జానీ బెయిర్‌స్టో కాదు టీ20 మాన్‌స్టర్! ఎలిమినేటర్‌లో ముంబైని గట్టెక్కిస్తాడా

టీ20 మాన్‌స్టర్ జానీ బెయిర్‌స్టో రాకతో ముంబై ఇండియన్స్ టీమ్ మరింత స్ట్రాంగ్‌గా మారింది. ఐపీఎల్ 2025 ఎలిమినేటర్ మ్యాచ్‌తో ఈ సీజన్‌లో అడుగుపెట్టబోతున్న బెయిర్ స్టోకి ఐపీఎల్‌లో ఎన్నో రికార్డులు ఉన్నాయి. గుజరాత్ టైటాన్స్‌తో జరిగే ఈ మ్యాచ్‌లో ముంబై ఇండియన్స్ ఫ్యాన్స్‌తో పాటు అందరి కళ్లూ బెయిర్ స్టో మీదనే ఉన్నాయి. ఈ రోజు మ్యాచ్‌లో ముంబై గెలవాలంటే బెయిర్ స్టో ఓపెనింగ్ ఇన్నింగ్స్ చాలా ముఖ్యం.

వరల్డ్ టెస్టు ఛాంపియన్ షిప్, ఇంగ్లండ్ సిరీస్‌ల నేపథ్యంలో ముంబై ఇండియన్స్ కీలక ఆటగాళ్లు ర్యాన్ రికెల్టన్‌తో పాటు విల్ జాక్స్, కార్బిన్ బాష్ ఐపీఎల్ 2025ను అర్ధంతరంగా వీడాల్సి వచ్చింది. దాంతో విల్ జాక్స్ స్థానంలో జానీ బెయిర్‌స్టో, ర్యాన్ రికెల్టన్ ప్లేస్‌లో ఇంగ్లండ్ ఆటగాడు రిచర్డ్ గ్లీసన్, కార్బిన్ బాష్‌ను రీప్లేస్ చేస్తూ శ్రీలంక ఆటగాడు చరితా అసలంకను ముంబై ఇండియన్స్ ఈ సీజన్ వరకే తీసుకుంది.

కేవలం ప్లే ఆఫ్స్‌లో ఆడటం కోసమే జానీ బెయిర్‌స్టోకి ముంబై ఇండియన్స్ ఫ్రాంఛైజీ రూ.5.25 కోట్లను చెల్లించింది. దాంతో ఇప్పుడు అందరి కళ్లు అతనిపైనే ఉన్నాయి. గుజరాత్ టైటాన్స్‌తో ఈ రోజు జరిగే మ్యాచ్‌లో బెయిర్ స్టో ఎలాంటి ఇన్నింగ్స్ ఆడతాడు అనేదే ఆసక్తిగా మారింది.

ఐపీఎల్‌లో బెయిర్ స్టోకి అపారమైన అనుభవం ఉంది. మూడేళ్ల కిందట బెయిర్ స్టో ఆడినప్పటికీ అతనికి ఇంకా క్రేజ్ ఉంది. ఐపీఎల్ 2023, 2024లో పంజాబ్ కింగ్స్ స్క్వాడ్‌లో ఉన్నప్పటికీ.. ఆ టీమ్ మేనేజ్‌మెంట్ కనీసం ఒక్క మ్యాచ్‌లో కూడా ఆడే అవకాశం ఇవ్వలేదు. కానీ 2019 నుంచి 2021 మధ్య బెయిర్ స్టో సన్‌రైజర్స్ తరఫున ఆడి తనేంటో నిరూపించుకున్నాడు.

ఐపీఎల్ 2019లో సన్‌రైజర్స్ తరఫున పది మ్యాచ్‌లు ఆడిన బెయిర్ స్టో 445 పరుగులు చేశాడు. ఆ సీజన్‌లో ఒక సెంచరీతో పాటు రెండు హాఫ్ సెంచరీలు కూడా నమోదు చేశాడు. ఐపీఎల్‌లో ఓవరాల్‌గా 39 మ్యాచ్‌లు ఆడిన జానీ బెయిర్‌స్టో 35.86 యావరేజ్, 142.65 స్ట్రయిక్ రేట్‌తో 1291 పరుగులు చేశాడు.

ఈ ఏడాది ఫిబ్రవరిలో సౌతాఫ్రికా టీ20 క్రికెట్ లీగ్‌లో జానీ బెయిర్‌స్టో జోబర్గ్ సూపర్ కింగ్స్ తరఫున ఆడాడు. 35 సంవత్సరాల బెయిర్ స్టో 10 ఇన్నింగ్స్‌లలో 232 పరుగులు చేశాడు. ఇందులో ఒక హాఫ్ సెంచరీ కూడా ఉంది. మరి ఐపీఎల్ 2025లో ముంబైకి కీలకమైన మ్యాచ్‌లో ఎలా రాణిస్తాడో చూడాలి మరి.