వేసవిలో ఏది వాడితే ఆరోగ్యానికి మంచిదో తెలుసా?

ఎండాకాలం పీక్ స్టేజ్‌కి చేరుకుంది. రోజు రోజుకి ఎండలు మండిపోతున్నాయి. పెరుగుతున్న వేడి నుంచి తప్పించుకోవడానికి చాలా మంది అనేక ప్రయత్నాలు చేస్తున్నారు. అయితే, చాలా మంది ఇళ్లలో ఎయిర్ కూలర్స్, ఎయిర్ కండీషనర్స్(AC) వాడుతున్నారు. ఏసీ నుంచి వచ్చే గాలి శరీరానికి ఆహ్లాదకరమైన అనుభూతిని ఇస్తే, కూలర్ నుంచి వచ్చే గాలి చల్లటి నీటి చిమ్మడంతో మనసులో ప్రశాంతత నింపుతుంది. ఈ రెండూ మండే వేడి నుంచి రక్షిస్తాయి. అయితే, ఈ రెండింటిలో ఏది ఆరోగ్యానికి మంచిదో అని మీరు ఎప్పుడైనా ఆలోచించారా? ఈ ప్రశ్నకు సమాధానం ఇక్కడ తెలుసుకుందాం.

AC vs కూలర్ ఏది బెస్ట్

​AC గాలి విషయానికి వస్తే, మండే వేడి నుంచి ఉపశమనం పొందడానికి ఇది అత్యంత వేగవంతమైన , సులభమైన మార్గం. ఏసీ గది నుంచి వేడిని కొన్ని నిమిషాల్లోనే తొలగించగలదు. అయినప్పటికీ, ఆరోగ్యాన్ని దృష్టిలో ఉంచుకుంటే, అనేక విధాలుగా AC కంటే కూలర్ మంచి ఎంపిక అంటున్నారు నిపుణులు. ఏసీ నుంచి వచ్చే చల్లగాలి క్రమంగా ఆరోగ్యంపై చెడు ప్రభావం చూపుతుందని నిపుణులు అంటున్నారు. అవసరానికి మించి ఎక్కువసేపు ఏసీలో ఉండటం వల్ల నీరసం, అలసట మాత్రమే కాకుండా, శరీరంలో డీహైడ్రేషన్, చర్మ సమస్యలు కూడా వస్తాయి. ఏసీని వాడేటప్పుడు టెంపరేచర్ కూడా చాలా ముఖ్యం. ఏసీ కంటే కూలర్ ఎందుకు మంచిదో ఓ లుక్కేద్దాం.

సహజ తేమ

కూలర్ గాలిలో తేమను నిలుపుకుంటుంది. దీంతో చర్మం, శ్వాసకోశ పొడిబారడం తగ్గుతుంది. అయితే AC గాలిని పొడిగా చేయడం ద్వారా చర్మం, ముక్కు చికాకు కలిగిస్తుంది. ఏసీ గాలిలో ఎక్కువ సమయం గడపడం వల్ల చర్మం పొడిబారడం, కంటి చికాకు, డీహైడ్రేషన్, తలనొప్పి, అనేక శ్వాసకోశ ఆరోగ్య సమస్యలు వస్తాయి.

శ్వాసకోశ ఆరోగ్యం

​ఎయిర్ కూలర్‌లో ఉండే తేమ ఆస్తమా, అలెర్జీ రోగులకు ప్రయోజనకరంగా ఉంటుంది. ఈ గాలి గొంతు, ఊపిరితిత్తులు ఎండిపోకుండా కాపాడుతుంది. అయితే ఏసీలోని చల్లని పొడి గాలి శ్వాసకోశ సమస్యలను తీవ్రతరం చేస్తుంది.

కీళ్ల నొప్పి

AC తో పోలిస్తే కూలర్ శరీరానికి తేలికపాటి చల్లదనాన్ని అందిస్తుంది. ఇది ఉష్ణోగ్రతలో ఆకస్మిక మార్పుల వల్ల వచ్చే దుష్ప్రభావాల నుంచి శరీరాన్ని రక్షిస్తుంది. అయితే AC తక్కువ ఉష్ణోగ్రత వల్ల కీళ్ల నొప్పులు పెరుగుతాయి. అంతేకాకుండా జలుబు సమస్య కూడా వస్తుంది.

ఇలా చూసినా కూలరే బెస్ట్

* కూలర్ తక్కువ విద్యుత్తును వినియోగిస్తుంది. దీంతో పర్యావరణంపై తక్కువ ప్రభావం చూపుతుంది. ఇది మానసిక ప్రశాంతతను ఇస్తుంది. ఇది పరోక్షంగా ఆరోగ్యానికి మేలు చేస్తుంది. అయితే, కూలర్‌ని ఎప్పటికప్పుడు క్లీన్ చేసుకోవడం చాలా ముఖ్యం.

* బడ్జెట్ ప్రకారం చూసినా ఏసీ కంటే కూలర్ తక్కువ ధర. దీంతో అదనపు భారం ఉండదు. అంతేకాకుండా కూలర్ కోసం ప్రత్యేక స్థలం అవసరం లేదు. ఏసీని ఇన్‌స్టాల్ చేయాలంటే ఒక పద్ధతి ఉంటుంది. దీంతో, ఖర్చు ఎక్కువైపోతుంది.