మసీదు లోపలకు వచ్చి కాల్పులు..
international | Suryaa Desk | Published : Fri, Mar 15, 2019, 09:34 AM
న్యూజిలాండ్ సెంట్రల్ క్రైస్ట్చర్చ్ నగరంలోని ఓ మసీదులో గుర్తు తెలియని ఆగంతుకుడు కాల్పులకు తెగబడ్డాడు. ఈ సంఘటనలో ఆరుగురు అక్కడికక్కడే ప్రాణాలు కోల్పోగా.. పలువురు తీవ్రంగా గాయపడినట్లు స్థానిక మీడియా తెలిపింది. నల్లరంగు దుస్తులు ధరించిన ఓ వ్యక్తి అల్ నూర్ మసీదు లోపలకు వచ్చి కాల్పులు జరిపాడు. కాల్పులకు తెగబడిన వ్యక్తిపై భద్రతా సిబ్బంది ఎదురుకాల్పులు జరుపుతున్నారు. క్షతగాత్రుల్ని అంబులెన్సులో స్థానిక ఆసుపత్రులకు తరలిస్తున్నారు. నగరంలోని ప్రజలు ఎవరూ బయటికి రావద్దని పోలీసులు హెచ్చరికలు జారీ చేశారు. ఈ దాడితో భయభ్రాంతులకు లోనైన సమీప ప్రజలు అక్కడి నుంచి పరుగులు తీశారు. మసీదులో పలు మృతదేహాలు పడి ఉన్నట్లు ప్రత్యక్ష సాక్షులు తెలిపారు.
టెస్ట్ సిరీస్లో భాగంగా న్యూజిలాండ్తో జట్టుతో మూడో టెస్టు ఆడనున్న బంగ్లాదేశ్ క్రికెట్ జట్టు దాడి సమయంలో ఆ ప్రాంతంలోనే ఉండడం గమనార్హం. అదృష్టవశాత్తూ వారు ఈ దాడి నుంచి తప్పించుకున్నారు. తాము సురక్షితంగా తప్పించుకున్నట్లు క్రికెటర్ తమీమ్ ఇక్బాల్ ట్వీట్ చేశాడు. ‘‘దాడి నుంచి మొత్తం జట్టు తప్పించుకుంది. ఇది భయంకరమైన అనుభవం. మీ అందరి ఆశీస్సులే మమ్మల్ని కాపాడాయి’’ అని తమీమ్ పేర్కొన్నాడు.
|
|