తాళి కట్టేముందు బోరున ఏడ్చిన వధువు..,, అంతా షాక్

పీటల మీద చివరి నిమిషంలో ఆగిపోయే పెళ్లిళ్లు ఇటీవలి కాలంలో చాలా ఎక్కువయ్యాయి. వధువు మెడలో తాళి పడేవరకు కూడా ఆ పెళ్లి జరుగుతుందో లేదో అనే భయాలు ప్రస్తుత కాలంలో నెలకొంటున్నాయి. అటు వధువు, ఇటు వరుడు లేదంటే కుటుంబ సభ్యులు ఎవరో ఒకరు ఏదో ఒక కారణంతో పెళ్లిళ్లు పెటాకులు చేస్తున్న సంఘటనలు ఎక్కువ అవుతున్నాయి. తాజాగా అలాంటి ఘటనే ఒకటి కర్ణాటకలో జరిగింది. పెళ్లి సంబంధాలు చూసి.. ఎంగేజ్‌మెంట్ చేసుకుని.. పెళ్లి షాపింగ్‌లు, నగలు-నట్రా కొనుగోలు చేసి.. పెళ్లి తంతు అంతా సిద్ధం చేశారు. ఇక పీటలపైకి వరుడు, వధువు కూడా కూర్చుకున్నారు. సరిగ్గా వధువు మెడలో వరుడు తాళి కట్టే సమయం కూడా ఆసన్నం అయింది. అప్పుడే ఆ వధువు ఏడుపు మొదలుపెట్టింది. ఏం జరిగిందని అంతా అడగ్గా.. తీరిగ్గా జరిగిన విషయం చెప్పి అక్కడ ఉన్న వారందరికీ షాకిచ్చింది.

కర్ణాటకలోని హాసన్ జిల్లా‌లో ఒక పెళ్లి అనూహ్య రీతిలో ఆగిపోయింది. తాళి కట్టే క్షణంలో వధువు పెళ్లికి నిరాకరించింది. పీటలపైనే ఏడుపు అందుకుంది. దీంతో ఏమైందని వరుడు సహా కుటుంబ సభ్యులు మొత్తం ఆమెను ప్రశ్నించారు. తనకు ఆ పెళ్లి ఇష్టం లేదని.. తాను మరొక వ్యక్తిని ప్రేమిస్తున్నానని.. ఆ పెళ్లి చేసుకోలేనని స్పష్టం చేశారు. అంతేకాదు.. తన ప్రియుడు ఆ పెళ్లి మండపానికి వస్తున్నాడని కూడా వారికి చెప్పేసింది. అప్పుడే ఆమె ప్రియుడు.. పోలీసులతో సహా ఆ పెళ్లి మండపానికి చేరుకున్నాడు. అనంతరం.. పోలీసుల రక్షణలో తన ప్రియుడితో కలిసి ఆ నవవధువు అక్కడి నుంచి వెళ్లిపోయింది. దీనికి సంబంధించిన వీడియో ఇప్పుడు సోషల్ మీడియాలో వైరల్ అవుతోంది.

ఇక ఈ వీడియో సోషల్ మీడియాలో తెగ వైరల్ కావడంతో.. నెటిజన్లు రకరకాలుగా స్పందిస్తున్నారు. చాలా మంది ఆ వధువు తీసుకున్న నిర్ణయానికి మద్దతు పలికారు. ఆలస్యమైనా సరే గానీ ఆమె సరైన పనే చేసిందని పేర్కొంటున్నారు. ఆమె ప్రేమ విషయం తల్లిదండ్రులకు తెలిసే ఉంటుందని.. కానీ వాళ్లు ఒప్పుకోకపోవడంతో చివరికి పెళ్లి వరకు వచ్చి ఇలా క్యాన్సిల్ చేసిందని.. చెబుతున్నారు. ఆ వధువు గొప్ప నిర్ణయం తీసుకుందని.. ఆమెకు తన మద్దతు ఇస్తున్నానని మరో వ్యక్తి కామెంట్ చేశాడు.

  ఎందుకంటే ఆమె పెళ్లి కొడుకుతోపాటు తనది, తన లవర్‌ది ముగ్గురి ప్రాణాలను కాపాడిందని పేర్కొన్నాడు. ఇష్టం లేని పెళ్లి చేసుకుని.. జీవితాంతం అందరూ ఇబ్బందిపడే కంటే.. ప్రేమ వ్యవహారం ముందే చెప్పి పెళ్లి రద్దు చేసుకోవడం బెటర్ అని తెలిపారు. అయితే ఆమె చేసిన పని మంచిదే అయినప్పటికీ.. ఇలా సరిగ్గా పెళ్లి పీటలపై చేయకుండా ఉండాల్సింది అని మరికొందరు నెటిజన్లు అభిప్రాయపడుతున్నారు. ఆమె చివరి నిమిషంలో ఇలా చేయడం వల్ల ఆ వరుడి పరిస్థితి ఏంటని ప్రశ్నిస్తున్నారు.