బీటెక్ విద్యార్థులకు అలర్ట్.. కీలక ప్రకటన చేసిన జేఎన్టీయూ

అనంతపురం జేఎన్టీయూ యూనివర్సిటీకి చెందిన వీసీ కాన్పరెన్స్ హాల్‌లో బోర్డు ఆఫ్ స్టడీస్ (BOS) సమావేశం నిర్వహించబడింది. ఈ సమావేశంలో వీసీ హెచ్.సుదర్శన రావు ముఖ్య అతిథిగా హాజరై.. యూనివర్సిటీ విద్యా ప్రణాళికలకు సంబంధించి కీలక ప్రకటనలు చేశారు. యూనివర్సిటీ పరిధిలోని బీటెక్ 3వ, 4వ సంవత్సరం విద్యార్థుల కోసం R23 సిలబస్‌లో విస్తృతమైన మార్పులు చేపట్టనున్నట్లు పేర్కొన్నారు.

ఈ కార్యక్రమంలో వీసీ హెచ్.సుదర్శన రావు మాట్లాడుతూ.. విద్యార్థుల అభ్యసన ప్రయాణంలో సరికొత్త మార్గాలను చూపే ఉద్దేశంతో సిలబస్‌లో మార్పులను అమలు చేయనున్నట్లు తెలిపారు. ఇందులో ప్రధానంగా సాంకేతిక పరిజ్ఞానం, పరిశ్రమకు అనుగుణమైన మార్పులు, ప్రాక్టికల్ అంశాల పట్ల ఎక్కువ దృష్టిని కేంద్రీకరించాలని ఆయన వివరించారు. 3వ, 4వ సంవత్సరాల బీటెక్ కోర్సుల్లో విద్యార్థులు ఒక వాణిజ్యపరమైన మౌలిక సదుపాయాలను సులభంగా అలవరుచుకునేలా సిలబస్‌లో మార్పులు చేసినట్లు తెలిపారు. వారి కెరీర్ అభివృద్ధికి ఇది ఎంతగానో ఉపయోగకరంగా నిలుస్తుందని వీసీ తెలిపారు.

ఈ కార్యక్రమంలో వీసీతో పాటు యూనివర్సిటీ రిజిస్ట్రార్ కృష్ణయ్య, డైరెక్టర్లు భానుమూర్తి, సత్యనారాయణతో పాటు.. ప్రొఫెసర్లు పాల్గొన్నారు. వారు కూడా ఈ మార్పులను విద్యార్థులకు సమర్థవంతంగా అందించడానికి ప్రతి ఒక్కరూ తమ పాత్రను నిర్వహించాలని సూచించారు. ప్రధానంగా... కొత్త సిలబస్‌లో విద్యార్థుల పోటీ సామర్థ్యాలను పెంచే విధంగా వివిధ సాంకేతిక అంశాలను, ప్రస్తుత పోటీ ప్రపంచంలోని ఉపాధి అవకాశాలను అందిపుచ్చుకునే విధంగా ఈ సిలబస్ ఉంటుందన్నారు.

పట్టా సాధించగానే సరిపోదు..!

ప్రస్తుత నైపుణ్యాలపైనే ఆధారపడకుండా.. మారుతున్న సాంకేతికతపై కూడా దృష్టి సారించాలన్నారు. దీని వల్ల విద్యార్థులని మరింత బలంగా తీర్చిదిద్దడం సాధ్యమవుతుందని వారి అభిప్రాయం. ఈ కార్యక్రమంలో పలు కీలక చర్చలు జరిగాయి. బీటెక్ విద్యార్థులు తమ చదువును కేవలం డిగ్రీ పట్టా సంపాదించడమే కాకుండా.. ప్రస్తుత కాలంలో విజయం సాధించేందుకు కావాల్సిన నైపుణ్యాలను కూడా పొందాలన్నారు.

ఇదిలా ఉండగా.. జేఎన్టీయూ అనంతపురం వీసీగా ఆచార్య సుదర్శన రావును ఫిబ్రవరి 18, 2025న నియమిస్తూ గవర్నర్ జస్టిస్ అబ్దుల్ నజీర్ ఉత్తర్వులు జారీ చేసిన విషయం తెలిసిందే. 1983లో జేఎన్టీయూ అనంతపురం ఇంజనీరింగ్ కళాశాలలో బీటెక్ పూర్తి చేసిన అతడు.. 1986 లో ఎంటెక్‌ను కంప్లీట్ చేశాడు. ఇండియన్ ఇన్స్టిట్యూట్ ఆఫ్ టెక్నాలజీ, ముంబైలో 1996 సంవత్సరంలో పీహెచ్‌డీని కూడా పూర్తి చేశారు. 37 సంవత్సరాలుగా బోధనా రంగంలో అతడికి అనుభవం ఉంది.