భారీగా పెరిగిన రూ.500 దొంగ నోట్లు.. ఫేక్ నోట్లను ఎలా గుర్తించాలి

పెద్ద నోట్ల రద్దు తర్వాత వాటి స్థానంలో రూ. 2000, రూ.500 కొత్త కరెన్సీ నోట్లను రిజర్వ్ బ్యాంక్ ఆఫ్ ఇండియా తీసుకొచ్చింది. ఆ తర్వాత కొద్ది నెలల్లోనే రూ. 2000 నోట్ల ముద్రణ ఆపేసి ఆ తర్వాత చలామణి నుంచి ఉపసంహరించారు. ఇప్పుడు పెద్ద నోటు అంటే రూ. 500 మాత్రమే. దీంతో ఈ రూ. 500 నోట్లలో దొంగ నోట్ల చలామణి భారీగా పెరిగిపోయింది. మార్కెట్లో ఎక్కువగా చలామణి అవుతున్నట్లు తెలుస్తోంది. అమాయకులకు నకిలీ నోట్లను కట్టబెడుతున్నట్లు పలు నివేదికలు చెబుతున్నాయి. ఈ క్రమంలోనే రూ. 500 నకిలీ నోట్లు 37.3 శాతం మేర పెరిగినట్లు స్వయంగా ఆర్‌బీఐ చెప్పడం ఆందోళన కలిగించే విషయమే.

ఇటీవలే ఆర్‌బీఐ వార్షిక నివేదిక విడుదల చేసింది. ఇందులో రూ. 500 నకిలీ నోట్లపై సంచలన విషయాలు వెల్లడించింది. గత ఆర్థిక సంవత్సరం 2024- 25లో బ్యాంకింగ్ వ్యవస్థలో రూ.500 నకిలో నోట్లను గుర్తించడం 37.3 శాతం మేర పెరిగినట్లు వెల్లడించింది. గత ఆర్థిక సంవత్సరంలో కొత్త రూ. 500 నోట్ల మాదిరిగా ఉన్నవి ఏకంగా 1.18 లక్షలు నోట్లు గుర్తించినట్లు ఆర్‌బీఐ తెలిపింది. ఈ విలువ రూ. 5.88 కోట్లుగా ఉంటుందని పేర్కొంది. అంతకు ముందు ఏడాది 2023- 24లో రూ. 4.28 కోట్లు విలువైన నకిలీ నోట్లను గుర్తించగా ఇప్పుడు అది 37.3 శాతం మేర పెరిగిందని వెల్లడించింది.

ఇంటినే నకిలీ నోట్ల ప్రెస్‌గా మార్చేసిన ముఠా

నకిలీ రూ. 500 గుర్తించండిలా..

RBI కెహతా హై వెబ్‌సైట్లో ఒరిజినల్ రూ. 500 నోటుకు సంబంధించిన వివరాలను అందించింది. నోటులోని నిలువు గీత వంచినప్పుడు గ్రీన్ కలర్ నుంచి ముదురు నీలంలోకి మారుతుంది. రంగు మారకపోతే నకిలీ నోటుగా పరిగణించాలి. నోటును వెలుతురులో చూస్తే మహాత్మా గాంధీ ఫోటో, 500 అనే అంకె వాటర్‌మార్క్‌ కనిపిస్తాయి. ఒరిజినల్ నోటుపై చిన్న సైజులో హిందీ, ఇంగ్లీష్ భాషల్లో అక్షరాలు కనిపిస్తాయి. ఒరిజినల్ కరెన్సీ నోటు కాగితంతో తయారు చేయరు. అది ప్రత్యేకమైన వస్త్రంతో తయారవుతుంది. తడిచినా సులభంగా చిరగదు. మహాత్మా గాంధీ ఫోటో ఎడమ, కుడి చివర్లలో క్రాస్‌గా 5 చిన్న గీతలు ఉబ్బెత్తుగా ఉంటాయి. చేతితో తాకితే తెలుస్తాయి. 500 సంఖ్య దేవనాగరి లిపిలో ముద్రిస్తారు. నోటును కుడివైపున వెలుతురుకు పట్టి చూసినట్లయితే లోపల ఒక చిత్రం కనిపిస్తుంది. నోటుపై అశోక స్తూపం చిహ్నం ఉంటుంది.