బరువు తగ్గడానికి రోజూ వాకింగ్ఎలా, ఏ పద్ధతుల్లో

ఈ రోజుల్లో చాలా మంది అధిక బరువు, ఊబకాయం సమస్యలతో బాధపడుతున్నారు. ఒక వ్యక్తి ఆహారపు అలవాట్లు, చెడు జీవనశైలి అతని ఆరోగ్యంపై ప్రత్యక్ష ప్రభావాన్ని చూపుతాయి. ఆహారపు అలవాట్ల కారణంగా అధిక బరువు, బెల్లీ ఫ్యాట్ సమస్యలతో బాధపడుతున్నారు. అయితే, బరువు తగ్గడానికి వాకింగ్ బెస్ట్ ఆప్షన్. బరువు తగ్గడానికి, ఫిట్‌గా ఉండటానికి నడక మంచి మార్గం అంటున్నారు నిపుణులు. ఇది అన్ని వయసుల వారికి, ఫిటెనెస్ స్థాయిల వారికి తగిన వ్యాయామం. బరువు తగ్గడానికి కొన్ని సాధారణ నడక పద్ధతులను ఫాలో అవ్వడం ద్వారా ఫ్యాట్‌ను వేగంగా కరిగించవచ్చని నిపుణులు అంటున్నారు. ఆ టెక్నిక్స్ ఏంటో తెలుసుకుందాం.

వేగాన్ని పెంచుకోండి

మీరు ఎప్పుడు వ్యాయామం చేయకపోతే.. మొదటి సారి వాకింగ్ వెళ్తుంటే నెమ్మదిగా నడక ప్రారంభించండి. రోజులు గడిచే కొద్దీ నడక వేగంతో పాటు సమయాన్ని కూడా పెంచుకోండి. గుండె ఆరోగ్యాన్ని కాపాడుకోవడానికి.. నడుస్తున్నప్పుడు మీ వేగాన్ని పెంచడం చాలా ముఖ్యం. నెమ్మదిగా నడవడానికి బదులుగా, వేగంగా లేదా మితమైన వేగంతో నడవడం మరింత ప్రయోజనకరంగా ఉంటుంది. ఇది గుండె పనితీరును మెరుగుపరుస్తుంది. కేలరీలను బర్న్ చేయడంలో సహాయపడుతుంది. శ్వాస తీసుకునేంత వేగంగా నడవాలి. కానీ మాట్లాడలేనంత వేగంగా కాదు.

రెస్ట్ అండ్ వాక్

​నడుస్తున్నప్పుడు రెస్ట్ అంటే కొంత సమయం పాటు వేగంగా నడిచి.. ఆపై కొంత సమయం సాధారణ వేగంతో నడవడం. అయితే, చాలా నెమ్మదిగా మాత్రం వాకింగ్ వద్దు. మీడియం స్పీడ్‍‌తో వాకింగ్ చేయండి. ఇలా రెస్ట్ అండ్ వాక్ వల్ల జీవక్రియ మెరుగుపడుతుంది. అంతేకాకుండా ఎక్కువ కొవ్వు కూడా బర్న్ అవుతుంది.

వంపు తిరిగి నడవడం

చాలా మంది వాకింగ్‌ను చదునైన నేలపై చేస్తుంటారు. ఈ పద్ధతి వల్ల ఎక్కువ ప్రయోజనం ఉండదు. అసమానంగా ఉన్న నేలపై నడవడం వల్ల కండరాలు కష్టపడి పనిచేస్తాయి. దీంతో, ఎక్కువ కేలరీలు బర్న్ అవుతాయి. మెట్లు ఎక్కడం, వంపులు తిరిగి నడవడం, ట్రెక్కింగ్ వంటి ఆప్షన్లు వాకింగ్‌లో భాగం చేసుకోండి. ఒకవేళ ట్రెక్కింగ్ కుదరకపోతే ట్రెడ్‌మిల్‌పై ఆప్షన్లు ఉంటాయి. వాటిని సెట్ చేసుకుని వాకింగ్ చేస్తే సరిపోతుంది.

బరువు పెంచుకోండి

​నడకను మరింత ప్రభావవంతంగా చేయడానికి చీలమండలు లేదా చేతులకు బరువులు యాడ్ చేయండి. ఇలా చేయడం వల్ల మీ కండరాలు గట్టిగా మారుతాయి. అంతేకాకుండా కేలరీలు బర్న్ చేయడంలో మీకు సాయపడుతుంది. ఇందుకోసం వెనుక బరువుఉన్న బ్యాగుతో వాకింగ్ చేయడం లేదా వెయిటెడ్ వెస్ట్ లేదా డంబెల్స్ వంటి వాటిని ఉపయోగించవచ్చంటున్నారు నిపుణులు.

చేతులను కదిలించండి

​కొందరు రోజూ నడుస్తారు. కానీ, ఏది నడించామంటే నడిచాం అన్నట్టు ఉంటుంది. చేతుల్ని స్థిరంగా ఉంచి నడవడం వల్ల ఎటువంటి ప్రయోజనం ఉండదు. చేతుల్ని కదిలించడం వల్ల ఎక్కువ కేలరీలు బర్న్ అవుతాయి. నడుస్తున్నప్పుడు చేతుల్ని కదిలించడం వల్ల సమతుల్యత, భంగిమ రెండూ మెరుగుపడతాయి. అంతేకాకుండా గాయం అయ్యే ప్రమాదం కూడా తగ్గుతుంది.

టైమ్ పెంచుకుంటూ పోండి

ప్రతి రోజూ కనీసం 30 నిమిషాల అయినా నడవాలంటున్నారు నిపుణులు. అయితే, ప్రతి రోజూ నడిచే వ్యవధిని పెంచుకుంటూ పోండి. ఒక రోజు 30 నిమిషాలు నడిస్తే ఆ తర్వాత 40 ఇలా పెంచుకుంటూపోండి. చివరకు రోజు గంట నడిచేలా ప్లాన్ చేయండి. ఎక్కువసేపు నడవడం వల్ల ఎక్కువ కేలరీలు ఖర్చవుతాయి. బరువు తగ్గాలన్న మీ కోరిక నెరవేరుతుంది.

రోజూ నడవడం

క్రమం తప్పకుండా నడవడం కూడా ముఖ్యం. బరువు తగ్గి, ఆరోగ్యంగా ఉండాలనుకుంటే ప్రతి రోజూ వాకింగ్ చేయాలి. లేదంటే వారానికి కనీసం ఐదు రోజులైనా సరే నడవండి. అంతేకాకుండా రోజుకు కనీసం 10 వేల అడుగులు నడిచేలా ప్లాన్ చేసుకోండి. అయితే, రోజూ నడవడం వల్ల ఎన్నో ప్రయోజనాలు ఉంటాయని నిపుణులు అంటున్నారు.

సరైన భంగిమ

​​వాకింగ్ చేయడంలో భంగిమ కీలకపాత్ర పోషిస్తుందని గుర్తించుకోండి. తప్పుడు భంగిమలో నడిస్తే అది ఆరోగ్యానికి ముప్పు అని తెలుసుకోండి. చాలా మంది మెడను వంచి వాకింగ్ చేస్తారు. ఇలా చేయడం వల్ల భుజాలతో సహా మొత్తం శరీరంపై భారం పడుతుంది. దీంతో.. బాడీ తీవ్ర నొప్పికి గురయ్యే ప్రమాదముంది. మరికొందరు మొబైల్ ఫోన్‌లో చూసుకుంటూ వాకింగ్ చేస్తుంటారు. ఇది కూడా మంచి భంగిమ కాదని తెలుసుకోండి. వీపును నిటారుగా ఉంచి, భుజాలను రిలాక్స్‌గా ఉంచి వాకింగ్ చేయండి. ఇలా నడవడం వల్ల మంచి ప్రయోజనాలు అందుతాయి. వంగి వాకింగ్ చేయడం వల్ల గుండెపై అదనపు ఒత్తిడిని కలిగిస్తుంది. ఇలా నడవడం గుండెకు మంచిది కాదు.