నైరుతి రుతుపవనాలపై బిగ్ అప్‌డేట్,,,,సాధారణం కంటే 5 రోజుల ముందుగానే

దేశంలోని అన్నదాతలకు భారత వాతావరణ శాఖ (ఐఎండీ) గుడ్‌న్యూస్ అందించింది. నైరుతి రుతుపవనాల రాక గురించి తాజాగా అప్‌డేట్ ఇచ్చింది. సాధారణంగా నైరుతి రుతుపవనాలు కేరళను తాకే తేదీ కంటే ముందుగానే ఈసారి తొలకరి జల్లులు పడతాయని అంచనా వేసింది. ఈనెల 27వ తేదీనే నైరుతి రుతుపవనాలు కేరళను తాకనున్నట్లు వెల్లడించింది. సాధారణం కన్నా 5 రోజుల ముందే నైరుతి రుతుపవనాలు కేరళలోకి ప్రవేశిస్తాయని ఐఎండీ అధికారులు తాజాగా వెల్లడించారు. ఇది ఖరీఫ్ పంటలు సాగు చేసే రైతులకు సహాయపడుతుందని పేర్కొన్నారు. 2005 నుంచి ఐఎండీ నైరుతి రుతుపవనాల గురించి ఈ ముందస్తు అంచనాలు చేస్తోంది. గత 20 ఏళ్లలో ఒకే ఒక్కసారి మినహా మిగిలిన అన్ని ఏడాదుల్లో ఐఎండీ అంచనాలు చాలా వరకు నిజమయ్యాయని తెలిపింది.

జూన్ 1వ తేదీన కేరళను నైరుతి రుతుపవనాలు తాకుతాయి. ఆ తర్వాత క్రమంగా దేశవ్యాప్తంగా వర్షాలు మొదలవుతాయి. జులై 8వ తేదీ నాటికి ఇవి దేశమంతా విస్తరిస్తాయి. ఆ తర్వాత వాయవ్య భారతం నుంచి సెప్టెంబరు 17వ తేదీతో రుతుపవనాల ఉపసంహరణ ప్రారంభమై అక్టోబరు 15వ తేదీ నాటికి ముగుస్తుంది. ప్రస్తుతం ఇవి జూన్ 1వ తేదీ కంటే ముందుగానే మే 27వ తేదీనే కేరళను తాకే అవకాశం ఉందని తాజాగా ఐఎండీ శనివారం ప్రకటించింది.

అయితే గతేడాది మే 30వ తేదీన నైరుతి రుతుపవనాలు కేరళను తాకగా.. 2023లో జూన్ 8వ తేదీన.. అంతకుముందు 2022 మే 29వ తేదీన దేశంలోకి ప్రవేశించాయి. అంతేకాకుండా ఈసారి వర్షాలు బాగానే ఉన్నాయని ఐఎండీ తెలిపింది. ఈ సీజన్‌లో సాధారణం కంటే అధిక వర్షపాతం నమోదయ్యే అవకాశం ఉందని వాతావరణ శాఖ తెలిపింది. ఇక భారత్‌లో సాధారణం కంటే తక్కువ వర్షాలు కురిసే ఎల్‌నినో పరిస్థితుల అవకాశాన్ని కూడా కొట్టిపారేసింది.

భారత్‌లో 52 శాతం నికర సాగు భూమికి ఇప్పటికీ వర్షపాతమే ప్రధాన ఆధారంగా ఉంది. దేశ మొత్తం వ్యవసాయ ఉత్పత్తిలో ఈ సాగు భూమి నుంచి ఏకంగా 40 శాతం దిగుబడి వస్తుంది. అందుకే భారత ఆహార భద్రత, ఆర్థిక స్థిరత్వంలో నైరుతి రుతుపవనాలు కీలక పాత్ర పోషిస్తున్నాయి. దేశవ్యాప్తంగా తాగునీరు, విద్యుత్ ఉత్పత్తికి కీలకమైన జలాశయాలను తిరిగి నింపడానికి, దేశ జీడీపీకి 18.2 శాతం తోడ్పాటుకు ఈ నైరుతి రుతుపవనాలు ఎంతో ముఖ్యం.