం పవన్ కళ్యాణ్ చేసిన వ్యాఖ్యలకు వైసీపీ నేతలు కౌంటరిస్తున్నారు. అసెంబ్లీ సమావేశాల సందర్భంగా మీడియా పాయింట్ వద్ద మాట్లాడిన పవన్ కళ్యాణ్.. వైసీపీకి ప్రతిపక్ష హోదా అంశం గురించి ప్రస్తావించారు. ప్రతిపక్ష హోదా అనేది అడిగితే ఇచ్చేది కాదన్న పవన్ కళ్యాణ్.. ప్రజలు ఓట్లేసి ఇస్తేనే వస్తుందని అన్నారు. అత్యధిక మెజారిటీతో రెండో స్థానంలో ఏ పార్టీ ఉంటుందో ఆ పార్టీకే ప్రతిపక్ష హోదా వస్తుందని పవన్ కళ్యాణ్ చెప్పారు. శాసనసభలో రెండో అతిపెద్ద పార్టీ జనసేన అని చెప్పిన పవన్.. తమ కంటే ఒక్క సీటు వైసీపీకి ఎక్కువగా వచ్చినా కూడా ప్రతిపక్ష హోదా వారికి దక్కేదన్నారు.

11 మంది ఎమ్మెల్యేలు ఉన్న వైసీపీకి ఈ ఐదేళ్లూ ప్రతిపక్ష హోదా రాదన్న పవన్ కళ్యాణ్.. వైఎస్ జగన్ ఈ విషయాన్ని ఫిక్స్‌ కావాలని సూచించారు. వైసీపీని అవమాన పరచాలనేదీ తమ ఉద్దేశం కాదని.. అయితే ప్రతిపక్ష హోదా ఇవ్వడానికి రూల్స్ అంగీకరించవని పవన్ కళ్యాణ్ చెప్పారు. ఈ విషయాన్ని దృష్టిలో పెట్టుకుని వైసీపీ సభ్యులు హుందాగా ప్రవర్తించాలన్న పవన్ కళ్యాణ్.. సీట్ల లెక్కలను కాకుండా, ఓట్ల శాతాన్ని లెక్కలోకి తీసుకుంటే వైసీపీ జర్మనీకి వెళ్లాలంటూ సూచించారు. ఈ నేపథ్యంలో పవన్ కళ్యాణ్ చేసిన వ్యాఖ్యలకు వైసీపీ నేతలు అంబటి రాంబాబు, రోజా కౌంటరిచ్చారు.

పవన్ కళ్యాణ్ సీఎం కావాలంటే గోవా వెళ్లాల్సిందే అంటూ మాజీ మంత్రి అంబటి రాంబాబు కౌంటరిచ్చారు. గోవా అసెంబ్లీ సామర్థ్యం 40 సీట్లు కాగా.. సీఎం కావాలంటే 21 మంది ఎమ్మెల్యేలు అవసరం. ఈ నేపథ్యంలోనే పవన్ కళ్యాణ్ సీఎం పదవిని ప్రస్తావిస్తూ అంబటి రాంబాబు ఈ కౌంటరిచ్చారు. జనసేనకు 21 మంది ఎమ్మెల్యేలు ఉన్న సంగతి తెలిసిందే. వీటిని సింక్ చేస్తూ అంబటి రాంబాబు ఈ కౌంటరిచ్చారు. మరోవైపు ప్రజా సమస్యలను అసెంబ్లీలో ప్రస్తావించటం కోసమే.. ప్రతిపక్ష హోదా అడుగుతున్నామని మరో మాజీ మంత్రి రోజా అన్నారు. అయితే పవన్ కళ్యాణ్ ఏదేదో మాట్లాడుతున్నారన్న రోజా.. పవన్ కళ్యాణ్ రష్యా అల్లుడు కావున జర్మనీ గురించి తెలిసే ఉంటుందంటూ సెటైర్లు వేశారు.

ముఖ్యమంత్రి నారా చంద్రబాబు నాయుడుకు అవసరమైనప్పుడు మాత్రమే పవన్ కళ్యాణ్ మీడియా ముందుకు వస్తారన్న రోజా.. వైఎస్ జగన్ మీద దుష్ర్పచారం చేయడానికే మాట్లాడుతారని విమర్శించారు. కూటమి నేతలకుభయం లేకపోతే వైసీపీకి ప్రతిపక్ష హోదా ఇవ్వాలన్నారు. ప్రతిపక్షాలకు ఇచ్చే పీఏసీ చైర్మన్ పదవిని కూడా కూటమి అన్యాయంగా తీసుకుందన్న రోజా.. హుందాతనం గురించి పవన్ మాట్లాడటం కామెడీగా ఉందన్నారు. పవన్ కళ్యాణ్ సినిమాల నుంచి రాజకీయాల్లోకి వస్తే ప్రజలకు మంచి చేస్తారని అనుకున్నామని.. కానీ ఎవరికి మంచి చేశారో చెప్పాలని రోజా ప్రశ్నించారు.