భవనం పైనుంచి దూకి ఐఎఫ్ఎస్ ఆఫీసర్ ఆత్మహత్య

విదేశాంగా శాఖకు చెందిన ఓ అధికారి హఠాత్తుగా ఆత్మహత్య చేసుకున్నారు. ఎవరూ కలలో కూడా ఊహించని విధంగా.. తాను నివసిస్తున్న భవనం పైనుంచే కిందకు దూకి ప్రాణాలు తీసుకున్నారు. ప్రస్తుతం తల్లితో పాటు కలిసి ఉంటున్న ఆయన మృతదేహాన్ని చూసి తల్లి గుండెలవిసేలా రోదిస్తున్నారు. ఇలాంటిది జరుగుతుందని తాను కలలో కూడా ఊహించలేదంటూనే కంటతడి పెట్టారు. అంతపెద్ద స్థాయిలో ఉన్న ఈ అధికారి ఆత్మహత్యకు ఎందుకు చేసుకున్నారు, ఆ పూర్తి వివరాలు ఏంటో మనం ఇప్పుడు తెలుసుకుందాం.

విదేశాంగ శాఖకు చెందిన అధికారి జితేంద్ర రావత్.. ప్రస్తుతం దేశ రాజధాని ఢిల్లీలోని చాణక్యపురిలో నివాసం ఉంటున్నారు. ముఖ్యంగా రెసిడెన్షియల్ సొసైటీలో అధికారులు నివాసం ఉంటున్న భవనంలో తన తల్లితో కలిసి జీవిస్తున్నారు. ఈయనకు భార్య, ఇద్దరు పిల్లలు కూడా ఉండగా.. వారు ప్రస్తుతం ఉత్తరాఖండ్ రాజధాని డెహ్రాడూన్‌లో నివసిస్తున్నారు. ఇదంతా ఇలా ఉండగా.. ఐఎఫ్ఎస్ అధికారి జితేంద్ర రావత్ రోజు తానుంటున్న ఇంటి భవనం టెర్రస్ పైనుంచి దూకి బలవన్మరణానికి పాల్పడ్డారు.

విషయం గుర్తించిన స్థానికులు వెంటనే పోలీసులకు సమాచారం అందించారు. హుటాహుటిన రంగంలోకి దిగిన పోలీసులు కేసు నమోదు చేసుకుని.. ఆయన మృతదేహాన్ని పోస్టుమార్టం నిమిత్తం స్థానిక ప్రభుత్వాసుపత్రికి పంపించారు. అలాగే ఆయన ఆత్మహత్య చేసుకోవడానికి గల కారణాలు తెలుసుకునే ప్రయత్నం చేశారు. ఈక్రమంలోనే ఆయన తల్లితో మాట్లడగా.. జితేంద్ర రావత్ గత కొంత కాలంగా డిప్రెషన్‌తో బాధ పడుతున్నారని చెప్పారు. ఇందుకోసం ఆయన చికిత్స కూడా తీసుకుంటున్నారని వివరించారు. కానీ ఇలా ఆత్మహత్య చేసుకుంటాడని తాను కలలో కూడా ఊహించలేదని కన్నీరుమున్నీరుగా విలపించారు.

మరోవైపు దీనిపై ఢిల్లీ పోలీసులు స్పందిస్తూ.. జితేంద్ర రావత్ వద్ద ఎలాంటి సూసైడ్ నోట్ లభించలేదని.. డిప్రెషన్ వల్లే ప్రాణాలు తీసుకున్నట్లు ప్రాథమికంగా గుర్తించినట్లు చెప్పుకొచ్చారు. అధికారి మృతి విషయం తెలుసుకున్న విదేశాంగ శాఖ.. ఆయన మరణాన్ని ధ్రువీకరించింది. ఈ క్లిష్ట సమయంలో జితేంద్ర రావత్ కుటుంబానికి అన్ని రకాలుగా సాయం చేస్తున్నామని ప్రకటించింది. కేసు విచారణలో ఎప్పటికప్పుడు ఢిల్లీ పోలీసులతో సంప్రదింపులు చేస్తున్నామని.. బాధిత కుటుంబం గోప్యత దృష్ట్యా మిగతా వివరాలు ఏవీ చెప్పడం లేదని పేర్కొంది.