నెలకు రూ. 20 వేలు.. చేతికి 5 కోట్లు

ఆర్థిక స్వాతంత్య్రం, రిటైర్మెంట్ తర్వాత ఎలాంటి చింతా లేకుండా జీవించడం - ఇవి చాలా మందికి ఉండే కలలు. మరి ఈ కలల్ని నెరవేర్చుకోవడానికి మీరు నెలకు రూ. 20,000 సిస్టమాటిక్ ఇన్వెస్ట్‌మెంట్ ప్లాన్ (SIP) చేస్తుంటే, రూ. 5 కోట్ల భారీ లక్ష్యాన్ని చేరుకోవడానికి ఎంత సమయం పడుతుందో మీరు ఎప్పుడైనా ఆలోచించారా? మ్యూచువల్ ఫండ్లలో ఉండే కాంపౌండింగ్ (వడ్డీపై వడ్డీ) మ్యాజిక్‌ను అర్థం చేసుకుంటే ఈ లక్ష్యం సాధ్యమే. మ్యూచువల్ ఫండ్లలో సిప్‌ల ద్వారా పెట్టుబడి పెట్టడం వల్ల దీర్ఘకాలంలో మీ సంపద అద్భుతంగా వృద్ధి చెందుతుంది. దీనికి ప్రధాన కారణం కాంపౌండింగ్. అంటే, మీరు పెట్టిన పెట్టుబడిపై వచ్చే రాబడి, తిరిగి పెట్టుబడిగా మారి, దానిపై కూడా మళ్లీ రాబడి వస్తుంది. ఇలా కాలం గడిచే కొద్దీ ఈ "వడ్డీపై వడ్డీ" ప్రభావం అద్భుతమైన ఫలితాలను ఇస్తుంది.

అందుకే ఆర్థిక నిపుణులు ఎప్పుడూ దీర్ఘకాలిక పెట్టుబడులనే సిఫార్సు చేస్తారు. ఇందులో ముఖ్యంగా మ్యూచువల్ ఫండ్స్ ప్రధాన పాత్ర పోషిస్తుంటాయి. మార్కెట్ ఒడుదొడుకులను తట్టుకొని, కాలక్రమేణా మంచి రాబడులను సాధించవచ్చు.

మీరు నెలకు రూ. 20,000 సిప్ చేస్తూ, మీ పెట్టుబడులు సగటున సంవత్సరానికి 12 శాతం రాబడిని (ఇది సాధారణంగా మ్యూచువల్ ఫండ్లలో దీర్ఘకాలంలో ఆశించే రాబడి) అందిస్తాయని అనుకుంటే, మీ రూ. 5 కోట్ల లక్ష్యాన్ని చేరుకోవడానికి పట్టే సమయం ఎంతో చూద్దాం. ఈ ప్రాతిపదికన 28 సంవత్సరాల 3 నెలలు పడుతుందని వాల్యూ రీసెర్చ్ చెబుతోంది. అంటే ఇక్కడ మీరు క్రమం తప్పకుండా నెలకు రూ. 20 వేలు పెట్టుబడి పెట్టడం కొనసాగిస్తే, మొత్తం సంపాదించే కార్పస్ రూ. 5.01 కోట్లు అవుతుంది.

ముఖ్య విషయాలు..

మీరు ప్రతి నెలా ఎంత పొదుపు చేయగలరు అనేది చాలా ముఖ్యం. మీ బడ్జెట్, ఆదాయం ఆధారంగా సిప్ మొత్తాన్ని నిర్ణయించుకోవాలి. మీరు ఎంత కార్పస్ (రూ. 5 కోట్లు) చేరుకోవాలనుకుంటున్నారు అనేది స్పష్టంగా ఉండాలి.

నెలకు రూ. 20,000 సిప్‌తో పాటు, మీకు ఏదైనా ఒకేసారి (లంప్ సమ్) పెట్టుబడి పెట్టడానికి డబ్బు ఉంటే, అది మీ లక్ష్యాన్ని మరింత త్వరగా చేరుకోవడానికి సహాయపడుతుంది. ఈ సందర్భంలో, మీకు రూ. 5 కోట్లు చేరుకోవడానికి 28 సంవత్సరాల 3 నెలల కంటే తక్కువ సమయం పట్టొచ్చు.

పెట్టుబడుల నుంచి ఆశించే రాబడి రేటు (ఉదాహరణకు 12%) ఒక అంచనా మాత్రమే. మార్కెట్ పరిస్థితుల్ని బట్టి ఇది మారొచ్చు. కొన్నిసార్లు ఎక్కువ రాబడి రావచ్చు, కొన్నిసార్లు తక్కువ రాబడి రావచ్చు.

మ్యూచువల్ ఫండ్ పెట్టుబడులు మార్కెట్ రిస్క్‌లకు లోబడి ఉంటాయి. షేర్ మార్కెట్ హెచ్చుతగ్గులు మీ పెట్టుబడుల విలువను ప్రభావితం చేయొచ్చు. అయితే, దీర్ఘకాలిక పెట్టుబడి వ్యూహం ఈ రిస్క్‌లను తగ్గించడంలో సహాయపడుతుంది. మార్కెట్ పడిపోయినప్పుడు కూడా సిప్‌ను కొనసాగించడం వల్ల తక్కువ ధరలకు ఎక్కువ యూనిట్లను కొనుగోలు చేసే అవకాశం లభిస్తుంది, ఇది దీర్ఘకాలంలో మీ సగటు కొనుగోలు ధరను తగ్గిస్తుంది. ఏదేమైనా మీ ఆర్థిక లక్ష్యాల్ని చేరుకోవడానికి ఎల్లప్పుడూ ఒక సెబీ-రిజిస్టర్డ్ ఆర్థిక సలహాదారుని సంప్రదించడం మంచిది.