రాజ్యసభ నామినేషన్ దాఖలును వాయిదా వేసుకున్నా కమల్ హాసన్

కన్నడ భాషపై నటుడు కమల్ హాసన్ చేసిన వ్యాఖ్యలు ప్రస్తుతం తీవ్ర దుమారం రేపుతున్నాయి. ఈ నేపథ్యంలోనే కమల్ హాసన్ సంచలన నిర్ణయం తీసుకున్నారు. ఇటీవల డీఎంకే పార్టీ కమల్ హాసన్‌ను రాజ్యసభకు పంపించాలని నిర్ణయించింది. అయితే తాజా పరిణామాలతో తన రాజ్యసభ నామినేషన్ దాఖలును కమల్ హాసన్ వాయిదా వేసుకున్నారు. కన్నడ భాష మూలాలపై చేసిన వివాదాస్పద వ్యాఖ్యలు ఇప్పుడు తీవ్ర దుమారం రేపుతుండటంతో ఆ కారణంగానే కమల్ హాసన్ ఈ నిర్ణయం తీసుకున్నట్లు తెలుస్తోంది.

ఇటీవల థగ్ లైఫ్ సినిమా ప్రమోషన్లలో భాగంగా నటుడు, మక్కల్ నీది మయ్యం పార్టీ అధినేత కమల్ హాసన్.. కన్నడ భాష పుట్టుక గురించి చేసిన వ్యాఖ్యలు తీవ్ర దుమారానికి కారణం అయ్యాయి. కమల్ హాసన్ చేసిన వ్యాఖ్యలపై కర్ణాటకలో తీవ్ర ఆగ్రహావేశాలు వ్యక్తం అయ్యాయి. ఇక కన్నడ సంఘాలు, కన్నడ రాజకీయ పార్టీలు కమల్ హాసన్‌పై తీవ్ర స్థాయిలో విరుచుకుపడ్డాయి. కన్నడపై చేసిన వ్యాఖ్యలకు క్షమాపణలు చెప్పేవరకు థగ్ లైఫ్ సినిమాను కర్ణాటకలో విడుదల కానీయమని తీవ్ర హెచ్చరికలు జారీ చేశారు. ఈ వ్యవహారంపై కర్ణాటక హైకోర్టును కమల్ హాసన్‌ ఆశ్రయించినా ఆశించిన ఫలితం దక్కలేదు. ఈ నేపథ్యంలోనే తన థగ్ లైఫ్ సినిమాను కర్ణాటకలో విడుదల చేయవద్దని కమల్ హాసన్ నిర్ణయం తీసుకున్నారు. తాజాగా ఆయన మరో సంచలన నిర్ణయం తీసుకున్నారు.

కన్నడ భాష వివాదం నేపథ్యంలో రాజ్యసభకు నామినేషన్ వేసే ప్రక్రియను కమల్ హాసన్ కొన్ని రోజులు వాయిదా వేసుకున్నారు. థగ్ లైఫ్ సినిమా విడుదలైన తర్వాతే కమల్ హాసన్ నామినేషన్ వేసే అవకాశం ఉందని విశ్వసనీయ వర్గాలు వెల్లడించాయి. 2024 లోక్‌సభ ఎన్నికల సందర్భంగా తమిళనాడులో అధికారంలో ఉన్న ఎంకే స్టాలిన్ నేతృత్వంలోని ద్రవిడ మున్నేట్ర కజగం (డీఎంకే)కు కమల్ హాసన్ పార్టీ అయిన మక్కల్ నీది మయ్యం పార్టీ మద్దతు తెలిపింది. ఎన్నికల వేళ.. ఈ రెండు పార్టీల మధ్య కుదిరిన ఒప్పందం ప్రకారం డీఎంకే నేతృత్వంలోని కూటమికి మక్కల్ నీది మయ్యం మద్దతు ఇచ్చినందుకు బదులుగా కమల్ హాసన్‌కు రాజ్యసభ సీటును కేటాయిస్తామని డీఎంకే హామీ ఇచ్చింది.

  ఈ నేపథ్యంలోనే మే 28వ తేదీన డీఎంకే అధికారికంగా ఆరుగురు రాజ్యసభ సీట్లలో 3 సీట్లకు అభ్యర్థులను ప్రకటించింది. ఇందులో కమల్ హాసన్ పేరు కూడా ఉంది. దీంతో కమల్ హాసన్ పార్లమెంట్‌లో అడుగుపెట్టేందుకు మార్గం సుగమమైంది. త్వరలోనే తమిళనాడు నుంచి 6 రాజ్యసభ స్థానాలు ఖాళీ కానున్నాయి. ఈ స్థానాలను భర్తీ చేయడానికి జూన్ 19వ తేదీన ఎన్నికలు జరగనున్నాయి. ఈ నేపథ్యంలోనే కమల్ ఈ నిర్ణయం తీసుకున్నారు.

థగ్ లైఫ్ సినిమా ఈవెంట్‌లో భాగంగా మాట్లాడిన కమల్ హాసన్.. తమిళం నుంచి కన్నడ పుట్టిందని వ్యాఖ్యానించడం తీవ్ర వివాదానికి దారితీసింది. దీనిపై తీవ్ర ఆగ్రహం వ్యక్తం చేసిన కన్నడ అనుకూల సంఘాలు.. కమల్ హాసన్ క్షమాపణ చెప్పాలని డిమాండ్ చేయడంతో పాటు ఆయన సినిమాను రాష్ట్రవ్యాప్తంగా బహిష్కరించాలని పిలుపునిచ్చారు. కన్నడ సంఘాల నిర్ణయంతో కర్ణాటక ఫిల్మ్ ఛాంబర్ ఆఫ్ కామర్స్ కూడా థగ్ లైఫ్ సినిమా విడుదల, థియేటర్లలో షోలు నిలిపివేయాలని నిర్ణయించింది. దీనిపై కర్ణాటక హైకోర్టును ఆశ్రయించిన కమల్ హాసన్.. విచారణ సందర్భంగా ఆ రాష్ట్రంలో తన సినిమాను విడుదల చేయకూడదని నిర్ణయించుకున్నారు. తాను తప్పు చేయలేదని.. తన వ్యాఖ్యలను అపార్థం చేసుకున్నారని పేర్కొన్న కమల్ హాసన్.. క్షమాపణ చెప్పడానికి నిరాకరించారు.