పెళ్లి సమయంలో అమ్మాయికి పెట్టిన బంగారం తిరిగిచ్చేయాల్సిందే: హైకోర్టు

 కేరళ హైకోర్టు ఓ విడాకుల కేసులో కీలక వ్యాఖ్యలు చేసింది. ముఖ్యంగా పెళ్లి సమయంలో వధువుకు బహుమతిగా ఇచ్చే బంగారం, నగదును ఆమె ప్రత్యేక ఆస్తి లేక స్త్రీధనంగా పరిగణించాలంటూ సంచలన తీర్పును ఇచ్చింది. ఓ మహిళ తన వివాహం సమయంలో పుట్టింటి వాళ్లు, బంధువులు పెట్టిన బంగారం, ఇతర ఆభరణాలను, వస్తువులను తిరిగి ఇచ్చేయాలంటూ చేసిన అభ్యర్థనను తోసిపుచ్చింది. ముఖ్యంగా బంగారం తిరిగిచ్చేయాలని చెప్పిన న్యాయస్థానం.. మిగతా వస్తువులను మాత్రం ఇప్పించడానికి నిరాకరించింది. కింద కోర్టులో సదరు మహిళ చేసిన అభ్యర్థనను తిరస్కరించగా... హైకోర్టులో అప్పీల్ చేసుకోవడంతో ఆమెకు అనుకూలంగా తీర్పు వచ్చింది. ఆ పూర్తి వివరాలు మీకోసం.

కేరళలోలని ఏర్నాకుళం కలమస్సేరికి చెందిన ఒక మహిళకు 2010లో వివాహం జరిగింది. అయితే పెళ్లి సమయంలో ఆమెకు కుటుంబం, బంధువుల నుంచి 71 సవర్ల (ఒక సవర అంటే 8 గ్రాములు కాగా.. 71 సవర్లకు 568 గ్రాములు. మొత్తంగా 56 తులాలు) బంగారం వచ్చింది. అయితే ఈ బంగారం మొత్తాన్ని మహిళ తన అత్తగారింటికి తీసుకెళ్లగా.. మంగళ సూత్రం, ఒక గాజు, చేతికి ఉన్న రెండు ఉంగరాలు తప్ప మిగతా బంగారం మొత్తాన్ని భద్రపరుస్తామని చెబుతూ అత్తింటి వాళ్లే తీసుకున్నారు. అయితే తర్వాత కొన్ని రోజులకే భర్త అదనపు కట్నంగా రూ.5 లక్షలు కావాలని మహిళను అడగడంతో ఇరువురి మధ్య గొడవ జరిగింది.

ఆపై మహిళ తల్లిదండ్రులకు విషయం చెప్పగా.. వారు కూడా వియ్యంకులతో గొడవ పడ్డారు. ఈక్రమంలోనే మహిళ పుట్టింటికి తిరిగి వెళ్లింది. ఇలా రెండు కుటుంబాల మధ్య గొడవలు మరింత ఎక్కువకాగా.. మహిళ తన భర్తతో విడాకులకు సిద్ధం అయింది. వాళ్లు కూడా ఇందుకు ఓకే చెప్పారు. కానీ మహిళ నుంచి తీసుకున్న 56 తులాల బంగారాన్ని మాత్రం తిరిగివ్వమన్నారు. దీంతో మహిళ జిల్లా కోర్టును ఆశ్రయించింది. ముఖ్యంగా తన బంగారం, బహుమతులు, ఆభరణాలు, ఇతర వస్తువులను ఇప్పించాలంటూ న్యాయస్థానాన్ని కోరింది. కానీ మహిళ అభ్యర్థనను కోర్టు తిరస్కరించింది. దాంతో ఆమె హైకోర్టుకు వెళ్లారు. ఈక్రమంలోనే నేడు ధర్మాసనం విచారణ జరిపింది.

 తన తల్లిదండ్రులు ఫిక్స్డ్ డిపాజిట్లతోనే పెళ్లికి పెట్టిన బంగారాన్ని కనుగోలు చేశారని, అందుకు సంబంధించిన సాక్ష్యాలను కూడా కోర్టులో చూపించింది మహిళ. అలాగే దాచి పెడతామని చెబుతూ అత్తింటి వారే తీసుకున్నారని తిరిగి మళ్లీ ఇవ్వలేదని వాపోయింది. ఇదంతా విన్న కేరళ హైకోర్టు.. ఆమెకు అనుకూలంగా తీర్పును ఇచ్చింది. విడాకుల ప్రక్రియలో భాగంగా మిగిలినదిపోను 59.5 సవర్ల బంగారం లేక దాని ప్రస్తుత మార్కెట్ విలువ ప్రకారం నగదు చెల్లించాలని ఆమె భర్త కుటుంబానికి ఆదేశాలు జారీ చేసింది. కానీ బంధువులు పెళ్లి సమయంలో పెట్టిన బంగారం, గృహోపకరణాలకు సంబంధించి ఎలాంటి ఆధారాలు చూపించక పోవడంతో.. ఈమె చేసిన అభ్యర్థనను తోసి పుచ్చింది.

కానీ ఈ సందర్భాంగానే మాట్లాడుతూ.. వివాహ సమయంలో వధువుకు వచ్చే బంగారాన్ని దాచి పెడతామని అత్తింటి వాళ్లే తీసుకుంటున్నారని.. ఇలాంటి బదిలీల విషయంలో రాత పూర్వకంగా ఎలాంటి రికార్డు లేకపోవడంతో ఆమె దాన్ని తిరిగి తీసుకునే అవకాశాలు చాలా తక్కువని చెప్పింది. గృహహింస, వరకట్న వేధింపులు లేక విడాకల వంటి పరిస్థితి తలెత్తినప్పుడు దాన్ని వెనక్కి తీసుకోవడంలో మరిన్ని సమస్యలు వస్తున్నాయని.. న్యాయస్థానాలు ఈ పరిస్థితిని పరిగణలోకి తీసుకోవాలని వివరించింది. క్రిమినల్ కేసుల్లో మాదిరిగానే చట్టపరమైన సాక్ష్యాలు కావాలని ఒత్తిడి చేయలేమని వ్యాఖ్యానించింది.