'టీసీఎస్ వల్లే ఈ స్థాయిలో.. ఈ రోజు నేను జీవిస్తున్న జీవితాన్ని నాకు బహుమతిగా ఇచ్చింది

టాటా కన్సల్టెన్సీ సర్వీసెస్ అంటే కేవలం ఒక ఐటీ కంపెనీ కాదు, లక్షలాది మందికి జీవితాన్ని ప్రసాదించిన ఒక సంస్థ. ఇందులో ప్రపంచవ్యాప్తంగా ఇప్పుడు ఏకంగా 6 లక్షల మందికిపైగా పనిచేస్తున్నారు. అలాంటి ఒక మాజీ ఉద్యోగి, టీసీఎస్ తన జీవితాన్ని ఎలా మార్చివేసిందో, తన వృత్తిపరమైన విజయాలకు, వ్యక్తిగత మైలురాళ్లకు పునాది ఎలా వేసిందో వెల్లడించారు. ప్రస్తుతం రిజర్వ్ బ్యాంక్ ఆఫ్ ఆస్ట్రేలియాలో టెస్ట్ లీడ్‌గా పనిచేస్తున్న వినయ్ శ్రీరామ్, తాను సాధించిన ప్రతిదీ టీసీఎస్‌లో తన మొదటి ఉద్యోగం నుండే వచ్చిందని కృతజ్ఞతా భావంతో తెలిపారు.

"నాకు ఉన్నదంతా TCS వల్లే"..

"ఈరోజు నా జీవితంలో నాకు ఉన్నదంతా TCS వల్లే" అని శ్రీరామ్ X లో (ట్విట్టర్) ఒక హృదయపూర్వక పోస్ట్‌లో రాశారు. పేదరికం నుంచి వచ్చిన లక్షలాది మందిని టీసీఎస్ ఎలా ఉన్నత శిఖరాలకు చేరేందుకు సహాయపడిందో ప్రశంసిస్తూ వచ్చిన ఒక పోస్ట్‌కు సిడ్నీలో నివసిస్తున్న ఈ భారతీయ టెక్ ప్రొఫెషనల్ స్పందించారు.

 శ్రీరామ్ టీసీఎస్‌లో సాఫ్ట్‌వేర్ టెస్ట్ అనలిస్ట్‌గా తన వృత్తిని ప్రారంభించారు. టీసీఎస్‌లో ఉద్యోగం వచ్చిందని తన తండ్రికి చెప్పిన క్షణాన్ని ఆయన Xలో గుర్తు చేసుకున్నారు. "నాకు TCSలో ఉద్యోగం వచ్చిందని చెప్పినప్పుడు మా నాన్న స్పందించిన తీరు నాకు స్పష్టంగా గుర్తుంది. (మా కుటుంబం కష్టాల్లో లేకపోయినా). క్యాంపస్ ఇంటర్వ్యూ తర్వాత రాత్రి 10 గంటలకు నేను ఇంటికి తిరిగి వచ్చినప్పుడు, ఆయన నన్ను కౌగిలించుకొని కన్నీళ్లు పెట్టుకున్నారు." అని ఆయన చెప్పారు.

ఆయన కుటుంబం ఆర్థికంగా స్థిరంగా ఉన్నప్పటికీ.. శ్రీరామ్ తండ్రి కేంద్ర ప్రభుత్వ ఉద్యోగం చేసేవారు. వెనుకబడిన లేదా అట్టడుగు వర్గాల నుంచి వచ్చిన వారికి టీసీఎస్‌లో ఉద్యోగం ఎంత ముఖ్యమో శ్రీరామ్ గుర్తు చేసుకున్నారు. "మా నాన్నకు, ఒక సాధారణ జీతంతో కేంద్ర ప్రభుత్వ ఉద్యోగికి అంత ప్రాధాన్యత ఉంటే, పట్టణాలు, గ్రామాల నుంచి వచ్చిన మొదటి తరం గ్రాడ్యుయేట్లకు, వారి తల్లిదండ్రులకు అది ఎంత గొప్పదో ఊహించండి. వారికి మంచి కళాశాలల్లో చదివేందుకు కూడా ఇబ్బందులు ఉండేవి.'' అని ఆయన రాశారు.

తనకు అంతర్జాతీయ అవకాశాలను కల్పించినందుకు, తద్వారా ఆస్ట్రేలియాలో స్థిరపడటానికి అవకాశం కల్పించినందుకు టీసీఎస్‌కు శ్రీరామ్ కృతజ్ఞతలు తెలిపారు. "సిడ్నీకి ప్రయాణించే అవకాశం, ఈరోజు నేను ఎంతో ఇష్టపడే నా ఇల్లు, టీసీఎస్ నాకు ఇచ్చింది" అని ఆయన పేర్కొన్నారు.

టీసీఎస్‌లో చేరాలని చూస్తున్న సమయంలో, ఒక జూనియర్ విద్యార్థినికి.. తను టీసీఎస్ ఇంటర్వ్యూకు సిద్ధం కావడానికి సహాయం చేసినట్లు ఈ టెకీ వెల్లడించారు. ఆమె ఎంపిక కానప్పటికీ, చివరికి రెనాల్ట్‌లో చేరింది. అయితే, ఈ పరిచయం ఒక శాశ్వత సంబంధానికి దారితీసింది. "నేను టీసీఎస్‌లో చేరడానికి ఎదురుచూస్తున్నప్పుడు, ఒక జూనియర్ విద్యార్థినికి.. ఆమె TCS ఇంటర్వ్యూకు ప్రిపేర్ చేసేందుకు సహాయం చేయడం ద్వారా.. నేను నా జీవిత భాగస్వామిని కనుగొన్నాను. ఆమెను వివాహం చేసుకున్నాను. ఇద్దరు పిల్లల్ని కలిగి ఉన్నా.'' అని చెప్పారు.

సోషల్ మీడియా ప్లాట్‌ఫామ్‌లలో టీసీఎస్ తరచుగా ఎదుర్కొనే విమర్శలకు శ్రీరామ్ గట్టి సమాధానం ఇచ్చారు. "ఒకరి చెత్త మరొకరి నిధి" అని రాస్తూ, "TCS నా నిధి, ఈరోజు నేను జీవిస్తున్న జీవితాన్ని నాకు బహుమతిగా ఇచ్చింది" అని ఆయన పేర్కొన్నారు. ఈ మాటలు టీసీఎస్.. లక్షలాది మందికి అందించిన జీవితాన్ని మార్చే అవకాశాలను స్పష్టంగా తెలియజేస్తున్నాయి.