రూ.6.7 కోట్ల విలువ చేసే డైమండ్ కమ్మలు కొట్టేసి.. గుట్టుగా మింగేసి.. చివరకు ఏమైందంటే?

దొంగతనానికి పాల్పడ్డ వారంతా పోలీసులు, బాధితుల నుంచి తప్పించుకునేందుకు పెద్ద ఎత్తున ప్రయత్నాలు చేస్తుంటారు. ముఖ్యంగా వారు కొట్టేసిన వాటిని దాచి పెట్టడం, వాళ్లే కనిపించకుండా పోవడం వంటివి చేస్తుంటారు. కానీ మనం ఇప్పుడు చూడబోయే దొంగ మాత్రం తాను దోచేసింది పోలీసులకు దొరక్కూడదని మింగేశాడు. అయితే సీసీటీవీ ఫుటేజీ ఆధారంగా నిందితుడిని గుర్తించిన పోలీసులు.. గాలింపు చర్యలు చేపట్టి మరీ అతడిని అరెస్ట్ చేశారు. కానీ అతడు చోరీ చేసిన డైమండ్ ఇయర్ రింగ్స్‌ను కనిపెట్టలేకపోయారు. మరి నిందితుడే డైమండ్స్ మింగేశాడనే విషయం ఎలా వెలుగులోకి వచ్చిందో మనం ఇప్పుడు తెలుసుకుందాం.

అమెరికాకు చెందిన 32 ఏళ్ల జయతాన్ లారెన్స్ గిల్డర్... ఓర్లాండో మ్యాజిక్ ప్లేయర్ ప్రతినిధిగా చెప్పుకుని.. టిఫనీ అండ్ కో స్టోర్‌కు వెళ్లాడు. అక్కడే వీఐపీ ట్రీట్‌మెంట్ పొందుతూ.. ఓ ప్రత్యేక గదిలో వజ్రాల ఆభరణాలను చూశాడు. కొనుగోలు చేస్తున్నట్లుగా నటిస్తూనే.. డైమండ్ ఇయర్ రింగ్స్ కొట్టేసి పారిపోయాడు. ఫిబ్రవరి 26వ తేదీన జరిగిన ఈ చోరీలో 7 లక్షల 69 వేల డాలర్ల (ఇండియా కరెన్సీ ప్రకారం 6.7 కోట్ల రూపాయలు) విలువ చేసే డైమండ్ ఇయర్ రింగ్స్ పోయినట్లు సిబ్బంది గుర్తించి పోలీసులకు ఫిర్యాదు చేశారు. కేసు నమోదు చేసుకున్న పోలీసులు సీసీటీవీ ఫుటేజీ ఆధారంగా నిందితుడిని గుర్తించారు.

ముఖ్యంగా జయతాన్ లారెన్స్ గిల్డర్‌ను పట్టుకునేందుకు పెద్ద ఎత్తునే గాలింపు చర్యలు చేపట్టారు. ఈక్రమంలోనే నిందితుడు గిల్డర్ 4.86 క్యారెట్ల ఓ చెవి కమ్మను అమ్మేశాడు. అయితే దీని విలువ లక్షా 60 వేల డాలర్లు (భారత కరెన్సీ ప్రకారం రూ.1.3 కోట్లు). ఇక రెండో ఇయర్ రింగ్ 8.10 క్యారెట్లు కాగా దీని విలువు 6 లక్షల 9500 డాలర్లు (భారత కరెన్సీ ప్రకారం రూ.5.3 కోట్లు). అయితే రెండో కమ్మ తన వద్దే ఉండగా.. పోలీసులు ఎంట్రీ ఇచ్చారు. దీంతో భయపడిపోయిన గిల్డర్ దాన్ని మింగేశాడు.

ఈక్రమంలోనే పోలీసులు ఇంటర్‌స్టేట్ 10 వద్ద నిందితుడు గిల్డర్‌ను అరెస్ట్ చేశారు. ఈక్రమంలోనే అతడు తప్పించుకునేందుకు ప్రయత్నించగా.. కేసు నమోదు చేసి మరీ అదుపులోకి తీసుకున్నారు. అయితే పోయిన చెవి కమ్మలు పట్టుకోలేకపోయినందున అధికారులు అతడిపై దొంగతనం కేసు పెట్టలేకపోయారు. కానీ జైల్లో ఉండగా నిందితుడు గిల్డర్.. సిబ్బందిని నా కడుపులో ఉన్న వాటిపై కేసు పెడతారా అంటూ ప్రశ్నించాడు.

దీంతో అతడి కడుపులో ఏవో ఉన్నాయని భావించిన పోలీసులు స్కానింగ్ తీయించారు. ఈక్రమంలోనే అతడి కడుపులో డైమండ్ ఇయర్ రింగ్ ఉన్నట్లు గుర్తించారు. అయితే దాన్ని బయటకు తీయించేందుకు ఆపరేషన్ కూడా చేయించబోతున్నారు. ఆ తర్వాత డైమండ్‌ను టిఫనీ అండ్ కోకు అప్పగించనున్నారు.