ఐసీసీ టీమ్‌ ఆఫ్‌ ది టోర్నీ ప్రకటన.. భారత్ నుంచి ఐదుగురు, రోహిత్‌ శర్మకు దక్కని చోటు

అంతర్జాతీయ క్రికెట్‌ మండలి (ICC) ఛాంపియన్స్‌ ట్రోఫీ-2025 టీమ్‌ ఆఫ్‌ ది టోర్నమెంట్‌ను సోమవారం (మార్చి 10) ప్రకటించింది. ఈ పదకొండు మంది సభ్యుల టీమ్‌లో ఏకంగా ఐదుగురు భారత ప్లేయర్లకు చోటు దక్కింది. ఆతిథ్య పాకిస్థాన్‌ నుంచి ఒక్క ప్లేయర్‌ కూడా ఐసీసీ ఎంపిక చేసిన జట్టులో లేడు. భారత్ తర్వాత నలుగురు న్యూజిలాండ్ ప్లేయర్లు ఈ జట్టులో ఉన్నారు. అఫ్ఘానిస్థాన్‌కు చెందిన ఇద్దరికి కూడా ఈ జట్టులో చోటు దక్కింది. మొత్తంగా ఈ టోర్నీలో 8 జట్లు పాల్గొనగా.. అందులో మూడు దేశాల నుంచే ఆటగాళ్లు ‘ఐసీసీ టీమ్‌ ఆఫ్ ది టోర్నమెంట్‌’కు ఎంపిక కావడం గమనార్హం.

డిఫెండింగ్‌ ఛాంపియన్‌గా బరిలోకి దిగి ఒక్క మ్యాచ్ కూడా గెలవకుండానే టోర్నీ నుంచి నిష్క్రమించింది పాకిస్థాన్. దీంతో ఆ జట్టు నుంచి ఒక్కరికి కూడా ఐసీసీ ఎంపిక చేసిన జట్టులో చోటు దక్కలేదు. ఇదే సమయంలో దక్షిణాఫ్రికా, ఆస్ట్రేలియా, ఇంగ్లండ్‌, బంగ్లాదేశ్‌ జట్ల నుంచి కూడా ఒక్క ఆటగాడు కూడా ఐసీసీ జట్టులో స్థానం సంపాదించలేకపోయాడు.

ఛాంపియన్‌గా నిలిచిన భారత్‌ నుంచి ఐదుగురు ఆటగాళ్లు చోటు సంపాదించారు. అందులో విరాట్ కోహ్లీ, శ్రేయస్ అయ్యర్‌, కేఎల్ రాహుల్‌, మహమ్మద్ షమీ, వరుణ్ చక్రవర్తి ఉన్నారు. అక్షర్‌ పటేల్ 12వ ఆటగాడిగా చోటు సంపాదించాడు. ఈ జట్టు కెప్టెన్‌గా న్యూజిలాండ్ కెప్టెన్ మిచెల్ శాంట్నర్‌ ఎంపికయ్యాడు. టీమిండియాను ఛాంపియన్‌గా నిలిపిన రోహిత్ శర్మను మాత్రం పరిగణనలోకి తీసుకోకపోవడం గమనార్హం.

ఐసీసీ ప్లేయర్ ఆఫ్ ది ఛాంపియన్స్ ట్రోఫీ 2025కి ఎంపికైన ఆటగాళ్లు:

రచిన్‌ రవీంద్ర (న్యూజిలాండ్‌), ఇబ్రహీం జద్రాన్‌ (అఫ్ఘానిస్థాన్‌), విరాట్‌ కోహ్లీ (భారత్‌), శ్రేయస్‌ అయ్యర్‌ (భారత్‌), కేఎల్‌ రాహుల్‌ (భారత్‌), గ్లెన్‌ ఫిలిప్స్‌ (న్యూజిలాండ్‌), అజ్మతుల్లా ఒమర్జాయ్‌ (అఫ్ఘానిస్థాన్‌), మిచెల్‌ సాంట్నర్‌ (కెప్టెన్‌, న్యూజిలాండ్‌), మ్యాట్‌ హెన్రీ (న్యూజిలాండ్‌), వరుణ్‌ చక్రవర్తి (భారత్‌). 12వ ఆటగాడిగా భారత్‌కు చెందిన అక్షర్‌ పటేల్‌ ఉన్నాడు. పాకిస్థాన్ వేదికగా ఫిబ్రవరి 19న ప్రారంభమైన ఈ టోర్నీలో మార్చి 9న దుబాయ్‌లో జరిగిన ఫైనల్‌తో ముగిసింది.