కొడుకును కాపాడేందుకు కోతులపైకి గొడ్డలి విసిరిన తండ్రి.. చివరికి

ఉత్తర ప్రదేశ్‌లోని మొరాదాబాద్‌కు చెందిన లఖన్ సింగ్‌కు రెండేళ్ల కుమారుడు ఉన్నాడు. అయితే అతడి పేరు ఆరవ్ కాగా.. కన్నకొడుకును కంటికి రెప్పలా చూసుకుంటున్నాడు. తన ప్రాణాలన్నీ అతడిపైనే పెట్టుకుని అల్లారుముద్దుగా పెంచుకుంటున్నాడు. ముందు నుంచీ కుమారుడిపై అమితమైన ప్రేమ ఉండగా.. బాలుడికి ఏ చిన్న దెబ్బ తగలకుండా చూసేవాడు. అయితే ఎప్పటిలాగే ఆరవ్ తన ఇంటి ఆవరణలో ఆడుకుంటున్నాడు. లోపల ఉన్న తండ్రి లఖన్ సింగ్ బాలుడిని ఓ కంట కనిపెడుతూనే ఉన్నాడు. ఈ సమయంలోనే అక్కడకు ఓ పెద్ద కోతుల గుంపు వచ్చింది. దీంతో లఖన్ సింగ్.. అవి తన కుమారుడిని ఏమైనా చేస్తాయేమోనని భయపడ్డాడు.

వెంటనే వాటిని వెళ్లగొట్టాలని నిర్ణయించుకున్నాడు. కానీ సయమానికి ఇంట్లో ఎలాంటి కర్ర దొరక్కపోవడంతో.. పక్కనే ఉన్న గొడ్డలిని తీసుకున్నాడు. ఆపై మేడ మీదకు ఎక్కి దాన్ని కోతులపైకి విసిరాడు. కానీ దురదృష్టవశాత్తు ఈ గొడ్డలి కింద ఆడుకుంటున్న తన రెండేళ్ల కుమారుడు ఆరవ్‌పై పడింది. నేరుగా వెళ్లి అతడి మెడకు తాకగా.. మెడను కోసేసింది. దీంతో పక్కనే ఉన్న గోడలపైకి మొత్తం రక్తం చిందింది. విషయం గుర్తించిన కుటుంబ సభ్యులు కేకలు వేస్తూ వచ్చి బాలుడిని ఆస్పత్రికి తరలించారు. లఖన్ సింగ్ సైతం తీవ్రంగా రోదిస్తూనే ఆస్పత్రికి పరుగులు పెట్టాడు.

కానీ అప్పటికే బాలుడు చనిపోయినట్లు వైద్యులు ధ్రువీకరించారు. దీంతో ప్రమాదవశాత్తు బాలుడు చనిపోగా.. పోలీసులకు సమాచారం ఇవ్వకుండానే అంత్యక్రియలు నిర్వహించారు. కానీ లఖన్ సింగ్ బావ మరిది రంగంలోకి దిగి.. తన మేనల్లుడిని కావాలనే బావ చంపినట్ల వివరించాడు. తన సోదరిని ఎప్పుడూ కొడుతూ, గొడవలు పడుతూ ఇబ్బంది పెట్టేవాడని, అతడే ఆరవ్‌ను చంపేశాడని ఆరోపించాడు. మరోవైపు గ్రామస్థులేమో.. కోతులే ఇనుప రాడ్లను జార విడిచాయని.. అవే బాలుడికి తగిలి ప్రాణాలు కోల్పోయినట్లు చెప్పారు. అయితే ఈ విషయాలన్నీ పరిగణలోకి తీసుకున్న పోలీసులు దర్యాప్తు చేయగా.. ప్రమాదవశాత్తే బాలుడు చనిపోయాడని గుర్తించారు. దీంతో ఎలాంటి కేసును నమోదు చేయకుండానే వెనుదిరిగారు.