ట్రంప్, హార్వర్డ్ వర్సిటీ మధ్య కొనసాగుతోన్న వివాదం,,,వర్సిటీకి నిధులు నిలిపివేత

అమెరికా అధ్యక్షుడు డొనాల్డ్ ట్రంప్, ప్రపంచ ప్రఖ్యాత హార్వర్డ్ యూనివర్సిటీ మధ్య వివాదం మరింత తీవ్రమైంది. ఆ విద్యా సంస్థకు ఫెడరల్ గ్రాంట్లు నిలిపివేసినట్టు అమెరికా విద్యాశాఖ మంత్రి లిండా మెక్‌మహాన్ సోమవారం అధికారికంగా ప్రకటించారు. హార్వర్డ్ చీఫ్‌కి లేఖ పంపిన మెక్‌మన్.. ‘ఇకపై మీరు అమెరికా ప్రభుత్వ గ్రాంట్ల కోసం దరఖాస్తు చేయకండి... మేము ఏ గ్రాంట్‌ను కూడా ఇవ్వం’ అని తేల్చి చెప్పారు. ఈ లేఖను ప్రభుత్వం ఆన్‌లైన్‌లోనూ ఉంచింది. నిధుల నిలిపివేతకు వ్యతిరేకంగా హార్వర్డ్ వేసిన పిటిషన్‌పై కోర్టులో విచారణ జరుగుతున్న నేపథ్యంలో ఈ ప్రకటన రావడంతో వివాదం కొత్త మలుపు తిరిగింది.

ట్రంప్ యంత్రాంగం గత కొన్ని వారాలుగా హార్వర్డ్‌తో పాటు ఇతర ఉన్నత విద్యాసంస్థల క్యాంపస్‌లలో హమాస్ అనుకూల ప్రదర్శనలకు అనుమతిస్తూ.. యూదులపై వ్యతిరేకతను (యాంటీ-సెమిటిజం) ప్రోత్సహిస్తున్నాయని ఆరోపిస్తోంది. అందుకే వాటికి నిధులు, పన్ను మినహాయింపు హోదా రద్దు చేసి, విదేశీ విద్యార్థుల ప్రవేశాలను నిలిపివేస్తామని హెచ్చరించింది.

హార్వర్డ్‌పై తీవ్రమైన ఆరోపణలు

హార్వర్‌పై మెక్‌మహాన్ ప్రకటనలో తీవ్ర విమర్శలు గుప్పించారు. యూనివర్సిటీ చట్టబద్ధమైన విధానాలు, నైతిక బాధ్యతలు, పారదర్శకత, విద్యా ప్రమాణాల్లో పూర్తిగా విఫలమైందని ఆరోపించారు. ప్రముఖంగా యూనివర్సిటీలలో ఉగ్రవాదులను అనుకూలంగా నిరసనలు, ఆందోళనలకు అనుమతిస్తున్నారని దుయ్యబట్టారు. యూదులపై వ్యతిరేకతను ప్రోత్సహిస్తున్నారని దుయ్యబట్టారు.

నిధులు నిలిపివేత

ఏప్రీల్ మధ్యలో ట్రంప్ ప్రభుత్వం హార్వర్డ్‌కు అందజేసే ఫెడరల్ గ్రాంట్ 2.2 బిలియన్ డాలర్లను తాత్కాలికంగా నిలిపివేసింది. మొత్తంగా 9 బిలియన్ డాలర్లు నిధులపై ప్రస్తుతం సమీక్షిస్తోంది. తాజా నిర్ణయాన్ని ‘హార్వర్డ్‌కి కొత్త గ్రాంట్లు పూర్తిగా ముగిసిన ఘట్టం’గా మెక్‌మహన్ అభివర్ణించారు.

 విద్యాసంస్థలపై ట్రంప్ ఉక్కుపాదం

రెండోసారి అమెరికా అధ్యక్షుడిగా డొనాల్డ్ ట్రంప్ బాధ్యతలు చేపట్టిన తర్వాత విశ్వవిద్యాలయాలపై పలు ఆంక్షలు విధిస్తున్నారు. ‘విభిన్నత కార్యక్రమాల’ పేరుతో నడుస్తున్న మైనార్టీల అనుకూల విధానాలు, అకడెమిక్ స్వేచ్ఛను దెబ్బతీస్తున్నాయన్న ఆరోపణలతో చర్యలు తీసుకుంటున్నారు. లెఫ్ట్ భావజాలానికి మాత్రమే వేదికగా మారుతున్నాయన్న విమర్శలు చేస్తున్నారు.

అమెరికా వర్సిటీల్లో భారతీయ విద్యార్థుల ఆందోళన.. కారణం ఇదే

హమాస్ మద్దతు నిరసనలపై విదేశీ విద్యార్థులకు వీసా రద్దు

అక్టోబర్ 7, 2023 నాటి హమాస్ దాడికి ప్రతీకారంగా గాజాపై ఇజ్రాయేల్‌ చేస్తోన్న యుద్ధాన్ని వ్యతిరేకిస్తూ పాలస్తీనాకు మద్దతుగా నిరసనలు నిర్వహించిన విదేశీ విద్యార్థులపై వీసా రద్దు చర్యలు చేపట్టినట్టు ట్రంప్ ప్రభుత్వం తెలిపింది. నిరసనలను ఉగ్రవాద మద్దతుగా భావిస్తూ విద్యార్థులపై చర్యలు తీసుకోవాలని భావిస్తోంది.

ప్రపంచంలోనే అత్యంత ధనిక విశ్వవిద్యాలయం హార్వర్డ్

2024 నాటికి 53.2 బిలియన్ డాలర్ల నిధులతో హార్వర్డ్ యూనివర్సిటీ ప్రపంచంలోని అత్యంత సంపన్న విద్యా సంస్థల్లో మొదటిస్థానంలో ఉంది. అయినప్పటికీ ట్రంప్ యంత్రాంగం హార్వర్డ్‌కి నిధులు నిలిపివేయడం ప్రపంచవ్యాప్తంగా చర్చనీయాంశమైంది