ఆ కోణంలోనూ దర్యాప్తు ,,,,పవన్ కళ్యాణ్

శ్రీ‌కాకుళం జిల్లా హిర మండలంలోని కూర్మ గ్రామంలో అగ్నిప్రమాదం చోటుచేసుకుంది. ఆధ్యాత్మిక మందిరానికి గుర్తు తెలియని వ్యక్తులు నిప్పుపెట్టారు. శుక్రవారం అర్ధరాత్రి సమయంలో ఈ ఘటన జరిగింది. ఆధ్యాత్మిక గురువు రాధాకృష్ణ మందిరంలో అకస్మాత్తుగా మంటలు చెలరేగాయి. పెద్దఎత్తున మంటలు ఎగసిపడటంతో.. భ‌క్తులు భయంతో ప‌రుగులు తీశారు. ఈ అగ్ని ప్రమాదంలో విలువైన పుస్తకాలు, గ్రంథాలు కాలిబూడిదయ్యాయి. ఈ ఘటన స్థానికంగా సంచలనం రేపింది. బాహ్య ప్రపంచపు అలవాట్లకు దూరంగా.. సనాతన ధర్మాన్ని పాటిస్తూ దైవచింతనతో నడిపే ఈ గ్రామంలో అకస్మాత్తుగా జరిగిన ఈ అగ్ని ప్రమాదం చర్చనీయాంశమైంది. ఈ నేపథ్యంలో ఈ ఘటనపై ఏపీ డిప్యూటీ సీఎం పవన్ కళ్యాణ్ స్పందించారు. ఈ ఘటనపై విచారణకు ఆదేశించారు.

"ఆధునిక హంగులు లేకుండా, అధ్యాత్మిక చింతనతో జీవించేలా తీర్చిదిద్దుకున్న కూర్మ గ్రామం అగ్నికి ఆహుతి కావడం దురదృష్టకరం. శ్రీకాకుళం జిల్లా హిరమండలం సమీపంలోని కూర్మ గ్రామంలో చోటు చేసుకున్న అగ్ని ప్రమాదంపై పోలీసులు లోతుగా విచారణ చేయాలని సంబంధిత యంత్రాంగానికి సూచనలు చేశాను. ఈ ఘటనపై అనుమానాలు వ్యక్తమవుతున్న తరుణంలో ఆ కోణంలోనూ దర్యాప్తు చేపట్టాలి. కూర్మ గ్రామంలో ప్రస్తుత పరిస్థితిపై జిల్లా అధికారులతో మాట్లాడి, వారికి అవసరమైన సహాయ సహకారాలు అందిస్తాము."

"సనాతన ధార్మిక జీవనం కోసం ఇస్కాన్ ఆధ్వర్యంలో ఈ గ్రామం ఏర్పాటైంది. కూర్మ గ్రామవాసులు యాంత్రిక జీవన విధానాలకు భిన్నంగా మట్టి ఇళ్ళల్లో ఉంటూ ప్రకృతి వ్యవసాయం చేసుకొంటూ జీవిస్తున్నారు. వేద విద్యను అభ్యసించే చిన్నారులు సంస్కృతం, తెలుగు, హిందీ, ఆంగ్లం అనర్గళంగా మాట్లాడుతూ ఉంటారు. వర్తమాన కాలంలో విశిష్టంగా ఉన్న ఈ గ్రామం పునరుద్ధరణపై దృష్టి సారించాలి. " అని పవన్ కళ్యాణ్ ట్వీట్ చేశారు.

మరోవైపు హిరమండలంలోని అంతకాపల్లి అడవిలో 2018లో ఈ కూర్మ గ్రామం ఏర్పాటైంది. భక్తి వేదాంతస్వామి ప్రభుపాదుల ఆదేశాలను అనుసరించ, భక్తివికాస్ స్వామి ఈ గ్రామాన్ని ఏర్పాటు చేశారు. ఈ గ్రామంలో కరెంట్, టీవీ, ఫోన్లు ఇలాంటివి ఏవీ ఉండవు, ప్రకృతి ఒడిలో, ప్రకృతి సేద్యం చేసుకుంటూ.. డబ్బుతో పనిలేకుండా, ఇతరులపై ఆధారపడకుండా సొంతంగా పండించుకుంటూ.. దానితోనే జీవనం సాగిస్తూ, సరికొత్త జీవన విధానాన్ని ఈ గ్రామంలోని వారు పాటిస్తున్నారు. అలాంటి చోట అగ్ని ప్రమాదం జరగడం చర్చనీయాంశమైంది.