చిన్ననాటి స్నేహితురాలితో స్పిన్నర్ కుల్దీప్ పెళ్లి ఫిక్స్

భార‌త క్రికెట్ జ‌ట్టు మణికట్టు స్పిన్న‌ర్ కుల్‌దీప్ యాదవ్ త్వ‌ర‌లోనే ఓ ఇంటివాడు కానున్నాడు. త్వరలో అతడు తన చిన్ననాటి స్నేహితురాలితో పెళ్లి పీట‌లు ఎక్కనున్నాడు. త‌న గూగ్లీతో బ్యాట‌ర్ల‌ను బోల్తా కొట్టించే ఈ చైనామ‌న్ బౌల‌ర్.. నిశ్చితార్థం బుధవారం జరిగింది. బాల్య స్నేహితురాలు వన్షికకు కుల్‌దీప్ యాదవ్ ఉంగరం తొడిగాడు. అనంత‌రం ఆమె కూడా అత‌డికి ఎంగేజ్‌మెంట్ రింగ్ తొడిగింది. ఉత్తరప్రదేశ్‌లోని ల‌క్నోలో కుటుంబ స‌భ్యుల స‌మ‌క్షంలో బుధ‌వారం ఈ నిశ్చితార్థం ఘ‌నంగా జ‌రిగింది.

కుల్‌దీప్ యాదవ్ ఎంగేజ్‌మెంట్ సెర్మనీకి రింకూ సింగ్ సహా పలువురు యూపీకి చెందిన డొమెస్టిక్ క్రికెటర్లు హాజరయ్యారు. అయితే వీరి పెళ్లి ఎప్పుడు జరుగుతుందనేది మాత్రం తెలియరాలేదు. ఎంగేజ్‌మెంట్‌కు హాజరైన యూపీలోన సమాజ్‌వాద్ పార్టీ ఎంపీ, రింకూ సింగ్‌కు కాబోయే సతీమణి ప్రియా సరోజ్.. ఫొటోలను సోషల్ మీడియాలో షేర్ చేశారు. కుల్‌దీప్ యాదవ్, వన్షిక జోడీకి కంగ్రాట్స్ చెప్పారు.

ఎవరీ వన్షిక?

కుల్‌దీప్ యాదవ్ మ‌న‌సు దోచిన‌ వన్షికది ఉత్తరప్రదేశే. ఆమె స్వస్థలం కాన్పూర్ ద‌గ్గ‌రలోని శ్యామ్ న‌గ‌ర్. ప్రస్తుతం ఆమె జీవిత బీమా సంస్థ‌ ఎల్ఐసీలో ప‌ని చేస్తున్నారు. వన్షిక, కుల్‌దీప్ యాదవ్ చిన్నప్పటి నుంచి మంచి స్నేహితులుగా ఉన్నారు. పాఠశాల రోజుల తర్వాత కూడా వీరు త‌ర‌చూ క‌లుసుకుని క‌బుర్లు చెప్పుకునేవారు. వ‌య‌సు పెరిగేకొద్దీ వాళ్ల మ‌ధ్య ప్రేమ చిగురించిందట. దీంతో రెండు కుటుంబాలకు ఈ విషయం చెప్పి, వారిని ఒప్పించి పెళ్లి చేసుకోవాల‌ని నిర్ణయించుకున్నారు.

ఇక ఎంగేజ్‌మెంట్ వేడుకలో కుల్‌దీప్ యాదవ్ క్రీమ్ క‌ల‌ర్ ప్యాంట్, సూట్ ధ‌రించాడు. అటు వ‌న్షిక ఎరుపు రంగు ఎంబ్రాయిడ‌రీ లెహెంగాలో మెరిసింది. ఇఠీవల ముగిసిన ఐపీఎల్ 2025లో కుల్‌దీప్ యాదవ్ ఢిల్లీ క్యాపిటల్స్ తరఫున ఆడాడు. ఈ సీజన్‌లో 7.08 ఎకాన‌మీతో 15 వికెట్లు పడగొట్టాడు. ఇంగ్లాండ్‌తో టెస్టు సిరీస్‌కు ఎంపిక చేసిన భారత జట్టులో సభ్యుడిగా ఉన్న కుల్‌దీప్ యాదవ్.. త్వ‌ర‌లోనే లండన్ వెళ్లనున్నాడు. ఈ పర్యటన తర్వాతే వీరి పెళ్లి జరగనున్నట్లు తెలుస్తోంది.