ఆంధ్రా ఫోటోగ్రాఫర్-అమెరికా అమ్మాయి ,,,, ఇంట్రెస్టింగ్ ఇన్‌స్టా లవ్ స్టోరీ

అమెరికాకు చెందిన అమ్మాయి, భారత్‌కు చెందిన అబ్బాయి మధ్య ఏర్పడిన పరిచయం ప్రేమగా మారడంతో. పెళ్లి చేసుకోవాలని నిర్ణయించుకున్నారు. అమెరికాకు చెందిన ఒక మహిళ.. తన ఇన్‌స్టాగ్రామ్‌ స్నేహితుడ్ని వివాహం చేసుకోడానికి భారత్‌కు వచ్చింది. ప్రేమకు సరిహద్దులు, కులం, మతం, ప్రాంతీయ బేధాలు లేవని.. మరోసారి ఈ సంఘటన నిరూపించింది. వివరాల్లోకి వెళ్తే.. అమెరికాకు చెందిన జాక్లిన్ ఫోరెరోకి.. ఆంధ్రప్రదేశ్‌కు చెందిన ఫోటోగ్రాఫర్ చందన్ సింగ్ రాజ్‌పుత్ అనే యువకుడితో ఇన్‌స్టాలో పరిచయం ఏర్పడింది. ఈ పరిచయం స్నేహానికి దారితీసి ప్రేమగా మారడంతో.. వివాహం బంధంతో ఒక్కటి కావాలని నిర్ణయించుకున్నారు. ఇందుకు ఇరు కుటుంబాల పెద్దలను ఒప్పించారు.

ఈ క్రమంలో జాక్లిన్ తన తల్లితో కలిసి అమెరికా నుంచి ఏపీకి వచ్చింది. తమ ప్రేమ కథ ఎక్కడ? ఎలా మొదలైంది? పూర్తి వివరాలతో కూడిన వీడియోను ఆమె ఇన్‌స్టాలో షేర్ చేసింది. ‘హాయ్ అనే ఓ పలకరింపుతో ఇన్‌స్టాగ్రామ్‌లో మా పరిచయం మొదలయ్యింది. ఆ తర్వాత బలపడి మనస్ఫూర్తిగా ఒకరి ఇష్టాలు, కష్టాలు, అభిరుచులు, అభిప్రాయాలు మరొకరం తెలుసుకునే స్థాయికి చేరింది.. మా 14 నెలల పరిచయంలో మేము ఎప్పుడు ప్రేమలో పడ్డామో మాకే తెలియదు.. త్వరలోనే మా జీవితంలో అతి పెద్ద అధ్యాయం మొదలుపెట్టబోతున్నాం’ అని తెలిపింది. ‘మా పరిచయం సాధారణంగానే మొదలైంది. కానీ అది ప్రేమగా మారుతుందని నేను ఊహించలేదు. త్వరలోనే మేమిద్దరం ప్రేమలో పడ్డాం.. ఇది నా జీవితంలో ఒక కొత్త అధ్యాయం’ అన్నారు.

‘చందన్‌ చాలా సాదాసీదాగా ఉంటాడు.. అతడ్ని నేనే ముందుగా పలకరించాను. ఇరువురి అభిరుచులు చాలా వరకు కలిశాయి.. మేం ఎనిమిది నెలలుగా ఆన్‌లైన్ డేటింగ్‌లో ఉన్నాం.. పెళ్లితో మా ప్రేమ, బంధాన్ని శాశ్వతం చేసుకోవాలని నిర్ణయించుకున్నాం.. ఈ విషయం మా అమ్మకు చెప్పడంతో ఆమె అంగీకరించింది.. చందన్‌తో పెళ్లి కోసం. మా అమ్మ, నేను ఇండియా వచ్చాం.. కానీ, మా బంధన్ని చూసి రకరకాలుగా కామెంట్స్ చేశారు. మరీ ముఖ్యంగా మా మధ్య ఉన్న వయసు తేడా గురించి విమర్శలు చేశారు’ అని తెలిపింది.

‘‘వయసులో నేను చందన్ కన్నా 9 ఏళ్లు పెద్ద.. కానీ మాకు ఇధేమంత సమస్య అనిపించలేదు’ అని ఫోరెరో చెప్పడం గమనార్హం. ‘మా జర్నీలో ఎన్నో ఇబ్బందులు, సవాళ్లను ఎదుర్కున్నాం. కానీ దేవుడి ఆశీస్సులతో వాటన్నింటిని అధిగమించాం.. ఆ దేవుడే మిమ్మల్ని కలిపి..కలిసి ఉండాలని దీవించాడు’ అమెరికా అమ్మాయి చెప్పుకొచ్చింది. ప్రస్తుతం ఈ ప్రేమకథ సోషల్ మీడియాలో వైరల్ అవుతోంది.

నెటిజన్లు ఈ జంటకు మద్దతుగా నిలుస్తున్నారు. వయసు గురించి పట్టించుకోవద్దని, విమర్శలను మనసుకు తీసుకోవద్దని సూచిస్తున్నారు. జీవితంలో మీరు సంతోషంగా ముందుకు సాగండి అంటూ కామెంట్లు పెడుతున్నారు. కాగా, ఈ జంట పేరుతో ఓ యూట్యూబ్ ఛానెల్ కూడా ఉంది. కాగా, చందన్‌ సింగ్ రాజ్‌పుత్‌‌ది ఆంధ్రప్రదేశ్‌లోని ఓ మారుమూల గ్రామమని చెబుతున్నా.. ఆ ఊరు పేరు ఏంటి? అనేది స్పష్టంగా తెలియదు. అంతేకాదు, అతడు తెలుగులో కూడా మాట్లాడటం లేదు. ఈ జంట అమెరికాలో స్థిరపడాలని భావిస్తోంది. అందుకు వీసా కోసం చందన్ దరఖాస్తు చేసుకున్నాడు.