భార్య చేసిన డ్యాన్స్ రీల్ స్టేటస్ పెట్టుకున్న పోలీస్ ఆఫీసర్ సస్పెండ్

 పోలీస్ కానిస్టేబుల్ భార్య ఇటీవలే చేసిన ఓ రీల్‌ను సోషల్ మీడియాలో పోస్ట్ చేసింది. అందులో ఆమె అద్భుతంగా నృత్యం చేయగా భర్త కూడా దాన్ని పోస్ట్ చేశాడు. అయితే ఆ విషయం గుర్తించిన పైఅధికారులు మాత్రం ఆ పోలీస్ కానిస్టేబుల్‌ను ఉద్యోగంలోంచి సస్పెండ్ చేశారు. అందుకు కారణం ఆయన భార్య చేసిన రీలే కాగా.. ప్రజలంతా షాక్ అవుతున్నారు. ముఖ్యంగా సదరు కానిస్టేబుల్ సైతం సస్పెండ్డ్‌ కు గురయ్యాకే తన తప్పును గ్రహించగల్గాడు. మరి ఆ రీల్‌ల్ లో అతడి భార్య అంత చేయకూడదని పని ఏం చేసిందో మనం ఇప్పుడు తెలుసుకుందాం.

ఛండీగఢ్‌కు చెందిన సీనియర్ కానిస్టేబుల్ అజయ్ కుందుకు చాలా ఏళ్ల క్రితమే జ్యోతితో పెళ్లి జరిగింది. అయితే మొదటి నుంచి జ్యోతికి డ్యాన్స్, నటన, రీల్స్ అంటే పిచ్చి. దీంతో వీలు దొరికినప్పుడల్లా ఆమె రీల్స్ చేస్తూ సోషల్ మీడియాలో పెట్టుకునేది. అవి బాగున్నాయని అనిపిస్తే భర్త అయిన కానిస్టేబుల్ అజయ్ కుందు సైతం దాన్ని షేర్ చేసేవాడు. అయితే మార్చి 20వ తేదీ రోజు సాయంత్రం జ్యోతి తన వదిన పూజతో కలిసి గుడికి వెళ్లింది. అయితే ఇంటికి తిరిగి వస్తుండగా.. ఓ చోట ఆగి డ్యాన్స్ చేసింది. ఆమె వదిన ఈ వీడియోను రికార్డ్ చేయగా.. ఆమె మాత్రం పద్ధతిగా పంజాబీ డ్రెస్ వేసుకునే ఓ పాటకు స్టెప్పులు వేసింది.

ఆపై దాన్ని సోషల్ మీడియాలో పోస్ట్ చేయగా పెద్దగానే లైకులు, కామెంట్లు వచ్చాయి. ముఖ్యంగా జ్యోతి చేసిన రీల్ నచ్చడంతో.. భర్త అజయ్ కుందు సైతం దాన్ని తన ఇన్‌స్టాగ్రామ్ వేదికగా పోస్ట్ చేశాడు. అయితే దీన్ని చూసిన ఓ హెడ్ కానిస్టేబుల్ వెంటనే పోలీస్ స్టేషన్‌కు వెళ్లి.. అజయ్ కుందు సహా ఆయన భార్య జ్యోతిపై ఫిర్యాదు చేశాడు. ఇందుకు కారణం ఆమె నడిరోడ్డుపై డ్యాన్స్ చేయడం. ముఖ్యంగా సెక్టార్-20 గురుద్వారా చౌక్ వద్ద ఉన్న జీబ్రా క్రాసింగ్‌పై జ్యోతి డ్యాన్స్ చేయగా.. ట్రాఫిక్‌కు అంతరాయం కల్గింది. ఈమె డ్యాన్స్ అయిపోయేవరకు.. అనేక వాహనాలు అక్కడే ఆగిపోవాల్సి వచ్చింది.

ఎంత మంది వాహనదారులు ఇబ్బందులు పడ్డా.. జ్యోతి మాత్రం తన డ్యాన్స్ ఆపలేదని ఆమెపై వెంటనే చర్యలు తీసుకోవాలంటూ పోలీసులకు ఫిర్యాదు చేశాడు. కేసు నమోదు చేసుకున్న పోలీసులు.. నేరుగా హెడ్ కానిస్టేబుల్ చెప్పిన చోటుకు వెళ్లి సీసీటీవీ కెమెరాలను పరిశీలించారు. ఈక్రమంలోనే కానిస్టేబుల్ భార్య నిజంగానే ట్రాఫిక్‌కు అంతరాయం కల్గించిందని.. అలాగే ప్రజా భద్రతకు ప్రమాదం కల్పించిందంటూ సెక్షన్ 125, 292 మంరియు 3(5) కింద కేసులు నమోదు చేశారు. ఆమెపై మాత్రమే కాకుండా వీడియో తీసిన పూజపై కూడా కేసులు పెట్టారు. అలాగే సెక్టార్-19లో పని చేస్తున్న కానిస్టేబుల్ అజయ్ కుందు కూడా ఈ వీడియోను షేర్ చేయడంతో అతడిని ఉద్యోగంలోంచి సస్పెండ్ చేశారు.

అయితే త్వరగానే పూజ, జ్యోతిలకు బెయిల్ రాగా.. విడుదల అయి బయటకు వచ్చారు. మరోవైపు కానిస్టేబుల్ అజయ్ కుందును సస్పెండ్ చేయడం బాగాలేదంటూ పలువురు కామెంట్లు చేస్తున్నారు. తప్పు చేసింది భార్య అయితే అతడికి ఎందుకు శిక్ష అని కొందరు, మంచి పని చేశారు.. భార్య తప్పు చేసినా తప్పని చెప్పలేకపోయిన ఆయనకు కూడా శిక్ష పడాలని మరికొందరు చెబుతున్నారు.