పిఠాపురంలో ఘనంగా శివరాత్రి వేడుకలు

మహా శివరాత్రి పర్వదినాన్ని పురస్కరించుకుని తెలుగు రాష్ట్రాల్లోని శివాలయాలు శివనామస్మరణతో మార్మోగుతున్నాయి. శివాలయాలకు భారీగా తరలి వెళ్తున్న భక్తులు.. ప్రత్యేక పూజలు నిర్వహిస్తున్నారు. ఏపీ డిప్యూటీ సీఎం పవన్ కళ్యాణ్ సొంత నియోజకవర్గం పిఠాపురంలో మహా శివరాత్రి వేడుకలు ఘనంగా నిర్వహించారు. పిఠాపురంలోని కుక్కుటేశ్వర స్వామి దేవస్థానంలో అంగరంగ వైభవంగా మహా శివరాత్రి వేడుకలు నిర్వహించారు. దేవాలయంలో భక్తుల కోసం ప్రత్యేక ఏర్పాట్లు చేశారు. భక్తులు ఎలాంటి అసౌకర్యానికి గురికాకుండా స్వామి వారిని దర్శించుకునేలా క్యూలైన్లు ఏర్పాటు చేశారు. అలాగే ఆలయం ఆవరణలో, ప్రాంగణం వెలుపల రోడ్లు భవనాల శాఖ ఆధ్వర్యంలో బారికేడ్లను ఏర్పాటుచేశారు.

కుక్కుటేశ్వరస్వామి ఆలయం ఆవరణలోని కోనేరులోనూ ప్రత్యేక జాగ్రత్తలు తీసుకున్నారు. కోనేరులో లోతైన ప్రదేశాలకు వెళ్లకుండా నియంత్రించేందుకు, భక్తులకు రక్షణ కోసం కంచెను ఏర్పాటు చేశారు. కోనేరులో స్నానం చేసే సమయంలో ప్రమాదవశాత్తు ఎవరైనా మునిగిపోతే వారిని రక్షించేందుకు పదిమంది గజ ఈతగాళ్లతో ప్రత్యేక బృందాన్ని ఏర్పాటు చేశారు. ఆలయ ప్రాంగణంలో భక్తుల కోసం రెండు మెడికల్ సెంటర్లను ఏర్పాటు చేశారు. దేవాలయం పరిసరాల్లో అత్యవసర వైద్య సహాయం అందించేందుకు రెండు అంబులెన్సులను ఉంచారు. ఆలయ పరిసరాల్లో గొడవలు జరగకుండా, శాంతి భద్రతల పర్యవేక్షణకు 350 మంది పోలీస్ సిబ్బందితో భారీ భద్రతను కల్పించారు.

ఆలయానికి వచ్చే భక్తులకు సహాయ కార్యక్రమాలు అందించేందుకు, ఆహారం, మంచినీరు, మజ్జిగ పంపిణీ కోసం 250 మంది వాలంటీర్లను నియమించారు.భక్తులు పరిశుభ్రమైన నీటితో స్నానాలు ఆచరించినందుకు కోనేటి వద్ద నీటి షవర్లను ఏర్పాటు చేయించారు. అనుకోని ఘటనలు జరిగితే వెంటనే రక్షణ చర్యలు చేపట్టేందుకు వీలుగా ఆలయ సమీపంలో ప్రత్యేక ఫైర్ ఇంజన్ ఏర్పాటు చేశారు. దేవాలయ ప్రాంగణం, పరిసరాలను శుభ్రంగా ఉంచేందుకు పారిశుధ్య బృందాలను నియమించారు. ఎన్నడూ లేని విధంగా తొలిసారిగా.. అనుకోని ప్రమాదాలు జరిగితే ఆదుకునేందుకు వీలుగా కుక్కుటేశ్వర ఆలయానికి ఇన్సూరెన్స్ సదుపాయం కల్పించారు. మహా శివరాత్రి సందర్భంగా ఆలయంలో చేసిన ఏర్పాట్లపై భక్తులు హర్షం వ్యక్తం చేస్తున్నారు.