భారతీయ విద్యార్థులకు బ్రిటన్ యూనివర్సిటీ బంపరాఫర్

భారతీయ విద్యార్థులకు బ్రిటన్‌కు చెందిన యూనివర్సిటీ ఒకటి బంపరాఫర్ ప్రకటించింది. తన విద్యా సంస్థలో పోస్ట్‌ గ్రాడ్యుయేట్‌ డిగ్రీ కోర్సుకు దరఖాస్తు చేసుకునే ప్రతిభావంతులైన భారతీయులకు వైస్‌ ఛాన్స్‌లర్‌ పురస్కారం కింద 10,000 పౌండ్ల (రూ.11,26,000) ఫీజులను రద్దు చేస్తామని ప్రపంచ ప్రఖ్యాత కింగ్స్‌ కాలేజ్‌ వెల్లడించింది. గతేడాది ఈ పథకాన్ని కింగ్స్ కాలేజీ ప్రారంభించింది ఈ సంవత్సరం 30 మంది అర్హులైన భారతీయ విద్యార్థులకు ఈ పురస్కారాన్ని అందజేయనున్నారు. ఈ ఏడాది సెప్టెంబరు నుంచి మొదలయ్యే పూర్తికాల, ఆన్‌ క్యాంపస్‌ పీజీ కోర్సుల్లో చేరడానికి భారతీయ విద్యార్థులు ఏప్రిల్‌ చివరికల్లా దరఖాస్తు చేసుకోవాల్సి ఉంటుంది.

ఈ అవార్డు కోసం దరఖాస్తు చేసుకునేవారు తమ విద్యార్హతలు, కింగ్స్‌ కాలేజీలో విద్యాభ్యాసం ద్వారా తాము ప్రపంచానికి చేయనున్న సేవలను నివేదించాలి. భారత్‌కు చెందిన వైస్-ఛాన్సెలర్ ప్రొపెసర్ శిజిత్ కపూర్ ఈ అవార్డుల ప్రాముఖ్యతను, ముఖ్యంగా భారతీయ విద్యార్థులకు అందజేయడం వెనుకున్న కారణాలను తెలిపారు. విదేశాలలో ఉన్నత చదువుల కోసం తాను ఢిల్లీ నుంచి లండన్‌కు వచ్చినట్టు ఆయన చెప్పారు. ఈ కాలేజీతో సుదీర్ఘకాలంగా భారతీయ విద్యార్థులకు సంబంధాన్ని కూడా నొక్కిచెప్పారు. ఈ కాలేజీలోని మహిళా పూర్వ విద్యార్థుల్లో స్వాతంత్ర్య సమరయోధురాలు సరోజిని నాయుడు ఒకరని పేర్కొన్నారు.

‘యూకేలో బెంగాలీ, సంస్కృతం బోధించిన తొలి యూనివర్సిటీల్లో మాది ఒకటి... కింగ్స్ కాలేజీలో మహిళలకు ప్రవేశం లభించిన తొలినాళ్లలో చేరిన ముఖ్యమైన విద్యార్థుల్లో సరోజినీ నాయుడు ఒకరు’ అని ఆయన వివరించారు. భారతీయ దరఖాస్తుదారుల సంఖ్య పెరుగుతున్నారని, ట్యూషన్ ఫీజులు చాలా మందికి భారంగా మారాయని ఆయన అన్నారు. ‘ఎక్కువ మంది విద్యార్థులను ప్రోత్సహించడానికి మేము వైస్-ఛాన్సలర్ అవార్డులను ప్రతిపాదించాం’ అని ఆయన చెప్పారు.

ఎయిమ్స్‌లో గ్రాడ్యుయేషన్ అనంతరం అమెరికా, కెనడా, ఆస్ట్రేలియాలో ఉన్నత విద్యను అభ్యసించిన శిజిత్ కపూర్..ఆ తర్వాత లండన్ కింగ్స్ కాలేజీలో అధ్యాపకుడిగా చేరారు. రాబోయే 10-15 ఏళ్లలో ప్రపంచ విద్య కోసం భారతీయ విద్యార్థుల డిమాండ్ గణనీయంగా పెరుగుతుందని ఆయన అభిప్రాయపడ్డారు. భారత్‌లోనూ యూకే విశ్వవిద్యాలయాల తమ క్యాంపస్‌లు ఏర్పాటుపై ఆసక్తి చూపుతున్నాయని, ఈ దిశగా సౌతాంప్టన్, సర్రే యూనివర్సిటీలు తీసుకున్న చొరవను ఆయన స్వాగతించారు.