పురాతన ఆలయంలో మహా శివరాత్రి వేళ శివలింగం చోరీ

మహా శివరాత్రి సందర్భంగా దేశవ్యాప్తంగా శైవక్షేత్రాలు భక్తుల రద్దీతో కిక్కిరిసిపోతున్నాయి. తెల్లవారుజామునుంచే దేవాలయాలకు చేరుకుంటున్న భక్తులు హర హర మహాదేవ్, ఓం నమః శివాయ అంటూ హోరెత్తిస్తున్నారు. భక్తులు శ్రద్ధగా ఉపవాసం చేసి.. మొక్కులు చెల్లించుకుంటున్నారు. ఇక మహా శివరాత్రి నేపథ్యంలో ఆలయాల్లో ప్రత్యేక కార్యక్రమాలు నిర్వహిస్తున్నారు. మరోవైపు.. శివలింగాలకు అభిషేకాలు నిర్వహిస్తున్నారు. అయితే కొందరు దుండగులు మాత్రం సరిగ్గా మహా శివరాత్రి రోజునే గుడిలో ఉన్న శివలింగాన్ని ఎత్తుకుపోవడం ఇప్పుడు తీవ్ర కలకలం రేపుతోంది. గుజరాత్‌లోని దేవ్‌భూమి ద్వారక జిల్లాలో జరిగిన ఈ సంఘటన ఇప్పుడు స్థానికులను తీవ్ర ఆందోళనకు గురి చేస్తోంది.

ద్వారక జిల్లాలోని అరేబియా సముద్రం ఒడ్డున కళ్యాణ్‌పూర్‌లోని ప్రసిద్ధ పుణ్యక్షేత్రమైన హర్సిద్ధి మాతాజీ ఆలయానికి సమీపంలో ఉన్న శ్రీ భిద్భంజన్ భవనీశ్వర్ మహాదేవ్ ఆలయంలో ఈ ఘటన చోటుచేసుకుంది. ఆ పురాతన ఆలయంలో రాతి శివలింగం చోరీకి గురికావడం అక్కడ తీవ్ర కలకలం రేపింది. రోజూ లాగే ఆలయంలో పూజలు నిర్వహించేందుకు తెల్లవారుజామున పూజారి.. ఆలయ తలుపులు తెరవగా.. అందులో శివలింగం కనిపించలేదు. అయితే శతాబ్దాల నాటి ఆ ఆలయంలో శివలింగం అతి పురాతనమైందని.. అక్కడి శివలింగాన్ని మహాదేవుడి విశ్వశక్తికి నిదర్శంగా భక్తులు విశ్వసిస్తారు. అలాంటి శివలింగం చోరీకి గురి కావడం సంచలనంగా మారింది.

ఇక శివలింగం చోరీకి గురైన విషయాన్ని ఆలయ పూజారి స్థానిక పోలీసులకు ఫిర్యాదు చేయగా.. వారు రంగంలోకి దిగి విచారణ చేపట్టారు. వేర్వేరు బృందాలను ఏర్పాటు చేసి.. శివలింగాన్ని వెతికేందుకు గాలింపు ముమ్మరం చేశారు. ఆ పురాతన ఆలయంలోని రాతి శివలింగాన్ని దాని స్థానం నుంచి పెకలించి తీసుకెళ్లడం అందర్నీ షాక్‌కు గురి చేసింది. కేవలం శివలింగాన్ని మాత్రమే చోరీ చేశారని.. ఆలయంలోని మిగితా వస్తువులన్నీ చెక్కు చెదరకుండా అలాగే ఉండటం తీవ్ర అనుమానాలకు తావిస్తోంది. ఇది చేసింది మామూలు దొంగలు కాదని అనుమానిస్తున్నారు.

ఇక గాలింపు చేపట్టిన పోలీసులకు ఆలయ సమీపంలోని బీచ్‌లో శివలింగానికి చెందిన కొంత భాగం పడి ఉన్నట్లు గుర్తించారు. దీంతో శివలింగాన్ని సముద్రపు నీటిలో పడేశారేమోనన్న అనుమానంతో.. అందులో వెతికేందుకు స్కూబా డైవర్ల బృందాన్ని పోలీసులు రంగంలోకి దించారు. ముమ్మరంగా గాలింపు చర్యలు కొనసాగిస్తున్నారు. ఈ ఘటనపై ఎఫ్‌ఐఆర్‌ నమోదు చేసిన పోలీసులు.. దర్యాప్తు కోసం స్థానిక క్రైం బ్రాంచ్‌ పోలీసులు, స్పెషల్‌ ఆపరేషన్స్ గ్రూప్, స్థానిక పోలీసులతో పాటు ఫోరెన్సిక్‌ నిపుణులు, డాగ్‌స్క్వాడ్‌ను రంగంలోకి దించి విచారణ జరుపుతున్నారు.