అలాంటి మహిళలు భర్తల నుంచి తాత్కాలిక భరణం కోరరాదు..: ఢిల్లీ హైకోర్టు

బాగా చదువుకుని, గతంలో మంచి ఉద్యోగం చేసిన, ప్రస్తుతం ఉద్యోగం సంపాదించే అవకాశం కల్గిన మహిళలు విడాకుల సమయంలో వారి భర్తల నుంచి తాత్కాలిక భరణం కోరడం సబబు కాదని ఢిల్లీ హైకోర్టు అభిప్రాయం వ్యక్తం చేసింది. మనుషులు సోమరిగా ఉండడాన్ని చట్టం ఏమాత్రం ప్రోత్సహించదని తెలిపింది. అలాగే ఓ మహిళ భర్త నుంచి తాత్కాలిక భరణం కావాలంటూ వేసిన పిటిషన్‌ను కొట్టేసింది. అంతేకాకుండా వెంటనే మంచి ఉద్యోగం కోసం ప్రయత్నించాలని ఆమెకు సూచించింది. ఈ కేసుకు సంబంధించిన పూర్తి వివరాలు మీకోసం.

2019లో పెళ్లి చేసుకున్న ఓ జంట.. వివాహం తర్వతా సింగపూర్‌కు వెళ్లిపోయింది. అయితే భర్త, అతడి కుటుంబ సభ్యులు వేధించడంతో భార్య.. 2021 ఫిబ్రవరి నెలలో తిరిగి భారత దేశానికి వచ్చేసింది. ఈ విషయాన్ని కుటుంబ సభ్యులకు చెప్పి మరీ విడాకుల కోసం దరఖాస్తు చేసుకుంది. అయితే తనకు ఉద్యోగం లేదని, తన పేరిట ఎలాంటి ఆస్తులు కూడా లేకపోవడంతో.. ప్రస్తుతం బంధువుల ఇంట్లో నివసిస్తున్నానని పిటిషన్‌లో వివరించింది. అందుకే తాత్కాలిక భరణం ఇప్పించాలంటూ ట్రయల్ కోర్టులో పిటిషన్ దాఖలు చేసింది.

దీంతో కోర్టు విచారణ చేపట్టగా.. ఆమె భర్త హాజరై షాకింగ్ కామెంట్లు చేశారు. ముఖ్యంగా తన భార్య ఆస్ట్రేలియాలో ఉన్నత విద్యను అభ్యసించిందని.. పెళ్లికి ముందు ఆమె అధిక వేతనం గల ఉద్యోగం చేసిందని చెప్పుకొచ్చారు. కేవలం నిరుద్యోగం ఆధారంగా తాత్కాలిక భరణం కోరడం.. చట్టాన్ని తప్పుదోవ పట్టించడం కిందకే వస్తుందని వివరించారు. ఇరు వైపుల వాదనలు విన్న న్యాయస్థానం షాకింగ్ నిర్ణయం తీసుకుంది. ముఖ్యంగా భార్య వేసిన పిటిషన్‌ను కొట్టేసింది. దీంతో తీవ్ర నిరాశకు గురైన భార్య ఢిల్లీ హైకోర్టును ఆశ్రయించింది.

ఈక్రమంలోనే నేడు గురువారం రోజు విచారణ జరిపిన ఢిల్లీ హైకోర్టు.. ట్రయల్ కోర్టు ఇచ్చిన తీర్పును సమర్థించింది. ఉన్నత విద్యార్హత, మంచి ఉద్యోగం సంపాదించే అవకాశం కల్గిన మహిళలు.. విడాకుల సమయంలో భర్తల నుంచి తాత్కాలిక భరణం కోరడం సబబు కాదని అభిప్రాయం వ్యక్తం చేసింది. నిరక్షరాస్యులు అయిన మహిళల మాదిరిగా భర్తలపై ఆధార పడడం తగదని హితవు పలికింది. ప్రపంచ జ్ఞానం కల్గిన అమ్మాయిలు సాధికారతకు ప్రయత్నించాలని సూచించింది. పిటిషన్‌ను కొట్టివేస్తూ.. మనుషులు సోమరిగా ఉండడాన్ని చట్టం ఏమాత్రం ప్రోత్సహించదని జస్టిస్ చంద్రధారీ సింగ్ వెల్లడించారు.