ప్రాక్టీస్‌లో షాట్ల మోత,,,ఆయుష్ బదోనీ ఆరు సిక్సర్లు

ఐపీఎల్ 2025 మరికొద్ది రోజుల్లో ప్రారంభం కానుండటంతో అన్ని జట్లు ప్రాక్టీస్ మొదలుపెట్టాయి. దాదాపు ఆటగాళ్లంతా తమ తమ జట్ల ప్రాక్టీస్ క్యాంప్‌లో అడుగుపెట్టారు. లక్నో సూపర్ జెయింట్స్ ఆటగాడు ఆయుష్ బదోనీ ప్రాక్టీస్‌లో షాట్ల మోత మోగిస్తున్నాడు. ఐపీఎల్‌ అరంగేట్రంలోనే అద్భుతంగా రాణించి అతని పేరును అందరూ గుర్తు పెట్టుకునేలా చేసిన ఆయుష్ ఈ సీజన్‌లోనూ తనదైన మార్క్ చూయించేందుకు సిద్ధంగా ఉన్నాడు.

లక్నో సూపర్ జెయింట్స్ ప్రాక్టీస్ క్యాంప్‌లో ఆయుష్ బదోనీ నెట్స్‌లో చెమటోడుస్తున్నాడు. గురువారం ప్రాక్టీస్‌లో ఏకంగా ఆరు బంతులకు ఆరు సిక్సర్లు బాదాడు. ఒక్కో షాట్ ఒక్కో వైపు బాదుతూ ఐపీఎల్ 2025కి తాను రెడీ అని చెప్పాడు. బదోనీ ఆటతీరు చూసిన సపోర్టింగ్ స్టాఫ్ వెరీ గుడ్ అంటూ మెచ్చుకున్నారు. ఆ వీడియోను లక్నో సూపర్ జెయింట్స్ తన అధికారిక సోషల్ మీడియాలో అకౌంట్లలో పోస్ట్ చేసింది.

లక్నో సూపర్ జెయింట్స్ జట్టు 2022లో ఐపీఎల్‌‌లో అడుగుపెట్టింది. ఆ ఏడాదే ఫైనల్స్ చేరుకుని అందర్నీ ఆశ్చర్యపరిచింది. ఐపీఎల్ 2022, 2023లో లక్నోకి గౌతమ్ గంభీర్ మెంటార్‌గా వ్యవహరించాడు. ఆయుష్ బదోనీని జట్టులోకి తీసుకోవడానికి కూడా గౌతమ్ గంభీరే కారణం. 2022 సీజన్‌లో బదోనీ కేవలం బ్యాట్‌తోనే కాకుండా బంతితోనూ రాణించాడు.

ఐపీఎల్ 2022లో 13 మ్యాచ్‌లు ఆడిన బదోనీ 54 పరుగుల హైయెస్ట్‌తో 161 పరుగులు చేశాడు. అదే సీజన్‌లో కేవలం రెండు ఓవర్లు బౌలింగ్ చేసి రెండు వికెట్లు కూడా తీసుకున్నాడు. ఐపీఎల్ 2023లో 15 మ్యాచ్‌లలో 238 పరుగులు చేశాడు. ఆ ఏడాది 59 బెస్ట్‌తో 138.37 స్ట్రయిక్‌రేట్‌తో రాణించాడు. ఐపీఎల్ 2024లో రెండు హాఫ్ సెంచరీలు నమోదు చేశాడు. 14 మ్యాచ్‌లు ఆడిన బదోనీ 55 బెస్ట్‌తో 235 పరుగులు చేశాడు.

ఐపీఎల్ 2022లో బదోనీని ప్రారంభ ధర రూ.20 లక్షలకు లక్నో సూపర్ జెయింట్స్ ఫ్రాంచైజీ కొనుగోలు చేసింది. ఐపీఎల్ 2025 మెగా వేలానికి ముందు రూ.4 కోట్ల ధరకు బదోనీని రిటైన్ చేసుకుంది. ఈ ఏడాది ఐపీఎల్‌లో బదోనీ తన సత్తా చూయించాలని ఉన్నాడు.

రిషబ్ పంత్ (కెప్టెన్), డేవిడ్ మిల్లర్, ఎయిడెన్ మర్కరమ్, ఆర్యన్ జ్యూయల్, హిమ్మత్ సింగ్, మాథ్యూ బ్రీట్జ్కీ, నికోలస్ పూరాన్, మిచ్ మార్ష్, అబ్దుల్ సమ్మద్, షాబాజ్ అహ్మద్, యువరాజ్ చౌదరి, రాజవర్ధన్, అర్షిన్ కులకర్ణి, ఆయుష్ బదోనీ, ఆవేశ్ ఖాన్, ఆకాష్ దీప్, సిద్ధార్థ్, దిగ్వేష్ సింగ్, ఆకాశ్ సింగ్, షామర్ జోసఫ్, ప్రిన్స్ యాదవ్, మయాంక్ యాదవ్, మోషిన్ ఖాన్, రవి బిష్ణోయ్.