భారతీయ విద్యార్థులపై అమెరికా మరో బాంబ్.. క్లాసులు ఎగ్గొట్టినా ఇంటికే

అగ్రరాజ్యం అమెరికా అధ్యక్షుడిగా డొనాల్డ్ ట్రంప్ రెండోసారి పదవీ బాధ్యతలు చేపట్టినప్పటి నుంచి చాలా కఠినంగా వ్యవహరిస్తున్నారు. అక్రమ వలసదారులను బలవంతంగా వారి దేశాలకు పంపించేస్తూనే.. వీసా విషయాల్లో కూడా అనేక ఆంక్షలు విధిస్తున్నారు. ఇప్పటికే విదేశీ విద్యార్థులపై అనేక చర్యలు తీసుకుంటున్న అమెరికా సర్కారు.. తాజాగా మరో బాంబ్ వేసింది. ముఖ్యంగా విద్యార్థి వీసాపై యూఎస్ వెళ్లి తరగతులకు సరిగ్గా హాజరు కాకపోయినా, చదువు మానేసినా వారి వీసాను రద్దు చేస్తామని హెచ్చరిస్తోంది. దీని వల్ల అనేక మంది విద్యార్థులు తిరిగి ఇంటికి రావాల్సిన అవకాశం ఉండగా.. ముఖ్యంగా మరింత మంది భారతీయ విద్యార్థుల వీసాలు రద్దు అయ్యే ఛాన్స్ ఉన్నట్లు తెలుస్తోంది.

ఇప్పటికే పలు కారణాలతో అమెరికా.. విదేశీ విద్యార్థుల వీసాలను రద్దు చేస్తూ.. వారిని దేశం నుంచి బహిష్కరిస్తుంది. తాజాగా మరో హెచ్చరిక జారీ చేసింది. తమ విద్యా సంస్థల్లో చదివే భారత్ సహా ఇతర విదేశీ విద్యార్థులు సరిగ్గా తరగతులకు హాజరు కాకపోయినా, అక్కడే ఉంటూ చదువు పూర్తిగా మానేసినా వీసాలను రద్దు చేస్తామని తెలిపింది. ఇందుకు సంబంధించి భారత్‌లోని అమెరికా ఎంబసీ దీనిపై మంగళ వారం రోజు ఓ ప్రకటన కూడా జారీ చేసింది. విద్యా సంస్థ నుంచి డ్రాపౌట్ అయినా, తరగతులు ఎగ్గొట్టినా, విద్యాసంస్థలకు చెప్పకుండా స్టడీ ప్రోగ్రామ్ నుంచి వెళ్లిపోయినా మీ విద్యార్థి వీసా రద్దు అవుతుందని తెలిపింది.

అలాగే భవిష్యత్తులో ఎలాంటి అమెరికా వీసాలకు అయినా మీరు అర్హత కోల్పోతారని చెప్పింది. సమస్యల బారిన పడకుండా ఉండేందుకు ఈ నిబంధనలకు అనుగుణంగా నడుచుకోండని.. మీ విద్యార్థి వీసాను కొనసాగించుకోండని సూచించింది. ఇలా చేయడానికి కూడా ఓ కారణం ఉంది. కొంతమంది విద్యార్థులు చదువు పేరుతో అమెరికా వెళ్లి, అసలైన విద్యను నిర్లక్ష్యం చేసి వీసాను ఇతర ప్రయోజనాల కోసం వాడుతున్నట్టు అధికారులు గుర్తించారు. ఇలాంటి దుర్వినియోగాలను అడ్డుకునేందుకు అమెరికా హోం భద్రతా శాఖ ఈ కొత్త హెచ్చరికను జారీ చేసింది.

ప్రతీ ఏడాది సుమారు 2 లక్షల భారతీయ విద్యార్థులు ఉన్నత విద్య కోసం యూఎస్ వెళ్తున్నారు. వీరిలో చాలామంది తొలిసారిగా విదేశీ జీవితాన్ని అనుభవిస్తున్నారు. ఈక్రమంలోనే కొందరు జల్సాలకు అలవాటు పడి తరగతులకు హాజరు కాకపోవడం లేదా మధ్యలో కోర్సును మానేయడం వంటివి చేస్తున్నారు. ఇవి మాత్రమే కాకుండా ఇతర పనులు చేస్తూ డబ్బులు సంపాదించేందుకు కూడా ప్రయత్నిస్తున్నారు. ఇలాంటి వాళ్లను ఆపేందుకు అమెరికా ఈ హెచ్చరిక చేయగా.. విద్యాసంస్థలు సైతం అప్రమత్తం అయ్యాయి. విద్యార్థులపై మరింత నిఘా పెడుతూ.. పలు సూచనలు కూడా చేస్తున్నాయి.